¹ Elihu ayushula n'okuderha : ² Ochikeberwe oku wanyaza, kw'omenyere oku wachirhondola embere za Nyamuzinda, ³ Amango wa maderha: Nde wantabala, bichi bya kanyijira mpu ntajiraga echaha? ⁴ W'oyo wunashuza, na bera bawe okuliguma. ⁵ Linganya amalunga, n'okulola! Olole ebichu, nk'okola biri enyanya zawe! ⁶ Okajira echaha, k'eri yewe y'obabeze? n'amango ebyaha byawe yibyayushuka, k'omubabeze? ⁷ Akaba oli w'okuli, bichi wamuha? Bichi wabona omu fune zawe? ⁸ Obubi bwawe bwanalaza balala mushushene nabwo, Okuli kwawe kushinganene oku mwene omuntu. ⁹ Oli omu buhanya arhawa kuyama, ana sidaka bantu banene oku mabi; ¹⁰ Aliko ntaye waderha: Ngahe ali Nyamuzinda, wandemaga, olala ohereza abanttu enyimpo z'omushingo omu budufu, ¹¹ Anarhuyigiriza kulusha ebirhungano by'egulu, anarhuhereza obwenge kulusha enyunyi z'omu mpingu? ¹² Bana yama bwenene ntyo, Nyamuzinda arhashuzaga chiro, eri kuchibona kw'abantu babi barhuma. ¹³ Buli busha okuyama, Nyamuzinda arhayunva chiro, Ogala-Byoshi arhalola ebiri ntyo chiro. ¹⁴ eyi waderha bwinja oku orhali wa bibona chiro, olubanja lwawe luli embere zage: omulinge! ¹⁵ Aliko, bulala oburhe bwage ntacho bwa ka shwira rhujira, kurhali kuderha k'oku rhuhangayikira oku lufu aherhe kukehere. ¹⁶ Ntyo Yubu abumbul'obunu busha, ayushula emyazi yage buzira bwenge.