¹ Elihu ashuza aderha: ² Berhonzi, muyunve emyazi yani! Mwabo muli banyabwenge, mutenge oku rhwiri! ³ Bulala oku rhwiri kukulikira emyazi, nka kula ebiraka biyunva okuloka kw'ebiryo. ⁴ Rhulondole echiri omu kuli, rhulole omu rhwabo echi kwirire. ⁵ Yubu aderha: Ndi mweru-kweru, na Nyamuzinda andahir'okuli; ⁶ Mperhe okuli, na nagera mpu mubeshi; Echihuli chani yi chaluma, nta naherhe chaha. ⁷ Ka hali omuntu oli nka Yubu, wanywa amabi nk'amenji, ⁸ Rhulambagire n'abajira amabi, okulule babiri haguma n'ababi? ⁹ Bulala aderha : Kurhashinganene omuntu okujira oku alonzeze emwa Nyamuzinda. ¹⁰ Muyumvirize ntyo, abantu bw'obwenge! Hale na Nyamuzinda nka nta kuli, hale n'Ogala- Byoshi okujira obubi! ¹¹ Anajira omuntu kugerera ebijiro byage, anagabira ngasi muguma oku njira zage. ¹² Nanga arhali ntyo, Nyamuzinda arhajira bubi; Omugala-Byoshi arhanyegan'okuli. ¹³ Nde wamuhaga arhegeke egulu? Nde wamuherezaga egulu oku likwiza kwage? ¹⁴ Nka rhachijag'emurhima yenine, nka chikulirag'omuka yenine n'omuhusi, ¹⁵ ngasi mubiri goshi nji gwa hera duba, n'omuntu nj'anagaluka omu kachulo. ¹⁶ Akaba ogwerh'obwenge, oyunvirize ebi, orhege okurhwiri oku mulenge gw'emyazi yani! ¹⁷ Omushombanyi w'okuli akarhegeka? n'oku hana ow'okuli, chirimisi, ¹⁸ Owashambala obukali bw'abami n'obubi bw'abarhwali, ¹⁹ Arhenji abachiyerekana bazibu arha najira kabolo omu charagati kw'omugale n'omukene, bulala boshi yiwabalemaga n'efune zage? ²⁰ Omu kachanji kageke, banahez'akalamo; omu charagati k'obudufu, olubaga lwanafuna n'okuhera; Chirimisi anahera, buzira fune y'omuntu. ²¹ Bulala Nyamuzinda anabona oborhere bwa boshi, n'okulolereza oku magula ga ngasi muguma. ²² Nta mizimya changwa echichu ch'olufu, ahabakachibisha bala bajir'amabi. ²³ Nyamuzinda arhaherhe kashanji kanene kw'okulolereza, mpu ly'achira omuntu olubanja haguma naye; ²⁴ Avunangula abaherhe obuhashe buzira kudosebwa, n'okuheba abandi ahali habo; ²⁵ Bulala ayinji emirimo yabo. Anabahindamul'obudufu, n'oku ba vunyongola; ²⁶ Anashurha nk'ababi, embere z'olubaga loshi. ²⁷ Bamunyindamukira, n'okuleka enjira zabo zoshi, ²⁸ balerhera Nyamuzinda omulenge gw'omukene, Bamuyunvisa bwinja emilenge y'ababi. ²⁹ Nka kahana okuhumuka, nde njimalis'entambala? Nka kabisha amalanga gage, nde njiwamubona? Anajira kuguma libe shanja liguma, abe muntu muguma, ³⁰ Buzinda omubi arhabarhegekaga chiro, arhanabaga murhego oku bantu. ³¹ Bulala korhabwiraga Nyamuzinda: Nali hanirwe, nji ntanajira echaha; ³² Onyereke ebi ntabona; Nk'aba najirire ebibi, nji ntanachibijira? ³³ K'oku bwawe, Nyamuzinda nja kuchira olubanja? W'oyo walahire, nd'ochishoga, aliko arhali nyono; eby'oyinji, orhubwire oku byo! ³⁴ Abalume bashinganyanya nji baba n'oburhegesi bwani, n'omurhonzi onyunviriza anajira kuguma nani. ³⁵ Yubu ashambala buzira bwenge, n'emyazi yage yabula okuli. ³⁶ Agendekera okulumwo, bulala yashuza kulala ababi bajira! ³⁷ Bulala yayushula amabi kw'ebyaha bihyahya; n'okushurha omu fune omu charagati cherhu, n'okuluza emyasi yage enyanya za Nyamuzinda.