¹ Na ntyo kandi, Yubu, ayunviriza emyazi yani, arheg'okurhwiri oku myazi yani yoshi! ² Lolaga, n'amabumbula obunu, n'olulimi lwani lwamarhenga ebiraka. ³ Haguma n'enjira ekwirire y'omurhima kuna shambala, omu kuli kushinganene kw'obunu bwani bw'aderha: ⁴ Muka gwa Nyamuzinda gw'ogwademaga, n'omuka gw'Ogala-Byoshi gumpereza akalamo. ⁵ Akaba wakagala, kunshuza, wanashuza nani, yumanga embere zani, oderhe okwawe omenyere! ⁶ Embere za Nyamuzinda ndi kuguma nawe, nani nalemagwa kuguma nawe nka bishoho; ⁷ Na ntyo abashombanyi bani bamenye bakushoshoba, n'okuzidoha kwani nji kurhakuyosaga. ⁸ Aliko wabwira amarhwire gani, Nayunva omulenge gw'emyazi yawe: ⁹ Ndi mweru-kweru, nyono nta chaha mperhe, ndi mwimana, na ntabubi mperhe oku nyono. ¹⁰ Na Nyamuzinda abwene oku ndi wamujinya, anjira nka mushombanyi wage; ¹¹ Lyaheba amagulu gani omu byuma, n'okuyinja alolereza ngasi hoshi ndi nagera. ¹² Nji na kushuza okw'ebyola oyagire, bulala Nyamuzinda aba mukulu kulush'omuntu. ¹³ Kolonzeze okujira obuhaka haguma naye, bulala ntacho akubwirire oku bijiro byage? ¹⁴ Nyamuzinda anashambala nantyo, changwa oku bundi bulyo, changwa oku wundi, arhanalola chiro okw'abilanga. ¹⁵ Anashambala omu bilorho, omu bilorho by'omu budufu, amango abantu bali omu kachubiro kero. ¹⁶ Nantyo anabahereza amahwe gw'okubadirhamanya bachilange n'okuheb'echifundo oku nyigirizo zage, ¹⁷ Buzinda omuntu arhalemaga ajira amabi n'okumuhanza okuchibona kwage, ¹⁸ Aha buzinda omurhima gwage gurhajaga omuchiriba n'akalamo kage kamenye kahera omu by'okuyirha. ¹⁹ Okulumwa kunayigiriza omuntu omu chiryamo chage, amango entambala endekere oku dirhimanya amavuha gage. ²⁰ Nantyo analya omugati gurhalokere, n'ebiryo byalema byamushologosa. ²¹ Omubiri gwage yigwayuma n'okuhera, amavuha gage garhabonekaga g'akala gali busha. ²² Omuka gwage guyerekere ekuzimu, n'akalamu kage kayerekere ewa lufu. ²³ Aliko nka rhwakabona Malayika ohuna muguma, omu bantu chihumbi owabwira omuntu enjira akwanene okukulikira, ²⁴ Nyamuzinda omu kumulolereza n'oku bwira Malayika: Omushwekule, oku buzinda arhayandagalaga omu kuzimu; na bwene omuntu w'okugula! ²⁵ N'omubiri gwage gwashubiri ba gudorho nka mwaka gwage gwa burhanzi, ashubiba nka siku zage z'obusole. ²⁶ Ayerekez'amahuno gage emwa Nyamuzinda; Na Nyamuzinda omuyumviriza, omuyerekez'amalanga mage haguma n'obushagaluke, n'oku muyerek'obushinganyanya bwage. ²⁷ Ayimpa embere z'abantu n'okuderha: Nalijirire echaha, nagera enyuma y'okuli, nta nahanagwa nk'okunali shinganene; ²⁸ Nyamuzinda achugwire omuka gwani mpu gurha jaga ekuzimu, n'akalamo kani Kagalihe omu buche! ²⁹ Lolaga byoshi Nyamuzinda ajirire, kali kabiri, kali kasharhu, haguma n'omuntu, ³⁰ mpu ly'akula omuka gwage ewa lufu, mpu ly'akolezeza obuche oku balamire. ³¹ Orhenge okurhwiri, Yubu, onyunvirize, osire, nji nkala naderha! ³² Akaba oherhe emyazi w'aderha, onshuze! Oderhe, bulala nasima nyerekane obushinganyanya bwawe. ³³ Akaba ntacho oherhe waderha, onyunvirize! Osire, nji nakuyigiriza oburhonzi.