¹ Abo bantu basharhu barhachishubiraga bashuza Yubu, bulala aherhe achibona nka mushinganyanya. ² Lero oburhe bunene bwagwarha Elihu, mwene Barakeli w'e Buzi, w'omu lubaga lwa Rama. Oburhe bwage bwaba enyanya za Yubu, bulala alemaga achigamba oku ali mushinganyanya embere za Nyamuzinda. ³ N'oburhe bwage enyanya za bera bage basharhu, bulala ntacho aliherhe ashuza n'okuhandi basidaka Yubu. ⁴ Kunola bali kulire kumulusha, Elihu amuyunviriza kuhika omu kachanji baderhesa Yubu. ⁵ Aliko, lolaga ntacho bashuzize omu bunu bwabo bantu basharhu, Elihu oburhe bwajak'obwindi. ⁶ Na Elihu, mwene Barakeli w'e Buzi, arhola omwazi aderha: Ndi musole, nenyu muli bashaja; che chirhumire nayoboha, n'okukabagana enyanya zenyu n'okulonza okubamenyesa enyorha yani. ⁷ Nakazagi derha nyenine: Esiku nji z'aderha, obunene bw'emyaka nji bwa yigiriza oburhimanya. ⁸ Aliko oku binali, omu muntu, guba muka, omuka gw'Ogala-Byoshi, ye hana obwenge; ⁹ Arhali obunene bw'emyaka bw'obuhana oburhimanya, chiro arhanali obushaja bwakarhuma wagali ch'olubanja. ¹⁰ Lolaga echirhumire n'aderha : Onyunvirize! Nani, nji nakushambalira enkengero zani. ¹¹ Naliyunvirhe obuzinda bw'emyazi yenyu, nanakulikira enkengero zenyu, olubanja lw'emyazi ya Yubu. ¹² Nalibahere oku naba kwoshi; na lolaga, oku ntaye mu mwabo wamuyazize, ntaye walahire emyazi yage. ¹³ Na ntakuderha ntyo: Omu yewe rhwabwene oburhimanya; Nyamuzinda yenine ye wakamugala, s'arhali omuntu! ¹⁴ Arhagerera emunda ndi: nantyo nji namushubiza omu yindi myazi. ¹⁵ Bayuboha, barhamushuzaga! Baliherhe emyazi erhayunvikene. ¹⁶ Nayunva oku emyazi yabwo ya hwere bahwekerera, basira na ntakushubiza eyindi myazi. ¹⁷ Oku lwani, nabashuza nani ntyo, na babwira nani ebi nkengerere. ¹⁸ Bulala mbumbir'emyazi, n'omurhima gwani yigwa fukunya fukunya omu nyono; ¹⁹ Omunda yani muli nk'amavu gachibabe, nka mikenzi mihyahya yalinga bereka. ²⁰ Nji na derha mpu yi nyise bwinja, nji na bumbula obunu bwani nji nanashuza. ²¹ Nji nta yubaha chiro n'omuntu muguma, na ntaye nji n'arhebeka. ²² Bulala ntenji kurhebekana: Lulema wani nja nyumusa bwinja duba.