¹ Najira echihango haguma n'amesho gani, nta nalekaga okulolereza echikumi. ² Luhembo luchi Nyamuzinda ambikire omu chanya? Kashambala kachi Ogala-Byoshi arhurhumire omu mpingu? ³ Obuhanya burhaba oku mubi, n'obuhanya bwa balala bajira amabi? ⁴ Nyamuzinda ka rhamenyere enjira zani? ka rhali aganja amagulu gani goshi? ⁵ Ka nkaba nalambagire omu njira y'obubeshi, akaba okugulu kwani kwa libirhir'obushambo, ⁶ Nyamuzinda andege oku mulengo gushinganyanya, njanamenya oku ndi mweru-kweru! ⁷ Akaba okugulu kwani kwarhengere omu njira ekwirire, akaba omurhima gwani gukulikire amesho gani, akaba hali ebyambihize omu fune zani, ⁸ Nji ntwere n'owindi njashalule, n'abanjukulu bani nji bashugulwe! ⁹ Akaba omurhima gwani yigwa shambazwa n'omukazi, akaba mperhe nayunjayunja oku lunvi lw'omwalungwe wani, ¹⁰ Mukani njahindamulire olusho oku wundi, n'abandi banamugayaguza! ¹¹ Bulala kuli kuyirha, ebiri ntyo bi bahana mw'abazuzi; ¹² Nguli muliro gwa kuyosa kuhika ekizimu, n'okubihya obugale bwani boshi. ¹³ Akaba nabonerere okuli kw'omwambali wani changwa omwambalikazi wani amango barhaliyunvikene haguma nani, ¹⁴ Ngurhe njirage, Amango Nyamuzinda amayumuka? Ngurhe nshubizage, amango amampana? ¹⁵ Oyula wandemaga omunda ya nyama nk'arhali ye wamulemaga? Oyola Nyamuzinda nk'arhali y'ewa rhujiraga omu nda ya nyama? ¹⁶ Akaba nalahirire abakene ebi bampemaga, akaba najirire amesho gw'omukana gaheneka, ¹⁷ Akaba nalire ebiryo byani nyenine, buzira okuhereza efubi ebyage, ¹⁸ Nyono nabaliherhe kurhenga obusole bwani buyumangire nk'eshe, nyono kurhenga oku burhwa kwani nali rhaber'omukana; ¹⁹ Akaba nali bwene omuhanya obulir'emishangi, n'omushalishali orhaherhe ebya chishukira, ²⁰ Buzira kubandwa obwanga bwage bw'okungisha, buzira kubona echuka ch'amoya g'ebibuzi byani; ²¹ Akaba na kakula efune oku fubi, bulala yinayunvamperhe esimikiro omu bazuzi; ²² Echirhugo chani chihaguke ah'amashomekero, n'okuboko kwani kurhoge n'okuvunika! ²³ Bulala obuhanya bwa Nyamuzinda bwananti bukirako, na ntacho na kachijira embere z'obukulu bwage. ²⁴ Akaba nahebere omu horo omunihiro gwani, akaba na kabwira ehoro: We munihiro gwani; ²⁵ Akaba nakachisimisa n'obunene bw'ebintu byani, okuluga kw'obugale bwani nachichiraga; ²⁶ Akaba naliherhe na lola ezuba amango yilyakola, omwezi amango yigwalambagira nkw'oku binali, ²⁷ N'akaba omurhima gwani gwachilekere okuj'omububi bwibisho, akaba efune yani yali chiheber'oku bunu bwani; ²⁸ Kandi kuli kuyirha kushinganene kuhanwe n'abazuzi, na nahakanire Nyamuzinda wenyanya! ²⁹ Akaba nakashagalukire obuhanya bw'omushombanyi wani, akaba nabalere n'okusima obuhanya bwa muhikire, ³⁰ Nyono bihazizwe olulimi lwani okujir'echaha, n'okuhuna olufu lwage haguma n'obuhanya; ³¹ Akaba abantu b'omu hema lyani barha derhaga : Muntu ohe orhaliyugurhire enyama zage? ³² Akaba omuhisi aliler'embuga budufu, akaba ntalichigwire olunvi lwani oku mulambagizi; ³³ Akaba, kw'aba bantu, nalibishire amabi gani, n'okubikirira obubi omu murhima gwani, ³⁴ bulala n'aliherhe obuba bw'ebigusho, bulala naliyobohere amesheka g'emilala, gampebag'eburhambi na ntakuchigerer'olunvi lwani. ³⁵ Yoo! Nde wakambonera omuntu wayumviriza? Lolaga ebyandanganyaga byoshi bishwekerwe: Ogala-Byoshi anshuze! Yi nji wampereza olubanja luyandikirwe okw'oyula ondwisa? ³⁶ Nji naheka omwandiko gwage oku birhugo byani, nji nagushwekera oku malanga gani nka chishema; ³⁷ Nji namushambalira byoshi bya magulu gani, nji namushegerera nka muluzi. ³⁸ Akaba obudaka bwani bwakampeka lubanja, n'emigungiro erhoze emiziga; ³⁹ Akaba na kalya emyaka buzira kugula, n'akaba nagayisiz'omurhima gw'abigiriza ba mira; ⁴⁰ Akul'emishaki mw'ahola hali engano, n'emisihe hali h'obuku! Buzinda bw'emyazi ya Yubu.