¹ Nantyo! Ndi mwenge kulusha emisole yoshi, balala nakazagi kubonerera oku heba badarha haguma na banyakabwa b'echigusho chani. ² Aliko biri bichi, emisi y'efune zabwo ya nkolere? Barhaliherhe gurhe njibahika oku bushanja. ³ Bayumire enyanya y'okubulirwa kurhuma n'eshali, babunga omu hantu habi, kurhega mira arhaberagwa n'okuba mpinga; ⁴ Yibacha oku mirhi ebirhi by'elubala, barhaherhe mugati arhali muzi gw'emimerera. ⁵ Bali babalibirhako omu charagati ch'abantu, n'okuyamira hofi nabo nka bishambo. ⁶ Balilamire omu lubanda rhudekerere, omu lukunda n'omu mwina gw'amabale; ⁷ Bakunira omu bulambo, bachilunda eshishi w'amabale. ⁸ Bali babusha na bakugayisa, ba bakula omu chihugo. ⁹ Nantyo, ndi chintu ch'enyimpo zabwo, ndi mugani gwabo. ¹⁰ Banalema banshologosa, bahindamuka, bachir'omu mesho. ¹¹ Ntacho bachibikira, n'oku mbonerera, bankabulira olumangiro loshi embere zani. ¹² Obola buhanya bwayumuka emalyo gani n'okushunika amagulu, bazibya enjira zani enyanya y'obuhanya bwani; ¹³ Babihya enjira yani n'oku kola kuheza kwani, n'omubwo ntaye wayinjire ntabala; ¹⁴ Bayinja nk'omu chirhule chizibuzibu, bagenda duba omu kuyirhana. ¹⁵ Obuhanya bwanyikalire; Obukenge bwani bwa hekwa nka muhusi, obulangalire bwani bwagera nka lwakungu. ¹⁶ Nantyo, omurhima gwani gulembere, esiku z'amaganya yi zandibuza. ¹⁷ Obudufu yi bwa ntula n'oku nyega amavuha, n'amalumwa yi gandya buzira kuhumuka. ¹⁸ Kugerer'amabi oku mushangi gwani gwa maheza ebara lyago, gukala kunanirire oku mubiri gwani nka chishema. ¹⁹ Nyamuzinda ankweba omu bishoho, na shusha akachulo n'oluvu. ²⁰ Mperhe nakuhamagala, orhananshuza chiro; nyumangire embere zawe, wamandola n'elisho lyawe. ²¹ Wahindamukire munizi oku nyono, efune yawe ye misi eherhe ya ndwisa. ²² Wa mbarhula, wambalaza omu chanya w'omuhusi, wansiza nka lwamo lwa mulaba. ²³ Bulala, nkola mbimenyere, yiwanyerekeza ewa lufu, Elala munda abantu boshi bashimanana. ²⁴ Aliko olala waherha arhalambul'efune zage? Olala oli omu buhanya yewe arhakalonza ch'arhabalwa? ²⁵ Ntaherhe miziga okw'orhaherhe? Omurhima gwani gurhaherh'obonjo oku mugaraganda? ²⁶ Nalemaga nalinga obushagaluke, n'obuhanya bwanayinja; nalinihir'obuche, n'emizimya yayinja. ²⁷ Ebigabi by'omubiri gwani yibyahya buzira kuleka, esiku z'obuhanya za nsomezwa. ²⁸ Yi na lambangira mwiragula, aliko arhali enyanya w'ezuba lirhumire; yina yumanga omu chigusho ch'abantu, na nayama. ²⁹ Nahindamukire mwene wabo Banyambwe, muherekeza wakururu. ³⁰ Omubiri gwani gwayiragwire n'okurhonga, amavuha gani gahire n'okuyuma. ³¹ Eholerere lyani lirhali chikoleso ch'emishibo, n'omulizi gwani nji gwalema gwalerh'emilenge y'okulaka.