¹ Yubu arhola omwazi guhyahya oku bundi bulyo aderha: ² Oh! Nde wakashubiza aha nali omu myezi ya mira, Nk'omu siku Nyamuzinda alindagire. ³ Amango alemaga akoleza etara lyage oku rhwe lyani, n'obulangashane bwage bwanyereka enjira omu mizimya. ⁴ Ntali na bona nka siku nalirimwo z'obugale bwani, amango Nyamuzinda abaga mwira oku nju yani, ⁵ Amango Ogala-Byoshi alichiriri haguma nani, n'abana bani bazungulukire; ⁶ Amango amagula gani galemaga ga shukwa omu mpyuhyu n'emabale lilandire hofi nani shoko z'amavurha! ⁷ Nka Nahulukaga mpu naja omu lunvi lw'echishagala, n'akaba nachirheganyaga omu hantu ha ntebe nguma, ⁸ Abana bemisole balemaga bachikula oku bali haguma nani, abashanja banayumuka n'okuyumanga bwinja. ⁹ Abarhambo banaleka emyazi yabo, banaheba efune oku bunu bwabo; ¹⁰ Omulenge gwa banahano gwa sira, n'olulimi lwabo lwashwekerwa oku mishaya. ¹¹ Oku rhwiri kwanyumvirizaga kwambwira bushagaluke, n'elisho lyambonaga lya lema lya mpamiriziza; ¹² Bulala nalemaga na rhabala omukene orhaherhe echarhabalwa, n'efubi erhaherhe ch'arhabalwa. ¹³ Obwanga bw'omubi emunda ndi burhenga; nayunjuza obushagaluke omu murhima gw'omukana. ¹⁴ Na lema nayambala obushinganyanya n'okubukolesa nka mishangi, naliherhe enjira yani y'okuli kw'okurhambikako n'okubushwekerako. ¹⁵ Naliri lisho ly'omuhurha n'okugulu kw'echirema. ¹⁶ Naliri eshe wa bakene, na kazagi lolerez'olubanja lw'omuhisi; ¹⁷ Nalemaga na shurha emishaya y'omubi, n'okuhohola amenyo gabo omu bunu. ¹⁸ Nantyo na derha: Nji nafira omu logo lwani, n'esiku zani nji zaba zinene nkamushenyi; ¹⁹ Amenji nji gahika omu mizi, n'olume l'obudufu nji lwagera oku marhabi gani. ²⁰ Erenge lyani nji lyaba lihyahya ngasimango, n'omuherho gwani guli omu fune zani gukalihire. ²¹ Balemaga banyuviriza n'okuyorha bandigire, n'okusira embere za mahano gani. ²² Enyuma z'okuderha kwani, ntaye wa lahira, n'omwazi gwani gwali gwinja omu kuguyunviriza; ²³ Balemaga banihira nka nvula, balemaga babumbul'obunu nka nvula ya chanda. ²⁴ Nabashekesaga amango bahezaga obushiru, barhakagala kuhiga obuzigire embere za malanga gani. ²⁵ Nalisimire okuj'emunda bali, naliyikere okurhwe lyage; naliri nka mwami omu charagati ch'echigusho, nka murhulirizi wabali omu mishibo.