¹ Yubu arhola omwazi aderha: ² Muyumve, muyumve emyazi yani, mumpereze oku rhulera. ³ Muleke ntange derha, mbashigirire; na, hano mba na maderha, wakaja wanshekera. ⁴ Ka murhasimire omuntu wachirhegeka oku lubanja lwage? Na chirumire omurhima gwani gurhali gwa kubegerera? ⁵ Mundole, munasomerwe, muhire efune oku bunu. ⁶ Amango yinabikengera, ebyola byananyobohesa, Nyeshi omusisi gwanangeramwo. ⁷ Chirhuma ababi balama? Chirhuma bashaja banagwerh'emisi minene? ⁸ Eburha lyabo lyana yushuka haguma nabo omu mango gabo, n'abanjukulu babwo banayushuka omu mesho gabo, ⁹ Omunju zabo ziri mw'omurhula, na nta buba baherhe; akarhi ka Nyamuzinda karhaka bashurha. ¹⁰ Empanzi zabo ngasi mango eri kubusa yizanabusa, n'enkavu zabo zanayima n'okuburha bwinja zirhanamoma. ¹¹ Banalek'abana babo balibirhe nka birhungano, n'abana banarhola obulye bwabo. ¹² Yibayimpa oku mulenge g'okushuurha engoma n'akasayo, n'oku chisimisa oku mulenge go mulizi. ¹³ Yiba geza esiku zabo omu bushagaluke, na kandi yibayandagala liguma liguma okusi z'olufu. ¹⁴ Nabwo balemaga babwira Nyamuzinda: Ochikule ku rhwabo; rhurhalonzeze oku menya enjira zawe. ¹⁵ Ali nde Ogola- Byoshi, yi nerhu rhugale ku mukolera? Bichi rhwayunguka yirhumuyerekeza amahuno gerhu? ¹⁶ Bichi lero! Rhurhaherhe omurhula? Hale nani oku hano lyo babi! ¹⁷ Aliko oku yinja kwabo ngasi mango etara lyabo lyazima, obuhanya bujirike okubwo, Na Nyamuzinda abagabire echigabi chabo omu burhe bwage, ¹⁸ Babe nka bukere bwahekwa n'omuhusi, nka chifundo cha balazwa na kasururu. ¹⁹ Ka Nyamuzinda abikire abana obuhanya bwa b'eshe? Aliko olala Nyamuzinda ashinganene oku hana, mpu ya buyunva bwinja. ²⁰ Olala oshinganene okubona yenine obuhanya bwage, olala oshinganene okunywa oburhe bw'Ogala-Byoshi. ²¹ Bulala, bichi enju yage yachimujirira hano eba enyuma zage, amango oluganjo lw'emyezi yage yahwa? ²² Ka Nyamuzinda yi nji bahereza enyigiriz, yewe ye rhegeka abazimu bw'omuchanya? ²³ Muguma afa enyanya z'abandi, oku murhula n'okuchishinga, ²⁴ Amabunda gage gayunjwire mashushi n'omwokwa gw'amavuha gage gayunjwire magizi; ²⁵ Owindi afa, n'omungo gumuli emurhima, ebwa kuba nta mango naye abwene oku ragi. ²⁶ Bombi balyama omu kachulo, ku bali babiri boshi bahindamuka chilumbo ch'emivunyu. ²⁷ Maeyere bwinja enkengero zenyu, N'emanja zichi muli mwaderhera enyanya zani. ²⁸ Mwamaderha: Gahe enju y'omuntu w'emisi? Gahe enju ya babi eri balamire mwo? ²⁹ Aliko gurhe! Murha dosaga ababalama, n'okulonza mumenye bichi banajira? ³⁰ Olusiku lw'obuhanya, omubi anachingirwa; olusiku lw'oburhe, anafulumuka. ³¹ Nde wakakaliha oku borhere bwage? N'oku muyereka ebyajirire? ³² Ahekwa omushina, anasisimuka kandi omu shinda yage. ³³ Ebironko by'omulubanda bilembere; n'abala boshi b'enyuma zage nji bakulikira eyo njira nguma; Nka kulala chigusho chinene chamukulikire mira. ³⁴ Chirhumire mwarhuliriza na busha? Omu mashuzo genyu galiyorhe bwenge busha.