¹ Sofari w'e Namati arhola omwazi aderha: ² Enkengero zani za manzeza oku shuza, n'okuba duba duba kwani kurhaka rhuma kwayenera. ³ Nayunvirhe amahano goshi ga ntindibwize; n'okuyisa kw'obwenge bwani nji bwampereza oku chihola. ⁴ Kw'orhenji ku, amango goshi, kurhenga omuntu ahebwa kuno gulu, ⁵ Oku obukuzwe bw'ababi buba bugeke, n'oku obushagaluke kw'omuntu mubi kwa kashanji kageke? ⁶ Amango nj'alehuka kugera omu chanya, n'erhwe lyage njilihume oku bichu, ⁷ Nj'ahera esiku zoshi nka mazi gage, n'abamubonaga nji baderha:mpu ngahe ajire? ⁸ Nj'anabalala nka chilorho, na nta kuchi babonako chiro; nj'anahera nka chilorho ch'omu budufu; ⁹ Elisho lyamubonaga nji lirha chimubona chiro, n'ahali lamire nji murhachi mulangira ho chiro. ¹⁰ Bagala bage nji barhangulwa n'abakene, n'efune zage nji za galula byoshi arholaga n'ebikanyi. ¹¹ Obushibirizi bw'obusole, bwali yunjwire ebigabi byabo, nji bya chiryamira haguma naye omu kachulo. ¹² Amabi gali kwirire omu bunu bwage, ali bubishire eshishi w'olulimi lwage, ¹³ Alemaga abirya buzirak kubileka, alibigwarhire omu charagati k'omu mwage; ¹⁴ Aliko ebiryo byage nji bya hindamuka omu bula bwage, nji byaba omu mubiri gwage nka menyo ga njoka. ¹⁵ Amirire obugale, nj'abushala; Nyamuzinda nja buhiga omu nda yage. ¹⁶ Anunugusa amenyo g'enjoka, olulimi lw'enjoka nji lwa muyirha. ¹⁷ Nj'arhachihumuka omu kulola kwage oku nyinji, oku milaba, oku lwinji lunene lw'obuchi na marha. ¹⁸ Nj'agalula eby'abaga abwene, na ntacho nj'ayunguka chiro; nj'agalula byoshi arholere, na ntacho bya mujirira. ¹⁹ Bulala abonerere, n'oku kulibisy'abakene, ashanda enju na nta kushubi kuzilumula. ²⁰ Bulala echirhule ch'amesho chirhakachibona; Aliko nj'arhachungula ebyali herhe by'akamaro. ²¹ Ntacho njichamufuma oku byamiraga; Aliko okwaba alamire kurhakalegama. ²² Omu charagati ch'ebikulo nj'aba omu buhanya; efune za buganda boshi njiza muyumukirako. ²³ Lolaga, mpu ayunjuza enda, Nyamuzinda nj'amurhumira omuliro g'oburhe bwage, nj'amuyugusa n'envula y'echimenyiso. ²⁴ Nj'kafuma emiherho y'ebyuma, Akerere k'eshaba nji kamurhulangula. ²⁵ Nj'akula echimenyiso oku mubiri gwage, esasi zamarhenga n'omubulla bwage, agwarhirwe omu buhanya bw'olufu. ²⁶ Ngasi ndunduli yalibikire obugale bwabwo; nji bwayoswa n'omuliro nji gurhakolezwa na muntu, n'olala nji wayorha omu nju yage nja nahindamuka luvu. ²⁷ Emalunga nji gamenyesa obubi bwago, n'egulu nji lyamamuhindamukira. ²⁸ Obunguke bw'enju yage nji bwahekwa, nji bwahera oku lusiku lw'oburhe bwa Nyamuzinda. ²⁹ Lw'oluhembo Nyamuzinda abikire omubi, k'akola k'akashambala Nyamuzinda omurheganyize.