¹ Yubu arhola omwazi aderha: ² Kuhika mango nchi mwaleka oku lumya omurhima gwani, n'okundabarha n'emyazi yenyu? ³ Lolaga okubukola bwa kali kumi obola mwanjachira; Murhayunva shonyi oku ndibuza ntya? ⁴ Akaba kubinali najirire echaha, okola kuhabuka kwani nyenine kundolere. ⁵ Mumenyere mpu mwanjira oku mulonzeze? Ka muli mwalonza okuyerekana oku na yagire? ⁶ Mumenye kandi oku Nyamuzinda ye nkulikire, n'okunshukira nakahungo kage. ⁷ Lolaga, mperhe nayama enyanya z'okubonererwa, na ntaye w'oku nshuza; Yinalonza okuli, na nta kuli! ⁸ Anshwekere loshi, ntakagala kugera; ayunjuz'emizimya omu njira zani. ⁹ Anyegere erenge lyani, ampogwere echishema omu rhwe. ¹⁰ Anyega enyunda zoshi, na chigendera; akulikire obulangalire bwani nka murhi. ¹¹ Analerha n'oburhe bwage enyanya zani, ananjira kubi nka muguma wabashombanyi bage. ¹² Engabo zage zamanyinja zoshi chaligumiza, zamacha enjira kuhika emunda ndi, zajira echihandiro ebwa nju yani. ¹³ Ankula ku bene berhu, na bera bani banyaka; ¹⁴ Abalungwe bani bandekere, n'abera bani banyibirire. ¹⁵ Nabere muhisi embere z'abambali bani n'abambalikazi bani, n'abambali bani baherhe bandola nka muntu warhenga. ¹⁶ Yina hamagala omukozi wani, arhashuza; yina mushigirira n'obunu bwani, na ntacho. ¹⁷ Mukani ayakire akabayo kw'omuka gwani, n'olubaja lwani oku bana bani nchiburhira. ¹⁸ Abana nabo baherhe bangayaguza; eri nakayimanga, banarhondera banshekera. ¹⁹ Abanaliherhe nanihira banjirire masheka, aba nalisimire bahindamukire bashombanyi bani. ²⁰ Amavuha gani gakola gananirire okuluhu n'oku minyofu yani; nkala nyorhere okuluhu lwa menyo gani. ²¹ Mumbalire, mumbere obonjo, mwabwo, bera bani! Bulala okuboko kwa Nyamuzinda kwa nshukire. ²² Chirhumire munkulikire nka kula Nyamuzinda ankulikire, chirhumire mwayerekana oku omubiri gwani gurhashinganene? ²³ Ewa! Yi nalonza emyazi yani eyandikikwe, eyandike omu chitabu; ²⁴ Yinalonza omungwara gw'echuma haguma n'obwino bibereho ngasi siku n'amango omu bale. ²⁵ Aliko menyere oku omurhabazi wani aliho, njanachiyimanga buzinda oku gulu. ²⁶ Amango oluhu lwani nji lwabiha, nja yumanga; amango naba ntaherhe mubiri, jinabona Nyamuzinda. ²⁷ Nji namubona, njaba wa kamaro kani; amesho gani nji gamubona, arhali ga wundi; Omurhima gwani yigwa mulinga. ²⁸ Amango muderha mpu: Chirhumire rhumukulikirenye? Bulala okuli kwani nji kwamenyikana. ²⁹ Muchilangage oku kere mwenine: Amabi oku kere gali madarhi! Mumenye oku hali olubanja.