¹ Yubu arhola omwazi aderha: ² Nanyunva ngasi mango emyazi eri nk'eyila; mweshi muli barhulirizi bakomere. ³ Mangochi mwamala eyola myazi yenyu yahehuka nka muhusi? Chirhumire muherhe ebya bahabusa omu mashuzo genyu? ⁴ Nani ntyo, nalikwanene oku derha nka mwabo, nka mwaliri oku lunda lwani: Njina babwira emyazi, njina dunda erhwe enyanya zenyu, ⁵ Njina barhuliriza oku bunu bwani, njina dundaganya obunu omu kubarhuliriza. ⁶ Nka derhere, amalumwa gani garhakasira chiro, nka namasira, nka nsirire, omu bichi gakaja galembuha? ⁷ Nantyo, nkaba! gakala gamalire, wamalire omulala gwani; ⁸ Wangwarhire nani, mpu nchi hamirizize; okuyonda kwani kwa yushukire, n'okuj'ampeka embere zawe. ⁹ Yambwerangula n'oku nkulikiranya omu kajinyajinya kage, anaherhe ampekenyer'amenyo, anakulikiranya n'okuntula omu kundolereza. ¹⁰ Banabumbul'obune mpu bansheshunyule, banampangala n'okushurha ebigalo omu marhama, boshi banachizingira ku nyono. ¹¹ Nyamuzinda ampanire omu babi, amandekerera omu mabako g'abanizi b'abantu. ¹² Naliherhe omurhula, ana nchugurha, angwarhira oku gosi n'okunvunagula, ana nkulula nka murhego. ¹³ Orhurhego rhwage rhuzungulukire enyunda zoshi; anantul'esiku buzira bwonjo, n'okusheshera endulo yani oku daho. ¹⁴ Anjirire nguli oku nguli, anambumbiriza nka muntu wantambala. ¹⁵ Oku mubiri gwani na hangire kw'echigunira; n'erhwe lyani nalifunda omu kachulo. ¹⁶ Okulaka kwa bihya amalanga gani; echichu ch'olufu chiri oku ngohye zani. ¹⁷ Namenyere oku ntachibi najirire, n'amahuno gani galiri mweru kweru esiku zoshi. ¹⁸ Omenye wakashukira eshagama yani, w'oyo daho, n'emilenge yani yalema yagenda kuleka! ¹⁹ Nantyo kandi, omuhamirizi wani ali omu mpingu, Omuhamirizi wani ali omu hantu h'enyanya. ²⁰ Aberha bani basharha nani; Nyamuzinda yimbayekere haguma n'emiziga. ²¹ Ka wakahereza omuntu okuli kulusha Nyamuzinda, na mwene omuntu kulusha bera bage! ²² Bulala oluganjo lw'emyaka yani lwamager'obuzinda, nji nachijira mwela njira chiro nta kanachiyigaluka mwo.