¹ Elifazi w'e Temani arhola omwazi aderha: ² K'omurhimanya agenda ashuza emyazi yahehuka nka mpusi? N'okubumba enda n'empusi y'ebushoshokero bw'ezuba? ³ N'oku myazi ya busha abusha ya kachiderhako? noku myazi erhaherhe kamaro? ⁴ W'oyo, wamashandaza obuba bwa Nyamuzinda, wamashandula ngasi chigusho chibi embere za Nyamuzinda. ⁵ Obubi bwawe bwarhegekw'obunu bwawe, n'okuderha oluderho lw'abantu benge. ⁶ Arhali nyono, chi bunu bwawe bw'obuku chirire olubanja. Bunu bwawe bw'obukubeshuzize. ⁷ Kw'oli mwambere oku burhwa omu bantu? Ka waburhirhwe wa burhanzi embere w'orhurhondo? ⁸ K'okala oyunvirhe omwazi gwa Nyamuzinda? Ka wenine okala ochihere oburhimanya? ⁹ Bichi oyinji rhurhenji? Bichi oba omenyere rhukabihaba? ¹⁰ Nerhu rhugwerhe omu kagarhi kerhu abakulu b'emvi, abashaja, bachire b'esiku kulusha isho. ¹¹ Ochigwarhire kantu kageke k'oburhulirize bwa Nyamuzinda, n'emyazi y'obuholo eyunvikana enyanya zawe? ¹² Ngah'omurhima gwawe gukuyigiriziza, na by'ebichi ebila amesho gawe yigajira? ¹³ Gurhe! Enyanya za Nyamuzinda y'okola wahindamula oburhe bwawe n'obunu bwawe bwanaderha emyazi eri nkeyi! ¹⁴ Omuntu biri bichi, mpw'abe mweru-kweru? Olala waburhagwa n'omukazi mpu naye aba mushinganyanya? ¹⁵ Akaba Nyamuzinda arhajira mulangaliro omu bachesibwa bage, akaba n'empingu zirhaba mweru-kweru omu mesho gage, ¹⁶ Gurhe byakaba oku chilemwa chikwire n'echikali, omuntu onanywa amabi nka menji! ¹⁷ Nkala na kubwira, oyumve! Nakuganiza oku bina bwene, ¹⁸ eby'abanya bwenge bakazagi nyigiriza, ebi banyerekere, bayigirizwaga na b'eshe. ¹⁹ Balala baliri banina echihugo, n'omubo nta muhisi waliziba omu charagati chabo. ²⁰ Esiku z'omubi zoshi ziba za buhanya, n'emyaka yoshi eba ya kugabw'omubi. ²¹ Omulenge gw'obuba gunayunvikana oku marhwiri gabo; amango g'omurhula, omushombanyi achiheza yenine. ²² Arhanire oku fumw'omwizimya, anabona engorho y'oku murhera;. ²³ Analibirhira eyi n'eyi omukulonza omugati, ayinji okw'esiku z'omwizimya zi mulingire. ²⁴ Omusisi n'obuba byanamugwarha, byanamuyikaza nka mwami oli hofi okulwa; ²⁵ Bulala akulire efune ku Nyamuzinda, n'okulwisa Ogala- Byoshi, ²⁶ Abona akachanji kw'okulibirhira emunda ali n'orhwere emungongo n'empenzi zage. ²⁷ Ali gwerhe amalanga mage gaherhe gayaga mavurha, n'enda yage echiberere murhimbira; ²⁸ Alilamire omu bishagala bya bihire, n'enju zalekerwe, ziri hofi zikunduke nka mishaka. ²⁹ Arhakachi shubikugala, obugale bwage ntaho njibwachirhonderera, eburha lyage lirha ka chishandala oku gulu. ³⁰ Arhakachifumya oku mwizimya, engulumiro nji yayosa eburha lyage, na Nyamuzinda nja muyirha n'omuka gw'obunu bwage. ³¹ Akaba aherhe omukubagiro omu mabi, eri achirhebeka, bulala amabi njigaba luhembo lwage. ³² Nji hagerera okubuzinda bw'esiku zage, na marhabi gage nta mango gashuba kuba mabishi. ³³ Nja yorha nka muzabibu bakulire kw'amalehe mage gunali mubishi, nka muzeituni barhozez'obwaso bwago. ³⁴ Enju ye dyalya nji yahindamuka nguba, n'omuliro nji gwagulumisa echirhala ch'omuntu osima echituliro. ³⁵ Anaba bukule bw'amabi n'ikuburh'amabi, anakuziza amalehe omunda yage gana murhebeka.