¹ Omuntu aburhwa n'omukazi! akalamo kage kali kageke, kana yunjwire ntanya. ² Anaburhwa, anachibwa nka lwaso; anachibisha n'okuhera nka chichu. ³ Oli nkw'oyola yohenekera n'elisho lisibwire! n'oku njisa lubanja haguma nawe! ⁴ Gurhe echintu chibihire chakarhenga mw'omuntu okwirire? Ntaye wakarhengamo. ⁵ N'akaba esiku zage ziganjirwe, n'akaba waganjire emyezi yage, n'akaba wamuchirire olubibi arhakarhaluka, ⁶ Omukule kw'amesho, omuleke naye, akanaba n'obushagaluke bugeke nka muhinzi omalisa olusiku lwage. ⁷ Omurhi gujira obulangalire: Amango bamagucha, gwa nashuba kumera, gwanaburha emishogera; ⁸ Amango akaba emizi yagwo yayumire omudaho, n'amango n'echisisi chago chikola chirhondere chabola, ⁹ Eri gunayunva amenji, gwanashubimera gwanameza amarhabi nka murhi muhyahya. ¹⁰ Aliko omuntu yewe anafa, n'okuheza emisi yage; eri mwene omuntu arhenga mw'omuka, Ngahe anaja? ¹¹ Amenji g'enyanja ganayuma, n'amenji g'omu lwinji lunene ganashandala n'oku nayuma; ¹² Chi omuntu yewe halala alambukiraga ntako akachizuho chiro, arhakachizusa kugera amango empingu njizagaluka, arhakana chikula omuro lyage. ¹³ Oh! Nkaba wakalonza ombishe omu kuzimu, onambeze omola kuhika oburhe bwawe buhwe, onagalinjirira amango wenine washubinyibuka! ¹⁴ Akaba Omuntu anafa ka njakashubi lama, omu siku zani zoshi z'oburhindibuke nagendekera n'okuba n'omunihiro, kuhika amango byakahindamuka. ¹⁵ Njiwanahamagala ntya, nani njinanakushuza, njiwanashubi lolereza omulimo gw'efune zawe. ¹⁶ Aliko bunola oherhe waganja entambu z'amagulu gani, Ogwerhe walolereza ebyaha byani; ¹⁷ Amabi gani wagayubikire omu chiriba wahebakw'obulembo, n'okurhondera wakengera amabi gani goshi. ¹⁸ Entondo ya kunduka n'okuhera, n'ebale lyanahera aha lyaliri, ¹⁹ Ebale lyanashebwa n'amenji, n'egulu lyanahekwa n'omulaba;Nantyo kw'obihya obulangalire bw'omuntu. ²⁰ Wamamurhingamira, n'okuchigendera; njiwa namuhindamula, okubuzinda wanamugalula. ²¹ Abana bage njibaj'erenge, arhakanachimenya; bakabachinaguza, ntacho chakachi mubwira. ²² Amalumwa g'omubiri gwage gwonine ayunva, arhalakira wundi chi magala gage gonine.