¹ Bezaleli na Ohaliabu n'abandi balenga ba Nyamuzinda aher'obwenge n'obumanye bw'okujira ebintu byokukoles'oku bugashanire bwa hantu hachesibwa, bajira nk'oku Nyamuzinda abarhegekaga. ² Musa ahamagala Bezaleli, Oholiabu, n'abantu boshi baliri balenga byoshi Nahano ahag'obwenge, boshi omurhima gwabo gw'okurhabala okujir'emikolo mpu bayinyeneze. ³ Barhola embere za Musa entulo zoshi abana b'e Israeli bashololaga omu kujir'ehema lichesibwa. Ngasi sezi, banagenderer'oku lerhera Musa entulo z'okushonda kwabo. ⁴ Na ntyo abantu boshi babalenga, bakazagijir'eyo mirimo y'okuyumbak'ehema, barhengerera ngasi muguma omu mulimo bakazagi kola. ⁵ bagenda bwira Musa: Abantu balerhere bintu binene kulusha ebiwaderhaga by'okujir'emirimo Nahano arhegekaga. ⁶ Musa arhum'ebwa ngasi chilalo oku nta muntu, mulume eri mukazi, wachisholola n'ehema. Ntyo bahanza olubaga lurhachilerhaga chintu. ⁷ Ebintu bali bamasholola byankamalire, chiro byaluga, kulush'ebyankajire eyo mirimo. ⁸ Abantu boshi baliri balenga, bakolaga omulimo, bajira enju haguma nabirazi ekumi by'oboya bushushire emigozi y'omunigi, n'ebara lya ngasi lubero;babiyereka bamakerubi bakazagi kola. ⁹ Obule bwa ngasi chirazi zaliri ntambu makumyabiri na munane; n'obugali zaliri ntambu ene; obule bwaliri bunganangana bw'ebirazi byoshi. ¹⁰ Birazi birhano byalihangirwe haguma na bindi birhano haguma. ¹¹ Bahangir'ebishumiro kw'omugozi gw'omunigi oku chirazi chizinda oku burhambi bwacho, oku bulungiro burhanzi, babihangir'oku chirazi chirhanzi ch'obulungiro bwa kabiri. ¹² Ngasi chiguma chaja ku bishumiro makumi marhano oku buzinda bwa ngasi bulungiro, bashwekera haguma. ¹³ Bajira pengere makumi marhano z'ehoro, z'oku chugir'ago malungiro haguma gayumanyane. Enju yaba nguma. ¹⁴ Bajira birazi by'amoya g'empene, mpu bajir'ehema oku nju; bajira birazi ekumi na chiguma mubilala. ¹⁵ Obule bwa ngasi chirazi zaliri ntambu makumi masharhu, n'obugali zaliri ntambu ene; oluganjo lwaliri lunganangana oku byoshi ekumi na chiguma. ¹⁶ Bahangir'erhano haguma, na zindi ndarhu haguma. ¹⁷ Bahangir'ebishumiro makumi marhano oku burhambi bw'echirazi ch'obulungiro burhanzi, baheba na gandi makumi marhano oku burhambi bw'echirazi bw'obulungiro bwa kabiri. ¹⁸ Bajira pengere makumi marhano z'echuma ch'amarhale, z'okuchungir'ago malungiro gombi haguma gayumanyany'ehema libe liguma. ¹⁹ Bajir'empu z'engandabuzi edukwire z'omushushu, mpu zikazishukira elyo hema n'ezindi mpu zizibuzibu ziger'enyanya ly'ezabo. ²⁰ Bajirir'empaho z'omurhi enyanya w'enju; zaliri za murhi gw'omu kasiya, bazishinga zayimanga. ²¹ Ngasi lupaho obule zaliri ntambu ekumi n'obugali yaliri ntabu nguma n'echichira. ²² Ngasi lupaho lwaliherhe birhule bibiri, by'okugeza mwezindi, ntyo kubajirir'ezindi za yumbakag'enju. ²³ Bahir'ezo mpaho makumyabiri oku lunda lwa malyo lw'enju. ²⁴ Oku bikunikuni byazo bahira kw'ebyuma makumi mane by'okuchula efuranga oku mpaho makumyabiri, ngasi luguma baluhira ku byuma bibiri by'okugera mu bila birhule bibiri. ²⁵ Bashubi jira mpaho makumyabiri oku bwakabiri okulunda lw'enju, n'okulunda l'okuboko k'okulembe , ²⁶ Bajira byuma makumi mane by'efuranga, bikunikuni bibiri oku chikunikuni ngasi lupaho. ²⁷ Bajira mpaho ndarhu z'emitungo y'eryo hema olunda lw'ebuzikiro bw'ezuba bwalyo. ²⁸ Bajira mpaho ebiri zago zago z'okuj'oku nkingi zalyo; ²⁹ Oku ngasi nkingi ezo mpaho ebiri zalishanjukir'eshishi, aliko zalihumanire hofi n'empogo, ntyo kubajirag'empaho z'okuzindi nkingi zoshi. ³⁰ Zaliri mpaho munane, haguma n'ebikunikuni by'efuranga, byaliri byuma ekumi na ndarhu, oku chikunikuni cha ngasi lupaho kwali byuma bibiri. ³¹ Bajira milambaliko erhano y'empaho z'omurhi g'omu kasiya bazihira lunda luguma lw'ehema n'olwindi lunda ntyo, ³² bahira yindi erhano oku lunda lw'ebuzikiro bw'ezuba bw'ehema ly'oku shimanana, na yindi erhano y'empaho y'olunda lw'ehema ewa buzukiro bw'ezuba; ³³ Bagez'omulambaliko ahacharagati mpu lyagwarh'enkingi n'eyindi. ³⁴ Bashig'ezo mpaho kw'ehoro, n'empogo zaliriko z'okugeza mw'emilambaliko, n'eyo milambaliko bayishig'ehoro. ³⁵ Abagenda baluk'omwenda g'omunigi, g'oguchikiriza gw'echinusi ch'akaduku, n'echeshagama, haguma n'eye' echitani bachapa kw'ebiremwa biderhwa makerunbi bahirako. ³⁶ Bagajirira nkingi ene z'omukasiya, zalishigirw'ehoro; zaliherh'ehoro,zibakazagi shesheza m'omwenda gw'oguchikiriza oku bikunikuni byazo oku bindi bine, babishig'echuma ch'efuranga. ³⁷ Omu mulunvi lw'ehema lichesibwa bahiram'omwenda g'omunigi, g'okuchikiriza gulukirwe n'echinusi chiri haguma n'echitani chinja, ogo mwenda gwali guhangirwe bwinja. ³⁸ Bachula nkingi erhano n'ebikondo byazo z'okuchug'omwenda g'okuchikiriza, n'epengere z'okuguchuga, bazishig'ehoro. Oku mafufu n'oku marhwerhwe n'oku bikunikuni byazo, kwa liri ebyuma by'amarhale.