¹ Musa ahamagala olubaga lw'abana b'e Israeli, ababwira: Lolaga ebintu Nahano arhegekere okujira. ² Nji mwakazikola siku ndarhu; aliko olusiku lwa mushanvu lwaba luchesibwa; Sabato, lwakuhumuka, luli lwa Nahano. Ola nji wajira emirimo miguma miguma mw'olola lusiku nja hanwa, kuhanwa kw'olufu. ³ Ngasi hoshi nji mwaba muli murhakakoleza chiro n'omuliro, olusiku lw'e Sabato. ⁴ Musa abwira olubaga lw'abana b'e Israeli, aderha: Mulole oku Nahano arhegekere. ⁵ Oku bikulo byenyu muherhe murholeko ebi mwarhulira Nahano. Ngasi muntu yeshi w'omurhima gw'okuhana nja rhulira Nahano: ehoro, efuranga n'emiringa; ⁶ Emishangi y'omunigi, edukwire by'omweru, echitani chikehere kehere n'amoya g'empene; ⁷ Empu z'ebibuzi biri nka shagama, empu z'ebigoho, n'emirhi ya kasiya; ⁸ Amavurha gw'oku simikiro y'okuheba k'omuliro, n'akabayo kakwirire nka mavurha gw'okushiga, n'amalashi gabayira oku zulu; ⁹ Amabale ge Okonisi n'amabale g'okuheba omu efodi n'omushangi g'omu chifuba. ¹⁰ Mweshi omu mwabo baherhe obushiru n'obwenge bayinje bakole byoshi Nahano aderhere: ¹¹ Eyo nju, n'ehema lyage n'obulingiti bwawe, esinga zayo, embaho zayo, ebihagaliko byacho, enkingi zayo n'ebikondo byacho. ¹² Esanduku n'emilambaliko byao, emirhambi, n'omushangi g'okushukira Esanduku; ¹³ Ameza n'emilambaliko lwago, n'ebikoleso byoshi, n'emigati y'enterekero. ¹⁴ Esimikiro y'omuliro n'ebikoleso byalo, n'amatara mage, n'amavurha g'okuheba oku simikiro; ¹⁵ Lurhamba lwabaya amalashi n'ebihagaliko byage, mavurha g'okuchishiga n'amalashi g'okubaya bwinja n'omushangi g'olunvi lw'okuja omu mbikiro; ¹⁶ Olurhamba lw'embago, n'ehisinga singa y'omulinga gwage, emilambaliko yalo, n'orhukoleso rhoshi, n'omukenzi haguma n'echikondo chage; ¹⁷ Emishaki y'okulugurhu, enkingi zage, ebikondo byage n'omushangi g'oku lunvi g'olugurhu; ¹⁸ Enkingi z'embikiriro, enkingi z'olugurhu, n'emigozi yage; ¹⁹ Emyambalo y'enju y'okukolera mw'ebyo buchese, Emishangi egishirwe y'omudahwa Haruni, n'emishangi y'abagala bage y'okukola oku budahwa. ²⁰ Olubaga loshi lw'abana be Israeli barhenga embere za Musa. ²¹ Ngasi balala boshi bali herhe omurhima gukwirire bayinja n'okulerha entulo ya Nahano y'okuyibuka ehema ly'embuganano, n'oku mirimo yage yoshi n'emishangi y'obuchese. ²² Abalume bayinja haguma bwinja n'abakazi; na balala boshi baliherhe omurhima gu kwirire balerha emilinga, ebisikiyo, empeta z'oku midoke, n'ebikora, na ngasi bindi by'ebikoleso byoshi b'ehoro, ngasi muguma ahana entulo y'ehoro alibikire Nahano. ²³ Balala boshi baliherhe emishangi y'omunigi, nka nzima, n'eri nka mweru, n'echitani chigeke-geke n'amoya g'empene, empu z'ebibuzi biri nka muduku n'empu z'ebigoho, bazilerha. ²⁴ Balala boshi balerhega entulo y'efuranga n'emiringa balerha entulo emwa Nahano. Balala boshi bali herhe emirhi y'akasiya elolere emirimo y'okukola, bayilerha. ²⁵ Abakazi boshi baliherhe obushiru bw'okuhunga emigozi n'efune zabo, n'okuyilerha oku mirimo yabo, n'ey'omunigi, nka mukara, eri nka mweru, echitani chigeke-geke. ²⁶ Abakazi boshi baliherhe omurhima gu kwirire banaluka amoya g'empene. ²⁷ Abagula b'olubaga banalerha amabale ge Konisi na kandi mabale ge Efodi n'eshaho y'oku chifuba; ²⁸ na kabayo ka kwirire n'amavurha g'esimikiro y'omuliro, g'amavurha g'oku chishiga n'amalashi ga bayira oku zulu. ²⁹ Abana be Israeli boshi, abalume, abakazi baliherhe omurhima g'okusholola chango okukola oku mirimo Nahano abaga arhegekere Musa, balema balerha entulo oku bulonza emwa Nahano. ³⁰ Musa abwira abana b'e Israeli: Mumenye oku Nahano alondwere Besalili, mugala wa Uri, mwene Huru w'obuko bwa ba Yuda. ³¹ Amuyunjuza muka gwa Namahanga, n'obumenyi, n'obwenge n'okumenya ngasi hyoshi kukola. ³² Amuha obuhashe b'okujira ebyage n'okukola ehoro, efuranga n'emiringa, ³³ Okuchagulang'amabale n'oku makolesa, okukolesa emirhi, n'okujira ngasi hyoshi hya kajirwa n'emirhi. ³⁴ Amuhereza haguma n'oluhembo lw'okuyigiriza, kuguma na Holiyabe mwene Ahisamake, w'obuko bwa Dani. ³⁵ Amuyunjuza obwenge bw'okujira emirimo yoshi, eby'okubeja n'emirhi, ebyo kuhunga n'okuluka emishangi y'omunigi, nka nzima eri nka mweru, echitani chigeke- geke, n'okujira obuko boshi bw'emirimo y'ebyawe byawe wachijiriraga.