¹ Nahano abwira Musa: Obeje mbale ebiri z'amabale nka zilala z'embere, nj'oyandike kw'emyazi yaliri y'embere eyi wachagulangaga. ² Obe wachirheganya omu kasanzi kakwirire, nji wanazamuka esezi oku ntondo y'e Sinayi; nj'oyimange embere zani, oku busosoro bw'entondo. ³ Ntaye nj'ozamukage oku ntondo haguma nawe, na ntaye njimbonage wafunukira oku ntondo yoshi; chiro akaba bibuzi n'enkavu, birhabonekaga hofi w'eyola ntondo. ⁴ Musa abeja mbale ebiri z'amabale nka galala g'embere, azuka esezi sezi, n'okuzamukira oku ntondo y'e Sinayi, nka kulala Nahano amurhegekaga, eri aherhe omu fune yage mbale ebiri z'amabale. ⁵ Nahano ayandagala omu lwakungu, aja hofi naye, ahamagala ezino lya Nahano. ⁶ Nahano agera embere zage, aderha: Nahano, Nahano, Nyamuzinda w'obonjo n'obubabale, Kubuya buya n'oburhe, mugale okubwinja n'oku bushinganyanya, ⁷ analanga obuzigire bwage kuhika oku burha chihumbi, ababalira amabi, abahalanjika na banya byaha, aliko arhaleka ababi nka bashinganyanya, yewe anahana obubi bwa badarha oku bana n'abana oku bana kuhika oku luburha lwa kasharhu n'olwa kane. ⁸ Honaho Musa ayinama oku daho n'okufukama. ⁹ Aderha: Nahano akaba na bwene olukogo oku mesho gawe, Nahano lambagiraga omu charagati cherhu, bulala luli lubaga lwa bachirimisi; obabalire amabi gerhu n'ebyaha byerhu, Onarhujire mwimo gwawe. ¹⁰ Nahano ashuza: Lolaga, nkola nashwek'endagano. Njina jira,embere z'olubaga lwawe loshi, ebisomezwe ebirhasaga jirika omu chindi chihugo n'omu bwindi buko; N'olubaga loshi lukuzungulukire nji lwabona emirimo ya Nahano, na w'oyo wunji najirira kw'ebintu bidarhi. ¹¹ Obike bwinja ebi na kurhegeka zene. Lolaga, nji nahiga embere zawe Abamori, Abakanana, Abahiti, n'Aperezi, Abahevi, na Bayebusi. ¹² Omenye wajira endagano haguma n'abalamire omu chihugo nji wajamo, bula nji barhabaga murhegoi enyanya zawe. ¹³ Okurhali ntyo, nj'okumbagaze amaherero gabo, nj'ovunagule eshushano zabo, nj'ochagulange rhwa nyamuzinda rwabo. ¹⁴ Nj'orhafukamiraga embere z'owindi nyamuzinda, bulala Nahano anaheka ezino lya bayongwa, Ali Namahanga oyongwa. ¹⁵ Orhahira wajira endagano haguma n'abantu b'omwola chihugo, bula orhafukamiraga ba rhwa nyamuzinda wabo. Orhanabarhuliraga enterekero, bana kuhamagala, orhanalyaga oku buhanya bwabo. ¹⁶ Bula orharholaga bali babo oku bagala benyu mpu babashabe; na bala banyere bafukamira ba nyamuzinda wabo banayigiriza bagala benyu okufukamira rhwa nyamuzinda wabo. ¹⁷ Orhahiraga okuchula banyamuzinda b'echuma. ¹⁸ Njiwakazilanga edinye ly'emigati erhagwerhe levire; omu kasanzi k'esiku mushanvu, kw'omwezi gw'endagano, nji walya emigati erhagwerhe levire, nka kulala na kurhegekaga omu mwezi gw'endagano y'okurheng'e Misiri. ¹⁹ Ngasi choshi chaburha embere chiri chani, emishakalume yoshi mirhanzi omu buso n'omu birhungano. ²⁰ Nji wachungula haguma n'omwana buzi n'omwana gw'e Punda; na nkorhaguchungwire, nji wanaguvuna egosi. Nji wanachungula efula zenyu zoshi; nj'orhanayihekaga buzira hintu embere zage. ²¹ Nji walema wakola esiku ndarhu, n'olusiku lwa mushanvu; nji wanahumuka, chiro akaba mango ga kurhwera nago kushalula. ²² Nji wajira edinye ly'amaboso, ebishalulo by'embere-mbere by''okushalula by''engano, n'edinye ly'okushalula, aha buzinda bwa ngasi mwaka. ²³ Kasharhu omu mwaka ngasi balume boshi nji bafukama embere za Nahano Nyamuzinda Namahanga we Israeli. ²⁴ Bulala nji nalibisya obuko embere zawe, nji nayushula embibi z'echihugo chawe, na ntaye chiro n'omuguma nji wayogera echihugo chawe amango nji walema wazamuka mpu chiyerekana embere za Nahano na Namahanga wawe kasharhu omu mwaka. ²⁵ Orhahira okurhula enterekero y'emigati egagire y'eshagama y'omubi oku bukuze bwani, nterekero y'edinye ly'e Pasaka nji lirhagendaga lyageza obudufu kuhika esezi. ²⁶ Nji mwagenda mwarhula ebimwayezega by'embere - mbere omu nju ya Nahano, Namahanga wawe, Orhahira okayenda echana ch'empene omu monka ga nina. ²⁷ Nahano abwira Musa: Yandika eyi myazi; bulala eyi myazi oyifundikire na jira ndagano haguma nawe na haguma na Israeli. ²⁸ Musa abera eyola haguma na Nahano siku makumi mane z'ezuba n'esiku makumi mane z'obudufu. Buzira kulya migati, n'okunywa amenji. Na Nahano ayandika okuzilala mbale emyazi y'endagano, marhegeko ekumi. ²⁹ Musa ayandagala oku ntondo ye Sinayi, eri aherhe mbale ebiri z'okuhamiriza omu fune yage, omu kuyandagala oku ntondo; arhalimenyere oku oluhu lw'omubiri gwage luli lwakolera, bulala aliderhere na Nahano. ³⁰ Haruni na bana b'e Israeli balolereza Musa, lolaga omubiri gw'amalanga yigwakolera; bayoboha oku mushegerera. ³¹ Musa abahamagala; Haruni na Barhambo bakulu b'embuganano, bayinja hofi naye, ababwira. ³² Aha buzinda wa hola, abana b'e Israeli boshi bamushegerera, n'okubahereza amarhegeko Nahano amuhere, oku ntondo y'e Sinayi. ³³ Amango Musa amala shambala nabo, achishukira omushangi oku malanga mage. ³⁴ Amango Musa ajaga embere za Nahano, mpu bashambale naye, akula omushangi, kuhika amango ahulukaga; n'amango ahulukaga, abwira abana b'e Israeli bichi ahabirwe. ³⁵ Abana b'e Israeli babona amalanga ga Musa ga kolerere, Musa ashubi galula omushangi oku malanga gage kuhika, ashubigenda shambala haguma na Nahano.