¹ Nahano abwira Musa: Genda, rhenga hanola, w'oyo n'olubaga wakula omu chihugo ch'e Misiri; muzamukire omu chihugo na chigashaga na hereza Abrahamu Isaka, Yakobo, na derha: Nji chihereza eburha lyawe. ² Nji narhuma embere zawe malayika, njina libisya Abakanana, Abamori, Abahiti, Abaperisi, Abahevi na Abayebusi. ³ Ozamukire ebwa chihugo chishulula mw'amarha n'obuchi. Aliko nji ntaba omu charagati chawe, njinaka kugulumiziza omu njira, bulala oli lubaga lwa bachirimisi barhayunva. ⁴ Amango olubaga lwayunvaga eyi myazi ya buhane, baja omu mishibo, na ntaye wachiyambere emishangi yage y'edinye. ⁵ Na Nahano abwira Musa: Obwire abana b'e Israeli: muli lubaga lurhayunva, nka nazamukaga liguma ahacharagati kawe, nakabagulumize. Mukule emishangi y'edinye ekuliko, nji nalola ebi na kujirira. ⁶ Abana b'e Israeli bahogola emishangi yabo y'edinye, n'oku chiyeguza oku ntondo y'e Horebu. ⁷ Musa arhola ehema alikula oku chihandiro, hofi hofi; aha hamagala ehema ly'embuganano; Na ngasi yeshi walonza okubona Nahano anaja omola hema ly'embuganano, lyaliri eburhambi bw'oku chihandiro. ⁸ Amango Musa aba akala aja ebwa hema, olubaga loshi lwayumuka; ngasi muguma aha lunvi lw'ehema lyage, batirimulira Musa amesho, kuhika aj'omu hema. ⁹ N'amango Musa alonzag'okuja omu hema, echilundo ch'olwakungu cha yandagala n'oku yimanga aha lunvi lw'ehema, Nahano arhondera oku shambala haguma na Musa. ¹⁰ Olubaga loshi lwalemaga lwabona echola chilundo ch'olwakungu lwayimangaga aha lunvi lw'ehema, olubaga loshi lwayimanga n'okufukama omu lunvi lw'ehema. ¹¹ Nahano ashambala na Musa mesho oku mesho, nka kulala omuntu anashambala na mwira wage. Oku handi Musa ashubigaluka ebwa chihandiro; Aliko omusole w'omurhabazi wage, Yosuwa, mwene Nunu, arharhengaga omu charagati k'ehema. ¹² Musa abwira Nahano: lolaga, wambwirire: Zamulaga olula lubaga! Na ntako wambwirire nde nji warhuma haguma nani. chechirhumire, waderha: Nkuyinji oku zino lyawe, n'okubona olukogo oku mesho gawe. ¹³ Kandi, nka nakabona olukogo oku mesho gawe, omenyese enjira zawe; na ntyo njina kumenya, nji nambone kandi olukogo oku mesho gawe. Omenye oku eri shanja luli lubaga lwawe. ¹⁴ Nahano ashuza: Nji nalambagira nyenine haguma nawe, nji nanakuhereza amahumuko. ¹⁵ Musa amubwira: Akaba orhakalambagira wenine haguma nerhu; orharhujiraga rhurhenge hanola. ¹⁶ Gurhe nji byaba nanabwene olukogo oku mesho gawe, nyono n'olubaga lwawe? K'arhali kugenda haguma nerhu oku kwarhuma, n'okubona nyono n'olubaga lwawe rhurhashushene, n'embaga zoshi ziba oku gulu lyoshi? ¹⁷ Nahano abwira Musa: Nji na jira oku wahunire, bulala wabwene olukogo oku mesho gani na kumenyere oku zino lyawe. ¹⁸ Musa aderha: Onjirire nani mbone obukuze bwawe. ¹⁹ Nahano ashuza: Njinageza amenja gani goshi embere zawe, njinampamagaze ezino lya Nahano embere zawe; Nanjira olukogo oku yindonzeze okujirira olukogo, n'obonjo oku yindonzeze okubera obonjo. ²⁰ Nahano aderha: Orhakabona amesho gani, bulala omuntu eri akambona arhakachilama. ²¹ Nahano aderha: Lolaga ahantu hali hofi nani; nji wahagwarhira oku bale. ²² Amango obukuze bwani bwagera, nji na kuheba omu chibere ch'ebale nji na kushukira n'efune yani kuhika oku ngerere. ²³ Amango nji na kula efune yani, nji wanambonera emugongo, aliko amesho gani ntaye nji wamalolako.