¹ Olubaga, eri lubona Musa alegamire oku yandagala oku ntondo, bachiheba haguma bazunguluka Haruni, lwa mubwira: Rhugende! Orhujirire ya nyamuzinda walambagira nerhu, bulala Musa, omuntu warhukulaga e'Misiri, rhurhamenyere gurhe abere. ² Haruni ababwira eri: Mukule orhugondo rhw'ehoro rhuli oku marhwiri ga bakenyu, n'abagala benyu na banyere benyu, murhunderhere. ³ Olubaga loshi lwa kula orhugondo rhwaliri oku marhwiri, lwa lerhera Haruni. ⁴ Arhurhola n'efune zage, akweba ehoro omu chichuma, yaba nyena y'echuma. N'oku babwira: Israeli! Lolaga nyamuzinda wenyu, wabakulaga omu chihugo ch'e'Misiri. ⁵ Amango Haruni abona ebyola, ayumbaka oluherero embere zage, aderha: Omusezi, nji haba edinye enyanya za Nahano! ⁶ Buch'omu sezi, bazuka emiseke, barhula enterekero z'embagwa n'enterekero z'olukogo.Olubaga lwa yikala mpu balye n'okunywa; kandi bayumanga mpu bazine. ⁷ Nahano abwira Musa, genda, oyandagale; bulala olubaga lwawe, wakulaga omu chihugo ch'e Misiri, lwagomere. ⁸ Barhalegamire oku rhenga omu njira nabayerekaga; bachijirira enyena y'echuma, bafukama embere zayo, bayirhulira enterekero, n'oku derha: Israeli! lolaga nyamuzinda wawe, wakukulaga omu chihugo ch'e Misiri. ⁹ Nahano abwira Musa: Nabwene oku olula lubaga luli lubaga lw'echikanyi. ¹⁰ Lero ondekage; oburhe bukola bakolerako, n'okuluyosa; Njina kujira lubaga lunene. ¹¹ Musa ashigirira Nahano, Namahanga wage n'oku derha: Charhuma, nawe Nahano! oburhe bwawe bwakolerera olubaga lwawe, wakulaga omu chihugo ch'eMisiri n'obuhashe bunene, n'emisi y'efune zawe? ¹² Chichi charhumaga abanya Misiri baderha: oku buhanya bwabo bwabakulagayo, n'okubayirhira omu ntondo, n'okubalimasa enyanya w'egulu? Ogaluke omu mugayo, n'okuhuna obonjo oku mabi walonza okujirira olubaga lwawe. ¹³ Oyibuke Abrahamu, Isaka, na Israeli, abambali bawe, wabwiraga n'okuchigasha: nji nayushula eburha lyawe nka Nkununu z'oku nkuba, njinaha abana bawe chihugo choshi na derhaga, bachiyimemo esiku n'amango. ¹⁴ Nahano ahuna obonjo oku mabi aderhaga ajirira olubaga lwage. ¹⁵ Musa ahindamuka ayandagala oku ntondo, zila mbale ebiri z'obuhamiriza omu fune yage; mbale ziyayandikirweko nyunda ebiri, zaliyandikirwe olunda n'olundi. ¹⁶ Mbale zaliri mirimo ya Namahanga, n'olwandiko lwaliri lwandiko lwa Namahanga, asirirhaga okola mbale. ¹⁷ Yosuwa ayunva omulenge gw'olubaga, lwabanda endulu, abwira Musa: Hali omulenge gw'entambala omu chihandiro. ¹⁸ Musa ashuza: Gurhali mulenge gwa bahimana, gurhali mulenge gwa bahimirwe; linayunva, nka mulenge gwa bali bayimpa. ¹⁹ Lero, eri ahika hofi n'oku chihandiro, abona akanyena n'amazina. Oburhe bwa Musa bwakolera; akabula embale zaliri omufune zage, azichagulangira oku kugulu kw'entondo. ²⁰ Arhola enyena bajiraga, n'okuyigulumiza oku muliro; ashandaza olo luvu enyanya w'amenji, anaganywesa abana b'e Israeli. ²¹ Musa abwira Haruni: Bichi olubaga lwakuhebereko, mpw'obayemerere bajir'echaha chingana ahala? ²² Haruni mushuza: Oburhe bwa Nahano wani burhakugwarhaga! Omenyere nawe wenine okw'olula lubaga luba luheker'amabi. ²³ Bonine bambwiraga: Orhujirire nyamuzinda wa rhujira embere; bulala oyola Musa, ye muntu warhukulaga omu chihugo ch'e Misir,i rhurhamenyere gurhe abere. ²⁴ Nababwira: Balala baherhe ehoro, bayilerhe! Bayimpa; nayikweba omu muliro, mwarhenga eyila nyena. ²⁵ Musa abona oku olubaga lwahabukire, n'oku Haruni analuhabwire aluleka mw'obo bushombanyi, n'okulukoz'eshonyi omu g'abashombanyi babo. ²⁶ Musa agenda ayumanga aha lunvi lw'echihandiro, aderha: Oku nyono oli wa Nahano ayinje hano! N'abana boshi ba Lawi bachiheba haguma baja aha burhambi bwage. ²⁷ Ababwira: Ntya ku Nahano, Nyamuzinda w'e Israeli ashambere: Ngasi muguma omu mwabo ahebe engorho yage aha burhambi; Bashabuke n'okuzunguluka echihandiro oku lunvi n'oku lundi, na ngasi muguma ayirhe mwene wabo, nomubusi wage. ²⁸ Abana Balawi bajira oku Musa ababwiraga, olola lusiku haba nka bihumbi bisharhu by'abantu bafire. ²⁹ Musa aderha: Zene muchihebe haguma emwa Nahano, kuguma n'oku chihana nterekero oku mugala wawe na mwene wenyu, mpw'okubuzinda yakuhereza zene omugisho. ³⁰ Bucha sezi, Musa Abwira olubaga: Mwajirire echaha chinene. Nkola zamukira emunda Nahano ali: njina kanahabwa obonjo oku chaha chenyu. ³¹ Musa ashubira emunda Nahano ali amu bwira: Aho, olubaga lwajirire echaha chinene. lwachijirire nyamuzinda w'ehoro. ³² Babaliraga mukano kashanji echaha chabo! Akaba nanga, onzimye omu chitabu chawe wayandikagamo. ³³ Nahano abwira Musa: Owajirire echaha yi nji nazimya omu chitabu chani. ³⁴ Gendaga, olongole olubaga emunda na kubwiraga. Lolaga, malaika wani akushokolere embere zawe, aliko olusiku na chihola, nji na bahana oku chaha chenyu. ³⁵ Nahano ashurha olubaga, bulala balijirire enyena, ya jiragwa na Haruni.