¹ Bazaleli achul'esanduku y'empaho z'omurhi gw'omu kasiya; obule zaliri ntambu ebiri n'echichira, n'obugali yaliri ntambu nguma n'echichira, n'oburherema kuj'enyanya ntambu nguma n'echichira. ² Ayishig'ehoro ekwirire emugongo n'omunda, azungulus'omuhiro gw'ehoro eburhambi. ³ Ajira mpogo ene z'ehoro azihir'oku magulu gayo, ebiri lunda n'ebiri lunda. ⁴ Ajira milambaliko ebiri y'omurhi gw'omu kasiya ayishig'ehoro. ⁵ Ayishesheza mw'ezo mpogo oku magulu g'eyo sanduku, g'okuyiheka. ⁶ Ajir'echifuko ch'esanduku ch'ehoro ekwirire; obule zaliri ntambu ebiri n'echichira, n'obugali yaliri ntambu nguma n'echichira. ⁷ Achul'eshushano y'ebiremwa biderhwa Makerubi ebiri z'ehoro; azijira z'ehoro echulirwe, omu mirhambi ebiri, ⁸ makerubi nguma oku lunda n'eyindi oku lundi lunda; ajira makerubi garhengaga omu bonjo bw'enyunda ebiri. ⁹ Abo bamakerubi bashanjulir'ebyubi byabo enyanya, bashukira ebyubi byabo obonjo, balolana muguma n'owindi; bamakerubi baliherhe amalanga galolere ewa bonjo. ¹⁰ Ajira ameza g'omurhi gw'omu kasiya, obule bwaliri ntambu ebiri, n'obugali ntambu nguma, n'oburhema kuj'enyanya ntambu nguma n'echichira. ¹¹ Agashig'ehoro ekwirire, agahira k'omuhiro gw'ehoro. ¹² Ajir'omukaba gw'empaho z'obule bwa midoke ene, azihir'oku muhiro gw'ago meza oku mirhambi yoshi azishig'ehoro. ¹³ Agajirir'empogo ene z'ehoro, azihir'oku mirhambi byago oku binali bine ah'okugulu kunali. ¹⁴ Azihir'aha burhambi bwa ngasi kugulu, z'okugeza mw'emilambaliko y'okumaheka. ¹⁵ Abeja emilambaliko n'empaho z'omurhi g'omu kasiya, ayishig'ehoro; yaba y'okuhek'ameza. ¹⁶ Achul'ebintu byakazi koleswa kw'ago Meza: Embale, n'orhubehe, n'ebyanzi, n'ebisupa by'oku hanira kw'entulo ye divayi; abjira bya horo ekwirire. ¹⁷ Ajira echimanikiro ch'amatara n'ehoro ekwirire; ajira echimaniko ch'amatara g'ehoro echulirwe; oku gulu, omurhabi, ebirahuli, n'amafundo, n'amaso gacho, choshi chaliri chiguma chichulirwe. ¹⁸ Chaliherhe marhabi ndarhu garhengaga omu mirhambi, mirhabi esharhu y'echimaniko ewa lunda luguma, n'amandi marhabi masharhu n'olwindi ntyo ntyo. ¹⁹ Erhabi liguma lyali kw'ebirahuli bisharhu biri nka mburho, ly'omukomamanga liyorhere nka bwaso, n'erindi rhabi kon'ako, na gala gandi marhabi ndarhu garhenger'omu chimaniko. ²⁰ Oku murhi gw'ahacharagati k'echimanikiro kwaliri rhufundo rhune rhulehere nka lehe, ly'omu komamanga liri kw'ebiri nka mafundo n'obwaso. ²¹ Eshishi lya ngasi marhabi mabiri g'omurhi guli ahacharagati g'echimanikiro kwaliri nako amafundo; na ntyo oku ngasi galala marhabi ndarhu kwarhenga echimanikiro. ²² Ago mafundo n'amarhabi g'echo chimanikiro byaliri byoshi chiguma, chaliri choshi chichulirwe n'ehoro, ehoro ekwirire. ²³ Achijirira matara mushanvu, n'ebintu byabyo n'ebintu by'oluvu lw'ehoro ekwirire. ²⁴ Akolesa bilo makumi masharhu na birhano by'ehoro, ajira mw'echimanikiro ch'amatara n'ebintu byacho byoshi. ²⁵ Ajira oluherero lw'amalashi gw'omurhi gw'akasiya; okulehuka kwalo lwaliri koro liguma n'obugali koro liguma; liyumanene enyunda ene zinganangana, n'obuzamuka bwage bwaliri makoro mabiri, n'amahembi ga rhengerera oku lurhamba. ²⁶ Alushiga ehoro ekwirire, enyanya, enyunda zoshi oku zungulusa n'oku mahembi, n'oku jira omuhiro gw'ehoro n'oku zungulusa hoshi. ²⁷ Ayijirira peta ebiri z'ehoro eshishi w'emirhambi lyage ebiri; omu mbavu zage ebiri, oku nyunda zage ebiri, ahantu h'okulingira emilambaliko y'okuyiheka. ²⁸ Ajira eyo milambaliko y'omurhi g'omu kasiya, n'oku gushukira n'ehoro. ²⁹ Ajira amavurha machesibwa g'okuchishiga, n'obuku bwinja bw'amalashi ga kwirire, kuguma n'omulimo g'okwiz'amalashi.