¹ Chi w'oyo, muli bene Israeli,oyegeze aha burhambi bwawe mwene wenyu Haruni yewe n'abagala, omujire mudahwa wani: Haruni, Nadabu, Eliazari na Itamari, bagala ba Haruni. ² Mwene wenyu Haruni omujirire omwambalo guchesibwa, chibe chimenyiso ch'erenge na cha kukengwa. ³ Obwire ngasi bantu balenga balala bayunjwire omuka gw'oburhimanya nabahiriremo, bajirire Haruni emyambalo ya mujira muchesibwa na mudahwa wani. ⁴ Alanga emyambalo bajira: omwambalo gw'oku chifuba, efodi, echishuli chitake, echishuli, echitambara n'omukaba. Bajirire Haruni, mwene wenyu, n'abagala emyambalo michesibwa,li bakazinjirira akasi k'obudahwa. ⁵ Bakolese ehoro, akaduku k'omukara, akaduku k'akalinga, akaduku k'omweru n'echitani chikwirire. ⁶ Bajire efodi y'ehoro, ya kaduku ka mukara, kaduku ka mulinga, kaduku k'omweru n'ey'echitani chikwire: Kasi ka bulenga. ⁷ Kandi chibe na maganyi mabiri g'okugwasa oku mihiro yombi. ⁸ Omukaba gw'efodi gugerere enyanya, gukolwe kuguma nayo gunalungane nayo: Gube gw'ehoro, gwa kaduku k'omukara, gwa kaduku k'akalinga, gwa kaduku k'omweru n'echitani chi kwirire. ⁹ Orhole mabale mabiri ga onikisi,oyandikeko amazino ga bene Israeli; ¹⁰ amazino ndarhu oku bale lirhanzi, n'agandi ndarhu oku bale lya kabiri, nk'oku bana kulikirana omu maburhwa gabo. ¹¹ Ago mabale wahirako amazino ga bene Israeli, gakolwe n'omulenga oyinji kubejula amabale, nka kula bana bejula echiziriko, agabohere omu mpogo z'ehoro. ¹² Ago mabale gombi, ogahire oku mishumiro y'efodi, gabe mabale ga kuyibusa amazino ga bene Israeli. Ntyo Haruni akaziheka amazino gabo embere za Nahano oku birhugo byage byombi,li okazibayibuka. ¹³ Ojire mburuguse ebiri z'ehoro, ¹⁴ na bulegule bubiri bw'ehoro yonine, oyijire mihunge ekwirire, egere mw'ezo mburuguse. ¹⁵ Ojire n'eshaho y'oku chifuba y'okucha emanja, kasi ka bulenga, oyinjire nka kulala wanajira efodi: Y'ehoro, ya kaduku ka kalinga, ya kaduku kw'omweru n'echitani chikwirire. ¹⁶ Nka yamagonywa, eyumanane enyunda zoshi, ya bule bwa chichira ch'ekoro na bugali bwa chichira ch'ekoro. ¹⁷ Oyilukireko enkere z'amabale, nker'ene y'orhubale. Oku lukere lurhanzi kulukirwe esadoniki, etopazi n'esumarado; ¹⁸ Oku lukere lwa kabiri, ohireko enofeli. esafira n'ealimasi; ¹⁹ Oku lukere lwa kasharhu ohirereko, enjwijwi, eagata n'eamatusta; ²⁰ oku lukere lwa kane kulukirwe ekrizoliti, ehyasinti n'eyasiri. Orho rhubale rhuhangirwe omu mpogo z'ehoro. ²¹ Ago mabale gayandikweko amazino ga bene Israeli ekumi n'amabiri, gabe matake nka biriko, ngasi bale n'ezino, kulala emilala ekumi n'ebiri. ²² Eshaho y'oku chifuba oyijirire obulegule bw'ehoro erhalomo nvange miluke nka migozi. ²³ Eshaho y'oku chifuba oyijirire rhugufu rhubiri rhw'ehoro erhali mu nvange, n'orho rhugufuoku rhunali rhubiri orhushwekere oku mihiro yarho yombi. ²⁴ Orho rhugozi rhw'ehoro rhombi orhugeze mw'orho rhugufu rhubiri rhushwekerwe oku bushinjirobw'eshaho y'oku chifuba. ²⁵ N'abyo ebikwi by'eyo milinga yombi, bishwekerwe ku zila mburunguse zombi,oku mishumiro y'efodi, embere zayo. ²⁶ Ojire mpogo ebiri z'ehoro ozihire oku bushwinjiro bw'eshaho y'oku chifuba, oku muhiro gw'eendalala, olunda lw'efodi. ²⁷ Ojire ezindi mpogo ebiri z'ehoro, ozihire eshishi ly'ebirhugo-rhugo by'efodi, olunda lw'embere, hofi n'obugonyero bwayo, enyanya ly'omushumiro gw'efodi. ²⁸ Bashwekere empogo z'eshaho oku mpogo z'efodi n'ehigozi hy'akaduku k'omukara, ebere anyanya ly'omushumiro gw'efodi n'eshaho y'oku chifuba esere oku efodi. ²⁹ Ntyo, amango Haruni akazija omu hachesibwa, abaziheka ama zino ga bene Israeli aha murhima gwage, omu shaho y'oku murhima y'okuch'emanja, li bakaziyorha bayibuka esiku zoshi embere za Nahano. ³⁰ Omu shaho y'oku chifuba y'okuch'emanja ohiremo Urimu na Tumimu, bikazibera aha murhima gwa Haruni amango aja embere za Nahano. haruni akazikheka ntyo esiku n'amango olubanja lwa bene Israeli aha murhima gwage embere za Nahano. ³¹ Ojire echishuli ch'efodi cha mwenda gwa kaduku ka mukara choshi choshi. ³² Aha kagarhi k'echo chishuli haje omurhule gw'oku kazigezamo erhwe, n'burhambi bw'ogo murhule ebe bushwinjiro buli nka bwa luba, li chirhangibereka. ³³ Oku muhiro gw'omu ndalala muje emishemberere y'emishabiro y'akaduku k'omukara, akaduku k'akalinga n'akaduku kw'omweru n'orhudende rhuje rhwahangirwa oku burhambi n'omu kagarhi k'eyo mishabiro. ³⁴ Hidende higuma hy'ehoro na mushabiro muguma oku muhiro gw'echishuli n'omu marhambi moshi. ³⁵ Haruni akazi yambala amango ali omu mikolo yage, na ntyo bakaziyunv'ajegereza omudende amango akola aja omu hachesibwa embere za Nahano, n'amango akola arhengamo, ly'alekifa. ³⁶ Ojire ehy'olubamba hy'ehoro yonine, onabibejeko nka kula babej'akahamikizo, mpu: Muchesibwa wa Nahano. ³⁷ Ohishwekere oku mugozi gw'akalinga k'omukara, hije oku sapo: Hikwanene hibere lunda lw'embere oku sapo. ³⁸ Hiyinjij'ahamalanga ga Haruni, li akaziheka amabi bene Israeli bajira omu bintu barherekera Nahano ngasi mango barherekere. Haruni akazi hiyambala ngasi mango emalanga ga Nahano asimisibwa n'ezo nterekero. ³⁹ Oluke echishuli k'echitani chinja, ojire esapo y'echitani chikwirire, ojire n'omukaba gw'emikonzi, kazi kabulenga. ⁴⁰ Bagala ba Haruni obajirire ebishuli, obajirire emikaba, obajirire n'esapo z'ebidesi zilala zankabakengesa. ⁴¹ Ebyo bintu obiyambike mwene wenyu Haruni n'abagala, obashige amavurha, obanterekere libakazi jira omukolo gwani gw'obudahwa. ⁴² Obajirir'orhubutura rhw'echitani, rhwokushukir'obutambara bwabo, rhukazirheng'omu chibuno kuhik'omu madwi. ⁴³ Haruni n'abagala bakazirhuyambala nka baja omu chirhala ch'ehano, eri nka bashegerer'oluherero mpu barherekere omu hachesibwa, li balekehemuka banaleke kufa. Liri rhegeko ly'esiku n'amango ku mwabo n'oku burha lyage.