¹ Lolaga oku wakazi bajira libarherekera omu budahwa bwani, orhole empanzi zidorho na biganda buzi bibiri birha herhe shembo. ² Ojire n'obuntu burhagagire, emigati elokerere erhali mwo kugaga ya vurungirwe mwa mavurha, n'orhugati rhurha herhe kugaga, rhushige amavurha, n'ebi chirachira birhaherhe kugaga rhushukize kw'amavurha. ³ Obihire byoshi omu ntonga nguma ona biherere haguma n'elala mpanzi n'ebibuzi oku binali bibiri. ⁴ Oshegeze Haruni n'abagala aha lunvi lw'echihandiro ch'ehano, onabashuke n'amenji. ⁵ Orhole emishangi, oyambise Haruni elopo ly'efodi n'oku chikwiza wa yambalira omu chifuba, njo namuhekw'omuko mukaba gw'efodi. ⁶ Nji warhabika oku rhwe lyage oku gembwa kuzungulukire n'ebishema bisharhu, n'echimanyiso ch'echisikiyo chichere cho kurhegeka. ⁷ Nji orhole amavurha g'okushiga, omu sheshere okugwo oku rhwe lyage, omu shigego. ⁸ Hanola oba w'amashegeza bagala bage nji wana bayambisa amalopo. ⁹ Nji wayambisa omukaba, Haruni na bagala bage, nja bayambisa esapo bagala ba Haruni ntyo obudahwa bube bwabo omu rhegeko ly'esiku n'amango, nji wayimika Haruni na Bagala bage. ¹⁰ Oku handi nji olerhe empanzi ebwa chihandiro ch'ehano lya Nyamuzinda, Haruni n'abagala bage nji walambulira amaboko oku rhwe ly'eyola mpanzi. ¹¹ Nji wabagira empanzi embere za Nyamuzinda aha lunvi lwe hema ly'ehano. ¹² Nji warhola eshagama y'empanzi wanayishiga n'omudoke gwawe oku rhuhembi, hembi ly'oluherero n'oku shandaza eshagama yoshi oku kugulu k'oluherero: ¹³ Nji orhole amashushi goshi ga shwikire amala, n'enyama ziri oku budiku, n'esiku zombi z'agandi mashushi ga bizungulukire ebyola nji wana bigulumiza oku luherero. ¹⁴ Aliko nji obigulumize oku muliro arhali omu chilalo; eminyofu y'empanzi, oluhu lwayo n'amahuluhulu gayo: Bulala eri nterekero y'abanya byaha. ¹⁵ Nji orhole chibuzi chiguma omubyo, na Haruni n'abagala bage nji balambulire kw'amaboko oku rhwe ly'echibuzi. ¹⁶ Nji obage echibuzi nj'orhole eshagama n'okuyishanguliza oku burhambi boshi bw'oluherero. ¹⁷ Nji wachagulanga bichira chira, oshuke amala gayo, nebinogosho byayo obihire ku bichira n'erhwe lyayo. ¹⁸ Nji wayosa echibuzi choshi oku luherero; Eri lubagiro lwa Nyamuzinda, eri nterekero enjirirwe n'omuliro, akabayo ka kwirire emwa Nyamuzinda. ¹⁹ Nji warhola echindi na Haruni n'abagala bage balambulire amaboko oku rhwe lyecho chibuzi. ²⁰ Nj'obage echibuzi, nji wanarhola eshagama yacho, wanayiheba oku manegenege g'okurhwiri kulyo kwa Haruni n'oku manegenege gw'okrhwiri kulyo kw'abana bage n'oku chinkumwa ch'efune yage ya kulyo n'okunwe linene ly'okugulu kulyo njo onashige eshagama oku burhambi boshi bw'oluherero. ²¹ Nji warhol'eshagama nji yaba oku luherero n'amavurha g'oku chishiga; omashandaze ku Haruni n'oku mishangi yage, n'oku bagala bage n'oku mishangi yabo nabo, ajirwa muchesibwa Haruni, emishangi yage bagala bage n'emishangi yabo. ²² Nji warhol'amashushi g'echibuzi, n'ehunga, amashushi ga shukire enda n'obudiku n'esiku zombi, n'amavurha ga zungulukire n'echirhugo ch'amalyo bulala chiri chibuzi ch'okuyimika. ²³ Nj'orhole nawe omu chirhiri emigati erhagagire, oyirhabike embere za Nyamuzinda, orholem'omugati gw'okumirugusa, omugati gulokerere gulimw'amavurha n'ehigati yiguma. ²⁴ Nji waheba ebyola byoshi omu fune za Haruni n'omu fune z'abagala bage nji wanabizunguza eyi n'eyi n'ebindi embere za Nyamuzinda. ²⁵ Nji wabikula omu fune zabo, njo n'abiyosez'oku luherero, enanya ye mbagwa, kuchihana nka muliro embere za Nyamuzinda, kabayo ka kwirire ewa Nyamuzinda. ²⁶ Nji warhola akameme k'echibuzi nji kakoleswa omu kuyimika Haruni, nji wazungulusa eyi n'eyi embere za Nyamuzinda nji chaba chigabi chawe. ²⁷ Nji wachesa akameme n'echirhugo ch'echibuzi nji chayimika Haruni n'abagala bage, akameme, n'omushaya gw'echibuzi bya yerekana okuj'enyanya. ²⁸ Nji byaba bya Haruni n'abagala bage esiku zoshi omu ku jilola kw'abana be Israeli, bayorha bajira enterekero zabo z'omurhula, omukuja enyanya kw'enterekero nji byaba bya Nyamuzinda. ²⁹ Emishangi echesezwe ya Haruni nji yaba nju abana bage nji bayiyambala amango bayishigire n'oku bayimika. ³⁰ Nji bahekwa ahali siku mushanvu n'oyula bayimika mudahwa ahali hage omu bagula, yi wakazij'omu chihandiro ch'ehano omwa kazi jirir'emirimo y'obuchese. ³¹ Nji warhola echibuzi ch'okuyimika ona chiyende eminyofu omu hantu hachesebwe. ³² Haruni n'abagala bage nji balya aha lunvi lw'echihando ch'ehano, eminyofu y'echibuzi n'omugati nji byaba omu ntonga. ³³ Nji bagenda balya ebya kazibagwa oku nterekero y'okubachesa olusiku lw'okuyimika n'okurhegekera kwabo. Ntaye w'embuga wagenda wabiryako bulala biri bichesibwa. ³⁴ Akaba hali ebyayorhere kuhika esezi kw'eyo nyama y'okuyimika n'ogwo mugati, nji banabiyosa bisingonoke, barha na chibirya bulala biri bichesibwa. ³⁵ Intyo oku wajira ku Haruni n'oku bagala nk'oku nabarhegekaga, okazijira siku mushanvu wajira by'okuyimika. ³⁶ Ngasi lusiku okazirherekera empanzi ndorho, ebe nterekero y'okukula ebyaha oku luherero, omu kulushukulula, alushig'amavurha gw'okulujira lucheswe. ³⁷ Okaziira siku mushanvu zoshi washukulula oluherero, wanalujira luchesibwa. Ntyo oluherero lwaba luchesibwa bwenene, ngasi byoshi byahuma oku luherero lwaba lucheswe. ³⁸ Lolaga ebi wakazirhulira oku luherero bibuzi bibiri bya mwaka muguma ngasi lusiku luja oku nkuba. ³⁹ Chibuzi chambere charherekerwa esezi, n'echindi chibuzi omu charagati ga magolo mabiri. ⁴⁰ Bakazi rherekera haguma n'echibuzi chambere, chigabi cha kali kumi ch'eshano edugirwe omu chichira chiguma cha kane ch'amavurha. N'omu chi chira chiguma cha kane ch'elivayi. ⁴¹ Nji warherekerera echibuzi kabiri omugolo haguma n'entulo eshushene n'eye sezi, kuchihana omu kusirera n'omuliro, kabayo kakwirire emwa Nyamuzinda. ⁴² Eyola yo nterekero bakazirherekera esiku zoshi ya genda ya jirika na bakulikiraho oku lunvi lw'echihandiro ch'ehano embere za Nyamuzinda, na hola ha nji nabashigana haguma mweshi n'oku baderheresa. ⁴³ Ahola hanji nabashimana haguma na bene Israeli, hantu nji haba hachesibwa oku renge lyani. ⁴⁴ Nji na chesa omu chihandiro ch'ehano n'oku luherero; nji na chesa Haruni n'abana bage, libaba mirimo omu budahwa. ⁴⁵ Nji nabera omu charagati cha bene Israeli, Nyamuzinda wabo. ⁴⁶ Nji bamenya oku nye Nyamuzinda, Namahanga wabo, nabakulaga omuchihugo ch'eMisiri, yi dama omu charagati chabo, ndi Nyamuzinda wabo.