¹ Nahano aganiza Musa, amubwira, eri: ² Obwire bene Israeli basholole entulo, ngasi bantu b'omurhima mwinja boshi, oje warhola ezo nshololo zabo. ³ Talag'eshololo wabahuna: Ehoro, amarhale, emiringa, ⁴ emyenda y'akaduku, eyomusengo, echitani chalangashana, eswa, oboya bw'empene, ⁵ empu z'engandabuzi z'akalinga, empu z'ebihogo n'emirhi y'akasiya, ⁶ amavurha gw'okuhira omu matara, amagaru gw'okuhira omu mavurha gw'okuchishiga n'obuku bw'okuyosa. ⁷ Amabale ga Onukisi n'amabale g'okuja omu efodi n'omu mwambalo g'oku chifuba. ⁸ Onjirire endalo li nkazibera ahagarhi kenyu. ⁹ Nyenine na kuyereka olugero lw'echihando n'olugero lw'ebintu byamo byoshi: Ok'okonine ku wanajira. ¹⁰ Onjirire omuchimba gw'embaho z'akasiya, gwa bule bw'amakoro mabiri n'echichira. ¹¹ Ogushige ehoro erhali munvange, ogushige omu ndalala n'emugongo, n'omuhiro gwago oguzungulus'ehoro. ¹² Oguchulire mpogo ene z'ehoro, ozihire omu magulu gago oku ganali mane, mpogo ebiri lunda luguma n'ebiri olundi lunda. ¹³ Ojire emirhambi y'emirhi y'akasiya, oyishig'ehoro, ¹⁴ onayi shesheze omu mpogo z'amarhambi g'omuchimba, gukazi barhulirwako. ¹⁵ Emirhamba ebere omu mpogo z'omuchimba, erhakulagwamo. ¹⁶ Endagano na kuha oyibike mugola muchimba. ¹⁷ Oku handi ogujire chifuko ch'ehoro yonine, buli makoro mabiri n'echichira na bugali bw'ekoro liguma n'echichira. ¹⁸ Ojire Bakerubi babiri b'ehoro; obachulire oku marhambi gombi gecho chifuko. ¹⁹ Ohire Kerubi muguma eburhambi buguma n'owundi aje ebundi burhambi. Obahire oku muhiro gw'echifuko, omu marhambi gombi. ²⁰ Ebyubi by'abola bakerubi bishanjukire enyanya, bakazi shukira echifuko n'ebyubi byabo bayerekerane bombi, bakazi lola ebwa chifuko. ²¹ Ohire echifuko enyanya ly'omuchimba n'omu muchimba mu wahira Endagano na kuha. ²² Aho, hawakazibuganana nawe, hanakazikuganiriza, enyanya ly'echifuko, ahagarhi kabo ba-Kerubi babiri bali oku muchimba gw'Endagano, nka kubwira byoshi ntegekere bene Israeli. ²³ Kandi ojire olwibo lw'omurhi gw'akasiya, lwa bule bwa makoro mabiri, bugali bw'ekoro liguma, n'enyanya koro liguma n'echichira. ²⁴ Ogashige ehoro erhalimw'envange, ogutake n'ehoro. ²⁵ Okw'omuhiro, ebinjuleko emikororozi ya bugali bwa chigabi ch'ekoro, onazunguluse emikororonzi y'ehoro. ²⁶ Ogajirire mpogo ene z'ehoro, zije oku bikwi bine by'amagulu gabo oku ganali mane. ²⁷ Ezo mpogo zije omu marhambi g'amagulu gago oku ganali mane, zikazi gageramo emirhambi y'okubarhula olwibo. ²⁸ Eyo mirhambi oyijire n'omurhi gw'akasiya, oyishige ehoro, ekazikolesibwa oku kubarhula olwibo. ²⁹ Olwibo olujirire embale, enambi, orhubehe, enzinzi n'ebyanzi, libakazi idubuliramo enterekero z'ebinyobwa. Byoshi obijire by'ehoro erhali nvangiranye. ³⁰ Okaziyorha ohebere esiku zoshi omugati gw'enterekero oku lwibo, embere zani. ³¹ Kandi ojire olwengezi k'ehoro erhali yakuvanganya. Olo lwenge, lukolere bwenene n'enteberhebe yalo n'olusarhi lwalo, haguma n'amashami, ebigonero n'obwaso bwalo. ³² Marhabi ndarhu garhenge omu marhabi galo, marhabi masharhu g'omwengezi eburhambi buguma n'amarhabi masharhu g'omwengezi ebundi burhambi. ³³ Oku ngasi rhabi kuje marhabi masharhu galikw'amafufu n'obwaso. Nty'oku marhabi ndarhu garhenge omu mwengezi gwajirwa goshi. ³⁴ N'olo lwengezi lonine, lube na nyenge ene haguma n'amafufu n'obwaso bwago. ³⁵ efufu liguma omu marhabi mabiri mambere garhenge omu mwengezi, n'efufu liguma omu marhabi mabiri mazinda garhenge omu mwengezi kon'oko oku marhabi ndarhu goshi g'omwengezi. ³⁶ Amafufu n'amarhabi bilungene n'omwengezi, byoshi bibe bitule omu chuma chiguma ch'ehoro erhali yakufangiranya. ³⁷ Ojire nyenge mushanvu: Bakazi koleza ezo nyenge, zikolez'embere n'eburhambi. ³⁸ Entambi zako n'amaganyi gako, byoshi bibe by'ehoro yonine. ³⁹ bagajire na talenda nguma y'ehoro yonine, haguma n'ebigabi byako byoshi. ⁴⁰ Olole bwinja onajire nk'oku oyerekerwe oku ntondo.