¹ Nyamuzinda bwira Musa eri: Sokera emunda Nahano ali nawe Haruni mwene Nadabu n'owenyu Abihu, mweshi n'abandi bagula makumi gali mushanvu ga bene bene Israeli, muyinji fukama hale. ² Musa yenine washegera haguma na Nahano; bowe barhashegereraga, n'olubaga lurha rheremaga haguma naye. ³ Musa anachiyinja, ashambalir'olubaga ebyo binwa bya Nahano byoshi n'amarhegeko gage goshi. Olubaga loshi lwana chishubiza na mulenge muguma, mpu: Ebinwa Nahano anaderhere byoshi, rhwabishimba. ⁴ Musa anachiyandika ebinwa bya Nahano byoshi, azuk'esezi miseke, ayubaka oluherero eshishi w'entondo n'amabale ekumi na mabiri g'ela milala ekumi n'ebiri ye Israeli. ⁵ Oku handi, ana chirhuma abana b'emisole b'omu bene Israeli bajirhula embagwa banarherekera emichuka y'empanzi, nka nterekero y'okushangira. ⁶ Musa arhola echigabi ch'eshagama, achishiga oku rhubehe n'eyayorhaga ayishanguliz'oku luherero. ⁷ Arhola echitabu ch'Endagano achisomer'olubaga nalo lwashubiza, mpu: Ebyo bi Nahano aderhere byoshi rhwabishimba, rhunabikenge. ⁸ Musa arhola eshagama ayishanguliza oku lubaga eri: Eyi shagama y'eshagama y'Endagano Nahano afundikire haguma n'ebyo binwa byoshi. ⁹ Musa anachisoka haguma na Haruni, Nadabu na Abihu, boshi na bala bashamuka makumi gali mushanvu b'omu bagula be Israeli. ¹⁰ Babona Nyamuzinda we Israeli, n'aha magulu gage eri hali nka kuno harhindwa echirhindiro chiri nka nchuma ya kasi eshusha echichu ch'oku nkuba. ¹¹ Nta kubi ajirire abo bishogwa b'omu Israeli, balolereza Nahano, balya bananywa. ¹² Nahano anachibwira Musa, eri: Osokere emunda ndi kuno ntondo onabereko, nkuhe embaho z'amabale zirikw'amarhegeko n'amahano nyandikire, mpu ogayigirize. ¹³ Musa anachiyumuka, yewe n'omurhabazi wage.Yoshuwa, Musa anachisokera oku ntondo ya Nyamuzinda. ¹⁴ eri amaleka abwirire abagula, eri: Murhulindire hano, kuhika rhugaluke. Chi Haruni na Huri aba mbalekere nenyu, owakaba agwerhe olubanja, anabadosa. ¹⁵ Musa anachisokera oku ntondo. Echichu chashukira entondo. ¹⁶ Erenge lya Nahano lyabera oku ntondo ya Sinayi, echo chichu chayishukira siku ndarhu zoshi. Olusiku lwa kali mushanvu, ana chihamagala Musa omu kagarhi ka chila chichu. ¹⁷ Erenge lya Nahano lya kazibonekera bene Israeli nka ngulumira ya muliro aha busosorobw'entondo. ¹⁸ Musa ayongobera mula chichu, asokera oku ntondo siku makumi mane na budufu makumi mane.