¹ Orhakaza yeneza emyazi y'obubeshi. Orhakaga rhabala omubi omu kuderh'obubeshi. ² Orhakazaga shimb'obunene bw'abantu balonza amabi, orhanahirag'okashwekerwa olubanja lw'obubi mpu ly'oja olunda banene bali. ³ Orhakazaga rhabal'omuntu omu lubanja mpu okwenge ali mukene. ⁴ Eri wankashimana enkavu y'omushombanyi wawe, eri farasi yage ehabukire onamulerhereyo. ⁵ Eri wankabona punda y'omushomanyi wawe egogomerwe n'omuzigo, ahali h'okuchigerera,onayirhabale mwene ninayo. ⁶ Orhahiraga okalenganya owenyu oli mukene omu lubanja lwage. ⁷ Okaziyakira hale olubanja lw'obubeshi. Orhahira okayirha omu shinganyanya, bulala ntayeza omuntu mubi. ⁸ Orhahira okayemera ebituliro, bulala ebituliro binaziby'amesho g'ababona, bihindamule n'ebinwa by'abashinganyanya. ⁹ Orhahiraga okalibuz'omuhisi, orhahabire wenine omuhisi chirhindibuka, bulala nawe wenine waliri muhisi omu chihugo ch'e Misiri. ¹⁰ Okazimala myaka ndarhu warhwera eshwa n'okushalula emyaka yawe. ¹¹ Ch'omwaka gwa kali mushanvu onalileke lilale, abakene bw'omu shwa lyawe baly'emburho zirimo, n'ebya nkayorha enyama z'elubala zibirye. Ntyo wakazijira esina zawe z'emizeituni yawe. ¹² Omu siku ndarhu wakazijira emikolo yawe, olwakali mushanvu, wanahumuka, ly'enkavu yawe n'efarasi yawe birhamuka, li na mugala wamwambali-kazi wawe n'omuhisi bayisa. ¹³ Okenge ngasi byoshi nakubwirire orhahiraga okahuna ezino ly'abandi ba-nyamuzinda, omusezi lirhayunvikanaga omu bunu bwawe. ¹⁴ Okazi nkuza omu kujira olugendo luchesibwa kasharhu omu mwaka. ¹⁵ Okazijira olusiku lukulu lw'emigati erhalimw'elevire, nka kulala nakurhegekaga, omu mwezi gw'Abibu, bulala gw'omwezi warhengagamwo eMisiri. Ntaye wanayinj'embere zani maboko mumu. ¹⁶ Okazijira olusiku lukulu lw'emyaaka myamberey'omu maboko gawe, lw'ebiwarhweraga omu mashwa. N'olusiku lukulu lw'okushalula, aha buzinda bw'omwaka, amango y'okuhumbula amalehe gw'omukolo gw'omu mashwa gawe. ¹⁷ Kasharhu omu mwaka, ngasi mulume akaziyinji lol'alanga ga Nahano Nyamwagirwa. ¹⁸ Orhahiraga oka nterekerera emigati erimw'elevire n'embagwa; n'amashushi g'embagwa z'olusiku lukulu lwani, garhagezag'obudufu kuhika sezi. ¹⁹ Okazirhula emyaka myambere y'eshwa lyawe omu ka-Nyamuzinda, Namahanga wawe. Orhahiraga okayendera omwana-hene omu mwonka ga nina. ²⁰ Narhuma malayika wani embere zawe aj'akulanga omu njira anakuhis'ahantu narheganyize. ²¹ Omukenge, onakaziyunviriza omulenge gwage; orhanamugayaguzaga, bulala arhankalember'obugamba bwawe, bulala kuba ezino lyani liri muye. ²² Okaziyunviriza omulenge gwage onakazijira ebi nderhere byoshi, naba mwanzi w'abanzi bawe na mushombanyi w'abashombanyi bawe. ²³ Hano malayika wani aba amakushokolera, aba amakuhis'emw'Abamori, Abahiti, Abaperesi, Abakanana, Abahivi n'Abayebusi, hano mba nabahungumwire, ²⁴ orhachihira wafukamira ba nyamuzinda babo, ch'oyinjehinangula abo ba nyamuzinda babo n'okujojanga emperero zabo. ²⁵ Okarhumikira Nahano Nyamuzinda wawe, anagisha ebiryo byawe n'amenji gawe, na nkulange kuli ngasi ndwala; ²⁶ Omu chihugo chawe murhakabonek omukozi omomire eri owaba ngumba: Nayunjuza esiku z'akalamo kawe. ²⁷ Narhuma echoba chani embere zawe, nshandabanye ngasi mashanja wanageremo, abashombanyi bawe boshi bakuyaka. ²⁸ Narhuma olwisibo embere zawe, lulibirheko Abahivi, Abakanana n'Abahiti embere zawe. ²⁹ Ntabalibirhako embere zawe oku chaligumiza omu mwaka muguma, ly'echihugo chirhayorhaga busha, ly'ebiryanyi bilekiluga, bikurhindibuze. ³⁰ Kubuyabuya nakazi balibirhako embere zawe, kuhika amango wayololoka agale kulya echihugo choshi. ³¹ Nach'olubibi lw'echihugo chawe kurhenga oku nyanja Ndukula kuhika oku nyanja y'Abafilisitini, na kurhenga oku mpinga kuhika oku lwinji. Nechi, nahira bene echihugo omu maboko gawe, nambalunde embere zawe. ³² Orhahiraga okanywana nabo changwa eri haguma na banyamuzinda babo. ³³ Barhakayumbaka omu chihugo chawe, li barharhumaga wangomera; wanka nabona wamarhumikira baynamuzinda babo, n'oko kukuhindukire murhego.