¹ Nyamuzinda aderha ebi binwa byoshi mpu: ² Nye Nahano wakukulaga omu chihugo ch'e Misiri omu nju y'obuja. ³ Orhahiraga okaba n'abandi ba nyamuzinda kuleka nyono. ⁴ Orhahiraga okajir'eshushano, eri olwiganyo lw'ebiremwa biba enyanya omu mpingu, n'oli ebiremwa bya hano gulu, n'oli eby'omu menji ekuzimu kw'egulu. ⁵ Orhahiraga okabiharamya eri kubikolera, bula nye Nahano Nyamuzinda wawe, mba mwongwa, nampana abana oku mabi ga b'eshe,kugera oku burha lya kasharhu, n'erya kane, bala banshomba. ⁶ Ch'abansima, bakashimba n'amarhegeko gani, nambajirira aminja kugera oku burha lya kali chihumbi. ⁷ Orhakazagi derha busha ezino lya Nahano, Nyamuzinda wawe, bulala Nahano arhaleka kuhana omuntu oderha busha ezino lyage. ⁸ Okazi yibuka olw'e Sabato, onalujire luchesibwa. ⁹ Siku ndarhu wakazijira emikolo yawe yoshi. ¹⁰ Ch'olusiku lwa kali mushanvu, luli Sabato ya Nahano,Nyamuzinda wawe. ¹¹ Bula omu siku ndarhu Nahano ajira empingu n'egulu, enyanja na ngasi bibamo, chi oku lusiku lwa kali mushanvu ahumuka. che chirhumire Nahano agisha olw'e Sabato, analujira luchesibwa. ¹² Okazi kenga isho na nyoko, l'olama myaka minene omu chihugo ohabirwe na Nahano, Nyamuzinda wawe. ¹³ Orhahiraga okaniga. ¹⁴ Orhaahiraga okajira eby'eshonyi. ¹⁵ Orahira okazimba; ¹⁶ Orhahiraga okabeshera omwalungwe wawe obubeshi. ¹⁷ Orhahiraga okachifija muka mwalungwe wawe, changwa eri mwambalikazi wage, kandi eri nkavu yage, eri punda yage, eri ngasi kantu ka mwalungwe wawe oarhachifijako. ¹⁸ Olubaga loshi lwakaziyunva emirazo, emikungulo n'omulenge gw'omushekera, n'entondo ya rhengam'omusi, olubaga lwabona lwadirhimana, lwachiyegula hale. ¹⁹ Lwa bwira Musa mpu: Orhubwire wenine, rhwayunva, s'aliko Nyamuzinda arharhubwiraga, rhwankafa. ²⁰ Musa abwira olubaga eri: Murhayobohaga! Bulala Nyamuzinda ayinjire mpu amurhangule, ly'echuba chage chimubamo, muleke oku jir'ebyaha. ²¹ Olubaga lwa chiyegulira hale, chi Musa yewe ashegerera chila chintu Nyamuzinda alimo. ²² Nahano abwira Musa mpu: Ojibwira bene Israeli ntya: Mwabwene mwenine oku kurhenga empingu nakazagi baganiza. ²³ Murhahiraga mukampalika na banyamuzinda b'amarhale, mumenye omu sezi mwanka nderha mpu mwachijirira banyamuzinda b'ehoro. ²⁴ Oyinji nyumbakira oluherero lw'obudaka wakazirherekerako embagwa n'enterekero zawe z'omurhula, ebibuzi n'enkavu zawe na ngasi hantu nanamenyisize ezino lyani, na yinja ahola nkugishe. ²⁵ Chi eri wanka nyumbakira oluherero lw'amabale, orhayumbakaga n'amabale magemerwe, bulala hano ogagezako enkololo yawe wana gabihya. ²⁶ Orhakazi rheremera oku mashonezo nka waja aha bwa luherero lwani, ly'oleki yerekana obushugunu bwawe.