¹ Omu mwezi gwa kasharhu bachimala rhenga omu chihugo ch'e Misiri, abana b'e Israeli mw'olo lusiku bagera omu mpinga y'e Sinayi. ² Bachirhengerera eRafidimu, bager'omu mpinga y'e sinayi, bachumbika omu mpinga, Israeli achumbik'ahola halolene n'entondo. ³ Musa azamuka emunda Nyamuzinda ali; Nyamuzinda amu hamagala enyanya w'entondo amubwira:Webwire enju ya Yakobo intya, wena bwire abana b'e Israeli. ⁴ Mwabone ebinajirire e 'Misiri, na gurhe bahekere oku byubi by'orhurhuli n'abalerh'emunda ndi. ⁵ Bunola akaba mwayunva omulenge gwani, n'akaba muna bwene echilagane chani, mwebe bani aha kagarhi k'olubaga, bulala egulu liri lyani. ⁶ Mwembere bwami bw'abadahwa n'olubaga luchesibwa. Bw'ebyo binwa webwire abana b'e Israeli. ⁷ Musa ahamagala abashamuka b'olubaga lw'e Israeli, abashambalira eyola myazi nk'oku Nahano ali amurhegekere. ⁸ Olubaga loshi lwashubiza mpu: Rhwajira byoshi Nahano aderhere. Musa aheka omwazi g'olubaga emwa Nahano. ⁹ Nahano abwira Musa: Tala, nyinji emund'olubaga omu bichu binene, mpuyi olubaga luyunva amango na kubwira, bana kuyemere. Musa ahek'emyazi y'olubaga emwa Nahano. ¹⁰ Nahano abwira Musa: Shimb'olubaga olugishe zene n'omusezi baful'emishangi yabo. ¹¹ Bachirheganye olusiku lwa kasharhu, bulala olusiku lwa kasharhu, Nahano ayandagala oku ntondo y'e Sinayi omu masu gw'olubaga loshi. ¹² Wajirira abantu n'embibi enyunda zoshi ona babwire: muchilange oku zamuka okula ntondo chiro n'okuhuma oku burhambi bwayo. Owahuma oku ntondo yechirw'echihano ch'olufu. ¹³ Barhaka muhumako n'efune, bemuyirhe n'amabale, changwa ba mushinge amachumu: Enyama chiro omuntu arhakalama. Amango empanda yalaka, bana shegera hofi n'entondo. ¹⁴ Musa ayandagala oku ntondo ashimb'olubaga, alugisha, bafula emyambalo yabo. ¹⁵ Abwir'olubaga mpu: Muchirhegule, omusiku esharhu, murhashegererag'omukazi n'omuguma. ¹⁶ Olusiku lwa kasharhu haba emikungulo, emirabaganyo, n'olwakungu lwaba oku ntondo, omulenge gw'empanda gwalaka bwenene, olubaga loshi lwaliri omu kambi lwa yunv'obuba. ¹⁷ Musa ahulusa olubaga omu kambi bashimba Nyamuzinda, baja omushishi w'entondo. ¹⁸ Entondo y'e Sinayi yoshi yaba myusi, bulala Nahano aliyandagere ho n'omuliro: Ogola musi gwaliri nka musi g'omuliro gunene n'entondo yoshi yadirhimana bwenene. ¹⁹ Amango omulenge gw'empanda gwa lakaga bwenene, Musa aliri aderha na Nyamuzinda ana mushubiza oku mulenge gunene. ²⁰ Obola Nahano ayandagala oku ntondo y'e Sinayi, oku songi ly'entondo, Nahanoahamagala Musa: Musa azamuka. ²¹ Nahano abwira Musa: Yandagala obwir'olubaga luchilange oku libirhira emunda Nahano ali kujilola okubulyo mpuyi banene b'omubo barhafa. ²² Abadahwa bashegerera Nahano nabo bachichese okubulyo yi Nahano arhabashurha n'olufu. ²³ Musa abwira Nahano: olubaga lurhazamuka oku Ntondo y'e Sinayi; bulala warhubuzize dubaduba omu kuderha: oshing'embibi eburhambi bw'entondo onayichese. ²⁴ Nahano amu bwira, genda, yandagala, washubi zamuka kandi haguma na Haruni: Aliko, abadahwa n'olubaga barhalibirhiraga kuzamuka emunda Nahano ali, arhabashurha n'olufu. ²⁵ Musa ayandagala emund'olubaga luli alubwir'eyo myazi.