¹ Nde oli kuguma n'omunya bwenge, na nde omenya kufafanula ebintu? Obwenge bw'omuntu bunaches'amalanga gage, n'obukali bwage bunahindamula amalanga. ² Nku bwirire: Okulikire amarhegeko ga mwami, enyanya w'endahiro ya Nyamuzinda ajirire. ³ Orhajiraga dubaduba okuja hale naye, orhanakomezaga okubera omu borhere bubi: Bulala anajira okw'alonzeze koshi koshi, ⁴ bulala omwazi gwa mwami guherhe obuhashe; na nde wanka mubwira: Chichi echi oli wajira? ⁵ Omuntu olanga erhegeko arhakamenya echintu chibi, n'omurhima gw'omwenge guyinji ebisanzi n'amango gw'okucha olubanja. ⁶ Bulala haba akashanji ka ngasi chintu n'okuchirwa olubanja, amango obuhanya bwamajir'omuntu. ⁷ Aliko arhakamenya bichi nji bya mugerera, na nde nji wamubwira gurhe nji byaba? ⁸ Omuntu arhaherhe obuhashe oku muka gwage mpu akaguyimanza, chiro na nta buhashe aherhe oku lusiku lwage lw'okufa; na ntaye wankagali chishwekula mw'eyo ntambala, n'obukali burhachiza benabo. ⁹ Nabwene ebyo byoshi, na najira omurhima gwani omu byoshi bijirika eshishi w'ezuba. Haly'amango omuntu arhegeka owindi mpu ly'amuhanyagaza. ¹⁰ Na ntyo nabonaga abakali bahekwa ebwa kuhambwa n'okuhebwa omu mahumukir, n'abakolaga omu bushinganyanya bachijira hale n'ahantu hachesezwe n'okuyibirirwa omu chishagala. Kandi okola kunali kubi. ¹¹ Bulala okuch'olubanja elugulu w'ebijiro bibi kurhalibirhirwa, omurhima gwa bene muntu gunayunjula n'ebifinjo by'okujir'amabi. ¹² Na ntyo, chiro omunya byaha akajira echibi kali egana n'oku legama bwenene, n'amenyere ok'omugisho guli gwabayubaha Lulema, bulala baherhe obuba embere zage. ¹³ Aliko omugisho gurhali gw'omubi, arhakanaba na siku zinene, ziri nka chijuchu, bulala arhaherhe obuba embere za Lulema. ¹⁴ Hali obusha bub'oku gulu: bulala haba abashinganyanya bajuhwa kukulikirana n'ebijiro by'ababi, n'ababi bajirirwa kukulikirana n'ebijiro bya bashinganyanya. Nderher'oku kandi oku buli busha. ¹⁵ Nakuza obushagaluke, bulala nta chinja oku mwen'omuntu eshishi w'ezuba arhali okulya n'okunywa n'oku chisimisa; che chikwanene oku muherekeza omu charagati ch'omulimo gwawe, omu siku z'akalamo Lulema amuhere eshishi w'ezuba. ¹⁶ Amango nahiraga omurhima gwani kushond'okumeny'obwenge n'okubon'ebikolwa oku gulu, bulala amesho g'omuntu g'arhahumuk'ezuba n'obudufu, ¹⁷ Nabona omulimo goshi gwa Lulema, nabona okw'omuntu arhakabona ebikolwa oku gulu; N'oku rhama enyanya z'oku shondereza, na nta kubona; na chiro omunya bwenge akashond'okumenya, arhakanabona.