¹ Haly'akasanzi ka ngasi chintu, akasanzi ka ngasi chintu oku gulu: ² Akasanzi k'okuburhwa, n'akasanzi k'okufa; Akasanzi kw'okurhwera n'akasanzi k'okushalula ebyahingagwa; ³ Akasanzi k'okuyirha n'akasanzi k'okufumya; Akasanzi k'okushanda n'akasanzi k'okuyumbaka; ⁴ Akasanzi k'okulaka n'akasanzi k'okusheka; akasanzi k'okuchiganya n'akasanzi k'okuzina. ⁵ Akasanzi k'okukabul'amabale, n'akasanzi k'okurholagula amabale; akasanzi k'okuhobera n'akasanzi k'okulek'okuhoberana; ⁶ Akasanzi k'okushonda, n'akasanzi k'okuheza; Akasanzi k'okulanga n'akasanzi k'okukabula; ⁷ Akasanzi k'okubera, n'akasanzi k'okuhanga; akasanzi k'okusirha n'akasanzi k'okuderha. ⁸ Akasanzi k'okusima n'akasanzi k'okushomba; akasanzi k'ebirha n'akasanzi k'omurhula. ⁹ Nyungu nchi onakola anabona omuburhindibuke bwage? ¹⁰ Nabwene akasi Lulema ahere ben'omuntu. ¹¹ Ajirire ngasi chintu chinja oku kasanzi kacho, na kandi ahirir'omu mirhima yabo omuganize gw'esiku zoshi, n'eri omuntu arhakagala kumeny'akasi Lulema anajira, kurheng'oku murhonderero kuger'okubuzinda. ¹² Nameny'oku nta chinj'abantu bakagwarha arhali oku chishinga n'oku chijirir'amenja omu kalamo kabo; ¹³ Aliko Nechi, akaba omuntu akalya n'okunywa n'oku chisimisa n'amenja m'akasi kage koshi, eyo nayo eri mpano ya Lulema. ¹⁴ Nameny'okwebi Lulema anajira nji byabera esiku n'amango, Ahola birhashobokere kuyushula changwa kukehya, na Nyamuzinda anajira ntyo bamuyubahe. ¹⁵ Echiriho chaliri burhanzi, n'echayinja chaba chaliriho, na Lulema anagalul'echagerere. ¹⁶ Nashubilola kw'eshishi wezuba ahaba hantu harheganyizw'okuch'emanja y'obubi, n'okwa hantu arheganyizwe oku jira okuli ahantu hali obubi. ¹⁷ Naderh'omu murhima gwani: Lulema nj'achir'olubanja omwinja n'omubi; bulala hali akasanzi oku ngasi chintu n'oku ngasi kasi. ¹⁸ Naderh'omu murhima gwani, oku bilolere mwene omuntu, Lulema njaba geregeza, na bonine njibachibona okubanali nyama. ¹⁹ Bulal'obuzinda bwa mwene omuntu n'obw'enyama bonabuguma; oku muguma anafa, kon'owundi anafa, boshi baherh'omuka muguma, n'omuntu arhali mukulu oku nyama; bulala byoshi buli busha. ²⁰ Byoshi binaja hantu haguma; byoshi byakwizagwa n'akachulo, na byoshi binagaluk'omu kachulo. ²¹ Ndoyinji akab'omuka gwa bene omuntu gunazamuk'elugulu, n'akab'omuka gw'enyama guna chimir'ahashi omu budaka? ²² Nabon'oku ntachinja n'echiguma omuntu akagwarha arhali oku chishinga omu kasi kage: n'ogo g'omuhango gwage. Bulala nde nji wamusimisa omu binji byaba obuzinda bwage ?