¹ Naderha omu murhima gwani: Rhugende! Njina kuyereka kugerera olumogo, nji walya okumenja, N'okubona, oku kandi biri bya busha. ² Naderha okw'amasheka: Buhwinja! N'oku olumogo : Lumalire chichi? ³ Narhol'echemezo omu murhima gwani oku rhula omubiri gwani omu divayi, na ntyo omurhima gwani gwaka nyerekeze haguma n'obwirhonzi, n'okukulikir'esire kuhika mbone echiri chinja ch'okujira oku bene omuntu eshishi w'empingu omu luganjo lw'esiku z'akalamo kabo. ⁴ Nakol'orhwasi rhukulu, na chiyumbakir'enju; na chihingir'emizabibu; ⁵ Nachijirir'amasani n'amashwa, na rhweramo emirhi y'amalehe ma ngasi lubero; ⁶ Na chijirir'endeko z'amenji, m'okushesher'oku luchiga lumerere mw'emirhi. ⁷ Nagul'abakozi n'abakozikazi, na gwarh'abana babo baburhwag'omunju, naligwerh'amaso m'enkavu n'embuzi, kulusha boshi barhangaga omu Yerusalemu. ⁸ Nachilundir'efuranga n'ehoro, n'obugale bw'abami n'ebishagala bikulu. Na chigulir'abimpiza n'abimpizakazi, n'olumogo lw'omwana w'omuntu, abakazi luganjo lunene. ⁹ Nahindamuka mukulu, mukulu bwenene kulusha boshi bali embere zani omu Yerusalemu. N'oku bwirhonzi bwani bwabera haguma nani. ¹⁰ Byoshi amesho gani galishondere, nta nagahanzaga; nta nalahizaga omurhima gwani chiro n'olumogo; bulala omurhima gwani gwalisimire akasi kani, gona muhango nanafulukene. ¹¹ Oku buzinda, narhola emirimo yoshi yajirwaga n'efune zani, n'oburhindibuke nabonaga omu kubijira; nabona oku byoshi bya busha n'okuhig'empusi na nta nyungu omuntu akanabona omu byanakola eshishi w'ezuba. ¹² Na ntyo nahindamukira ewa bwirhonzi, n'ewa buhwinja n'esire. Bulala ech'omuntu nji warhambula enyuma za mwami nja jira? Ebyabaga byajirirwe. ¹³ Nabona ok'obwirhonzi buherh'enyungu kulush'esire, nka kulala obuche buherh'enyungu kulush'omwizimya; ¹⁴ Omwirhonzi agwerhe amasu mage okw'irhwe lyage; n'omuhwinja ana lambagir'omu mwizimya. Aliko n'amenya kw'obuzinda bombi nji baba kuguma. ¹⁵ Nabwir'omurhima gwani: Nji naba kuguma n'omuhwinja; chichi charhumaga naba mwirhonzi kulusha? Nabwir'omurhima gwani kw'ebyo nabyo biri bya busha. ¹⁶ Bulala oku yibukwa kw'omurhonzi kurhali kwa loshi bwenene kulush'okw'omuhwinja, bulala omu siku zigeke zikulikire, byoshi banayibirirwa. Bichi kandi! Omwirhonzi anafa nk'ok'omuhwinja anafa! ¹⁷ Nashomb'akalamo, bulala ebijirwa eshishi w'ezuba birha chinsimisaga, bulala byoshi bya busha n'okuhig'empusi. ¹⁸ Nagaya akasi koshi najiraga eshsishi w'ezuba, bula nji kaba kashambala kw'owenji wayinja enyuma zani. ¹⁹ Nd'oyinji akaba njaba mwenge changwa muhwinja? Aliko nj'arhegeka emirimo yani yoshi, amalehe moshi m'obwirhonzi bwani eshishi w'ezuba. Ebyo na byo biri bya busha. ²⁰ Na nager'akashanji k'okuvunik'omurhima omu kubula omunihiro, enyanya z'omulimo najirire eshishi w'ezuba. ²¹ Bulala muntu mulebe akolaga n'obwirhonzi n'obumenyi haguma n'obushobozi, analeker'enyungu y'omulimo gwage owundi muntu orhakagala kubilagako. Ebyo nabyo biri bya busha n'amurhamo gunene. ²² Obo ntyo, chi chi omuntu anayunguka oku mirimo yage yoshi n'oku miganize y'omurhima gwage, y'okulerh'omurhamo eshishi w'ezuba? ²³ Esiku zage zoshi burhindibuke, n'obunguke bwage guli mugayo; N'omu budufu omurhima gwage gurha humuka. Ebyo nabyo bya busha. ²⁴ Nta chinja chiguma omuntu akabona nka kurhali kulya n'okunywa konine, n'okusimisa omurhima gwage omu kasi kage; aliko nabona akw'ebyo nabyo binarheng'omu fune za Nyamuzinda. ²⁵ Nde, wakajira ntyo, wakalya n'okushagaluka, ch'orhali nyono ? ²⁶ Bulala anah'omuntu ashashire oburhonzi, obumenyi, n'olumogo; aliko anah'omunyabyaha akasi k'okushalula n'okulunda, mpu yahereza eyi Lulema asimire. Ebyo nabyo biri bya busha kunali kuhig'empusi.