¹ Kabula omugati gwawe oku menji, bulala hano hagera esiku njiwagubona; ² Hana chiguma oku mushanvu n'oku munane, bulala orhakamenya aho buhanya bwarhengerera oku gulu. ³ Ebichu bikayunjula emvula, byanayisheshera oku daho; N'omurhi gukakumbagala, enjira enyanya changwa enjira y'eshishi, gulala murhi hagunabera halala gwakumbagaliraga. ⁴ Ololerez'omuhusi arharhwera chiro, olola ebichu arhashalula chiro. ⁵ Nka kula orhenji enjira y'omuhusi, orhenji gurhe amavuha gachiheba haguma omunda y'omukazi oli bukule, k'orhakamenya omulimo gwa Nyamuzinda ojira byoshi. ⁶ Kurhenga esezi orhwere emburho yawe n'egolo orhalekag'efune ehumuke; Bulala mw'ebyo byoshi,orhamenyere chiguma chakubera, akaba echi changwa echila, changwa chiguma changwa echindi byoshi bikwirire. ⁷ Obuche bukwira, bwanaba bwinja oku mesho okubona ezuba. ⁸ Akaba omuntu akalama myaka minene, akwanene ashagaluke omu myaka yage yoshi, n'oku kengera n'oku esiku z'omwizimya nji zaluga; ngasi byoshi nji byayinja buli busha. ⁹ W'oyo musole, oshagalukir'obusole bwawe; hira omurhima gwawe omubushagaluke omu siku z'obusole bwawe, olambangirir'oku njira z'omurhima gwawe kukulikira gurhe oli wabona n'amesho gawe ; Alik'omenye oku enyanya w'eyi myazi yoshi Nyamuzinda nj'akuchir'olubanja. ¹⁰ Na ntyo okul'oburhere omu murhima gwawe, ona kul'obubi oku mubiri gwawe; obulal'obusole n'oku gandaza biri bya busha.