¹ Esusi zifire zinalumana n'okubuza amavurha g'ochishinga; n'esire ligeke lya namuheka oku butundu n'okubukuze. ² Omurhima g'omwenge guli emalyo gage, n'omurhima gw'echinganyi guli emalembe gage. ³ Amango echinganyi chalambagira omu njira, anabulirwa n'obwenge, n'okuderha oku windi: lolaga omusire! ⁴ Nka borhere b'okuhimana buli oku w'oyo, orharhengaga aholi; bulala okusira kurhulanga oku byaha binene. ⁵ Hali omubi n'abwene eshishi w'ezuba, nka chibi chirhengerere oku oli arhangeka: ⁶ Esire lirholere ahantu hanene, n'obugale buyikere aharhulerere. ⁷ Nabona abaja bali oku Farasi n'abami balambagira oku magulu nk'abaja. ⁸ Oli wahumba echiriba nj'akubagalamo, n'oli wahindamula olusika nj'alumwa n'enjoka. ⁹ Oli wahindamula amabale nj'avunika, n'oli wachagulanga eshali nj'abona obuhanya. ¹⁰ Nk'ashongola echuma, arhanalonza okukalihya, anayushula emisi, aliko obwenge bwanabona obunguke bushinganene. ¹¹ Nk'enjoka ya kaluma kubi omukuyimpa, nta bunguke okw'oli wayimpa. ¹² Emyazi y'obunu bw'omushiganyanya buyunjwire olukogo; Aliko oku buno bw'echinganyi bwanarhuma aheza. ¹³ Omurhondero bw'emyazi y'obunu bwage liri sire, n'obuzinda bwenderho liri sire likahire. ¹⁴ Echiganyi chanayushula emyazi. Omuntu arhamenya ebinji byayinja, n'owunji wamubwira ebinji byaba enyuma zage? ¹⁵ Omulimo gw'echiganyi gunamurhamya, bulala arhakamenya ah'okuja omu chishagala. ¹⁶ Buhanya emwawe, chihugo mwami ali mwana, na barhambo yibalya kurhenga esezi! ¹⁷ Ragi lyawe, chihugo mwami w'omubuko bumenyikene, n'abarhambo balya oku kasanzi kashiganene, mpu ly'emisi yabo esera, arhali kuchiheba oku mavu! ¹⁸ Amango efune ziyolokere, akasongero kanabiha; n'amango efune zirhakola, enju yanaloba. ¹⁹ Okujira ebiryo mpu lya nyegwa, erivayi lihindamule akalamo kashagaluke, n'efuranga zashuza oku byoshi. ²⁰ Omanye wa kavuma mwami, n'omu nkengero zawe, ona menye wa kavuma omugale omu busika emunda olyama; Bulala enyunyi y'empingu nji yaheka omulenge gwawe, n'echirhungano cha yalagaza emyazi yawe.