¹ Aliko oyibuke Lulema wawe amango g'esiku z'obusole bwawe, embere esiku zibi ziyinje n'emyaka yiya chishengeza aha njiwaderha : Ntakachijira oku ndonzeze, ² embere buyize ezuba n'obuche, omwezi n'enyenyezi, n'ebichu byayinja buzinda bw'envula, ³ Akazanzi abalanzi b'enju badirhimana, abalume b'emisi yibashiga, n'abachuzi bayumangire bulala bakehere, n'abalolereza omu rhubonezo bali omu mwizimya, ⁴ Byuma bibiri byo mudende by'oku lunvi bishwekerwe oku njira amango olwamo lwakeha lw'olurhyazo,amango g'okuzuka kw'enyimpo z'enyunyi, n'okuhimwa kw'abanyere boshi bayimpa, ⁵ halala rhubona habihire ahali enyanya, halala haba obuba omu njira, ah'omurhi gwa chiyasa, ah'omuguku gurhabalala, ah'ebiryo birhachiloka, bulala omuntu nj'alegama okujira ebibamubwire esiku zoshi, na banyamulaka nji bagera omu njira zoshi; ⁶ embere omugozi gugeke gw'efuranga gwa chishwekula, esanduku y'ehoro ebereke, endaha erhadoma oku lwinji, engarha y'omutugari evunike; ⁷ embere oluchulo lugaluke oku budaka, nk'oku lwaliri, n'omuka gugalukire Nyamuzinda wamuhagago. ⁸ Busha oku busha, aderhere Omwigiriza, byoshi biri busha. ⁹ Oku handi Omwigiriza aliri mwenge, kandi ayiigiriza obumenyi oku lubaga, n'oku ludosa, okuyunvisa, n'okurhegeka oluganjo lunene lw'okucha olubanja. ¹⁰ Omwigiriza achihangana okulonza emyazi ekwirire; yabaga eyandikirwe oku bushinganyanya, eri myazi nko kubinali. ¹¹ Emyazi mishinganyanya eri nka migera, n'okuchilunda nka chitabu chiguma, eri nka misumari eshingirwe, ya hanagwa na mwigiriza muguma. ¹² Oku biyorhere, mugala wani, okule enyigirizo kw'ebi bintu; birhanahwere, nka wakalonza okujira ebitabu binene, n'obumenyi bunene kuli kurhamisa omubiri. ¹³ Muyunve obuzinda bw'emyazi: yubaha Nyamuzinda onalange amarhegeko gage. Ntyo k'oshinganene okole nka mulume yeshi. ¹⁴ Bulala emirimo yoshi Nyamuzinda njayiheka oku lubanja, n'oku byoshi bibishirwe, chibe chi kwirire, chibe chi bihire.