¹ Na lero mwabo Israeli, muyunve amarhegeko n'amahanulo ndi nabayigiriza, muzihire omu bikolwa, yi mulama munaje kushola echi chihugo Nahano Nyamuzinda waba Isho. ² Murhayushula oku mwazi n'abayigirize murhana kehyaga aliko muyunve amarhegeko ga Nahano Lulema wenyu, agana yigirize. ³ Amesho genyu gabwene ebi Nahano akolere enyanya za Bali-Peori nka kulala Nahano Nyamuzinda wenyu asherezaga bala boshi bajaga emwa Bali-Peori. ⁴ Nenyu mweshi muchishwekere oku Nyamuzinda Nahano wenyu, muchilamire kugera zene mwabo mweshi. ⁵ Nabayigirize amarhegeko n'amahanulo nk'oku Nahano wani abwiraga mpumuzikole omu chihugo mwaji shokola. ⁶ Muzifarhe munazi kole, bulala ezila bw'obwenge n'obulenga bwenyu embere z'abanya mahanga nji bayunva ago marhegeko goshi banaderha mpu: Okuli aba bantu bali banya bwenge n'obulenga. ⁷ Bulala bantu banene baherhe rhwalyangombe hofi nabo nka Nahano, Nyamuzinda werhu, oli nerhu ngasi mango mpu rhumuhamagale? ⁸ N'abantu bahe bagwerhe amarhegeko n'amahanulo gw'okuli kuguma na gala na bayandikire zene. ⁹ Ochilola, n'okulanga omurhima gwawe bwenene. Murhayibiriraga emyazi amesho gawe gabwene changwa erharhengaga omu murhima gwawe. Abayigirize, abana bawe n'abana oku bana bawe. ¹⁰ Olusiku wayumangaga embere za Nahano Nyamuzinda wawe omu Horebu, amango Nahano ambwiraga mpu: Ompamagalire abantu, nabayunvisa emyazi yani, yibachiyigiriza oku nyubaha esiku zoshi z'okulama kwabo omu gulu, bana yigirize abana babo. ¹¹ Mwabo mwanshegerera, n'oku yumanga eshishi w'entondo; entondo ya kolera omuliro gwazamu mpaka n'omu mpingu haguma n'omwizimya, ebichu by'omwizimya gunene. ¹² Nahano aderha nenyu kurhenga omu muliro, mwayunva omulenge gw'emyazi aliko nta shusho mwabwene mwayunva omulenge gonine. ¹³ Aba bwira endagano yage, abarhegeka kukulikira chiro na gala marhegeko ekumi; agayandika oku mpaho ebiri z'amabale. ¹⁴ Nahano antegeka ago mango oku mbayigirize amarhegeko n'amahanulo mpu muzikulikire omu chihugo mushabukiremo oku chishokola. ¹⁵ Lero mujage mwachilola omu mirhima yenyu kulakuba ntashusho mwabwene amango Nahano aderha nenyu kurhenga omu muliro. ¹⁶ Murhabihyaga emirhima yenyu omu kuchijirir'ebishushanyo by'okubeja, lwiganyo lw'eshusho y'omulume changwa y'omukazi. ¹⁷ Olwiganyo lw'echirhungano ch'omu gulu olwiganyo lw'enyunyi ebalala omu chanya. ¹⁸ Olwiganyo lwa choshi chibululuka oku budaka, olwiganyo lw'efi y'omu menji eshishi w'echihugo. ¹⁹ Orhanazamula amesho gawe omu mpingu, amango oli walola ezuba, omwezi n'enkununu, emiherho yoshi y'empingu ya yigirizwa okufukama embere, n'oku jira enterekero biri bintu Nahano Nya,uzinda arhuhere rhugabire eshishi, na hoshi hoshi. ²⁰ Aliko Nahano abarholere mwabo mube bantu bw'oburhwali bwage nk'oku biri zene. ²¹ Kandi Nahano andubire enyanya zani, analahira oku ntayambuka Yorodani chiro ntaja mw'echo chihugo chi kwirire Nahano Nyamuzinda wawe aguhere oku chishokola. ²² Aliko mpu nkwanene okufa muchino chihugo, ntakayambuka Yorodani, aliko mwabo mwayambuka n'okuja mwecho chihugo chikwirire. ²³ Muchilole bwenene omu mirhima yenyu murhahabaga endagano ya Nahano Nyamuzinda wenyu ajiraga nenyu mumenye murhajiragaeshushanyo y'okubeja, y'olwiganyo lw'echintu choshi choshi Nahano Nyamuzinda abahanzaga. ²⁴ Bulala Nahano Nyamuzinda wawe guli muliro guhekenya, Nyamuzinda w'olufuho. ²⁵ Barhol'amalehe g'echihugo omufune zabo, barhulerherago, barhuha oluboro baderha: Chiri chihugo chikwirire Nyamuzinda arhuhereze. ²⁶ Nyunvirhe zene oku hamiriza oku w'oyo empingu, n'egulu nji mwahera n'olufu lwa dubaduba omu chihugo chaba chawe enyanya w'e Yorodani nji murhamala yi siku, bulala nji mwayirhwa mweshi. ²⁷ Nahano nj'abashandaza hqgumq n'olubaga, nji mwayorha bageke omu charagati omu lubaga emunda Nahano arhulerhere. ²⁸ N'eyomunda, mwakolera emana emirimo y'efune z'abantu, ebirhi n'amabale, chiro birhakabamo, birhakayunva, n'okulya n'okuyunva. ²⁹ Nahola naho nji walonzeza Nahano, Nyamuzinda wawe, oyinji wabona akamulonza n'omurhima gwawe goshi n'akalamo kawe koshi. ³⁰ Amango oli omu burhindibuke, ebyo byoshi bye kuhikire. Aliko, okabikulikira omu bishanji, nji washubi galukira Nahano, Nyamuzinda wawe, wenayunviriz'omwazi gwage. ³¹ Bulala Nahano, Nyamuzinda wawe, ali Namahanga w'olukogo orhaka kulekerera arhaka na kuhanirira, arhaka yibirira echihango ch'abayisho ali ayemere. ³² Obaze amango gamira gakulikulikireho, gurhenga olusiku Nyamuzinda alemag'omuntu oku gulu n'olwindi lunda lw'empingu; harhabaga binene byabere, harhana sagiba ebintu bishushene? ³³ Ka harhabaga olubaga lwayunvirhe omwazi gwa Namahanga aderha ahakagarhi k'omuliro, nk'oku wabiyunvirhe nk'oku byaka nayorha bilamire? ³⁴ Ka harhabaga Lyangombe wa lonzeze kuyinja kuchirholera olubaga aha kagarhi k'olubaga n'obumenyi, ebimenyiso, ebisomerene, n'entambala, efune z'emisi n'okulambula amaboko, haguma n'obuhamirizi b'obuba, oku Nahano, Namahanga wenyu, e Misiri n'omu mesho genyu? ³⁵ Wali wajirirwe mudimu w'ebyola bintu, mpu y'omenya oku Nahano ali Namahanga; oku ntawindi. ³⁶ Kurhenger'empingu, akuyunvisize omwazi gwage omu ku kuyigiriza, n'oku gulu oku yerekere omuliro n'owana yunvirhe emyazi yage ahagarhi k'omuliro. ³⁷ Asimire bayisho, anachishogere abanjukuliza enyuma zabo, akukulire yenyin'e Misiri n'emisi yage. ³⁸ Abungisiz'embere zawe embaga zikomere omu luganjo n'omu misi, y'akuhira omu chihugo chabo, mpu yiba kuhereza mw'echigabi, nk'oku obibwene zene. ³⁹ Muzino siku omenye onafarhe omu murhima gwawe oku Nyamuzinda ali Namahanga wawe, enyanya omu mpingu n'eshishi omu gulu oku nta windi n'omuguma oliho. ⁴⁰ Lola ag'amarhegeko n'akuyandikire zene, mpu yi oba munyaragi, n'abana bawe enyuma zawe n'oku yushula esiku zawe omu chihugo Nahano, Nyamuzinda wawe akuhereze. ⁴¹ Nantyo Musa achishoga bishagala bisharhu, olo lwindi lunda lw'e Yorodani, obuzikiro bw'ezuba. ⁴² Oku bindi mpu yaba gererako y'olubungo y'omwisi wa yirhaga owabo arhamenyere, arhaliri mwanzi wage gurhenga mira, ana chungula akalamo kage omu kuchihira omu chiguma ch'echishagala chage. ⁴³ Hali Besera omu mpinga, omu kadekera emw'abanya Rubeni: Ramoti e Gileadi e mw'aba Galati, na Golana, e Bazana emw'aba Manase. ⁴⁴ Ahola ha Musa aheraga abana be Israeli erhegeko. ⁴⁵ Ebyola g'omarhegeko, obuhane n'olushinja, Musa ayandikira abana be Israeli, enyuma barhenga e Misiri. ⁴⁶ Haliri olundi lunda w'e Yorodani, omu kabanda kahikirire e Beta-Pero omu chihugo che Siloni, mwami waba Amoreni walamaga e Hesibona ahimwa na Musa n'abana be Israeli bachimala rhenga omu chihugo che Misiri. ⁴⁷ Bafarha echihugo chage n'echa Ogi, mwami wa Bazana. Abo bami babiri bab'Amoreni baliri okulundi lunda lwe Yorodani ebushoshokero bw'ezuba. ⁴⁸ Echishagala chabo chali rhonderere kurhengera e'Aroeri oku burhambi bw'entondo ye Amoni kuhika oku ntondo y'e Siyoni mpu ye Heremoni. ⁴⁹ Bahika ahakadekera koshi k'olwindi lunda w'e Yorodani, ebushoshokero bw'ezuba, kuhika ewa nyanja ya kadekera, ah'entondo y'e Pisaga erhonderere.