¹ Rhwahindamuka, rhwanyengera enjira y'e'Basani; Ogi, mwami we Basani arhuhikira yewe n'abantu bage boshi kurhulwisa aha Edereyi. ² Nahano ambwira, orhayubahaga: Bulala namuhebere yewe n'abantu bage n'echihugo chage omu fune zawe; omukolere kulala wanakoleraga Sihoni omwami waba Amori waliri e'Hesiboni. ³ Ntyo ku Nahano Nyamuzinda werhu ahiraga Ogi mwami w'e Basani yewe n'abantu bage boshi omu fune zerhu, rhwabashurha chiro nta muguma wayorhere. ⁴ Rhwarhola ebishagala byage byoshi ntacho rhwalekere, bishagala makumi gali ndarhu, echihugo choshi ch'e Arigobu, obwami bwa Ogi boshi omu Basani. ⁵ Ebyo bishagala byoshi byaligwerhe engurhu zilehere n'enyunvi; n'ebihagaliko by'emirhi changwa yb'ebyuma birhaliri kw'engurhu zinene bwenene. ⁶ Rhwabishereza kulala rhwasherezaga ebya Sihoni mwami w'e Hesiboni, rhwashandaza ngasi chishagala chaliri mw'abantu haguma n'abakazi n'abadorho. ⁷ Alikorhwanyegabo ebirhungano byoshi, n'obugale bw'ebintu omu bishagala, rhwaburhola nka minyago yerhu. ⁸ Rhwarhola echihugo mwago mango kuchikula omu maboko g'abami babiri,aba Amori baliri olunda lw'e Yorodani, kurhengerera omu lubanda lw'e Arononi kugera oku ntondo y'e Hermoni. ⁹ N'eyi Hermoni aba Sidoni bayihamagala Sirioni n'aba Amoni bayihamagala Sirini. ¹⁰ Ebishagala byoshi by'echihugo ch'elubanda, n'e Giliadi yoshi, n'e Basani yoshi kuhika e Saleka n'Ederei, ebishagala by'obwami bwa Ogi omu Basani. ¹¹ Bulala Ogi yenine, mwami w'e Basani wayorhaga omu misigala ya Refaimu; lola enchingo yage yaliri ya chuma: Arhali omu Raba ya bene Amoni? Maboko mwenda b'obwaliri bule bwage n'amaboko mane bwali bugali bwage oku lwiganyo ly'okuboko k'omuntu. ¹² N'echi chihugo rhwa chirhola nka kashambala ago mango; kurhenga Aroeri eri hofi n'olubanda lw'e Arononi, n'echichira ch'echihugo ch'e ntondo y'e Geliadi, n'ebishagala byage nabiha bene Ruben na bene Gadi. ¹³ N'omusigala gw'e Giliadi n'e Basani yoshi, obwami bwa Ogi; nabiha echichira cha bene Manase, echihugo choshi ch'Argobu n'e Basani yoshi, n'echo chihugo chibaderha Barefaimu. ¹⁴ Yairi mwene Manase arhola echihugo choshi ch'e Argobu kuhika emwa ba Gesuri na Abamakati abahamagaka e Basani, oku zino lyage yenine, Hawati-Yairi kugera zene. ¹⁵ Naha Makiri echihugo ch'e Gileadi. ¹⁶ Naha bene Rubeni na bene Gadi kurhenga e Giliadi kuhika omu lunda lw'e Arnoni, ahagarhi k'olubanda n'oku lubibi lwage, kuhika oku lwinji lwa Yakobo, luli oku lubibi lwa bene Amoni. ¹⁷ N'echihugo ch'e Raba, na Yorodani n'olubibi lwage, kurhenga e'Kinereti kugera oku nyanja y'eRaba, nyanja y'omunyu, eshishi oku mwandagalo gw'e Pisiga oku lunda lw'ebushoshokero bw'ezuba. ¹⁸ Nabayamagiziza na babwira ago mango mpu: Nahano Nyamuzinda wenyu abahere echi chihugo muchirhambule, mweshi, nfola miherho, nji mulambqgira n'empenzi embere z'abana b'abana b'e Israeli. ¹⁹ Aliko bakenyu na badorho benyu n'enkavu zenyu menyere oku mugwerhe nkavu zinene zabera omu bishagala byenyu nabahere. ²⁰ Kugera amango Nahano ahumusa bene benyu, kuguma n'enyu! Nabo nji bashokola haguma n'enyu echihugo Nahano Nyamuzinda wenyu abahere oku lunda lw'e'Yorodani ahanyuma mugaluke muje buli muntu ahamwage namuhere. ²¹ Mwagola mango Yoshuwa aderha mpu: Amesho genyu gachibonere ebi Nahano Nyamuzinda wenyu ajirire aba bami babiri. Intyo ku Nahano wenyu agendekera kujira amami goshi ahamwakanagera. ²² Murhayubaha, bulala Nahano Nyamuzinda wenyu akazikubalwira. ²³ Ago mango nayinginga Nahano na mubwira: ²⁴ Nahano Lulema, warhondere oku yereka omukozi wawe, obukulu bwawe n'okuboko kwawe kw'emisi: Bulala Nyamuzinda muchi wankaboneka empingu changwa egulu wakagala kujira akasi kuguma nawe, wa kagala ebila okola by'obuhashe? ²⁵ Waliha leka nshabuke eshiriza y'olwinji lw'e Yorodani, ndole oku chihugo chinja n'entondo zikwirire y'e Lebanoni. ²⁶ Aliko Nahano abaga andubire enyanya zenyu, chiro arhanyunvaga. Nahano ambwira mpu: Bikola biyerekene! Omenye wakachimbwira ebirintyo. ²⁷ Nyegera elugulu weyi ntondo Pisiga olole ebulashira zuba n'ekarhongo, n'emalambo, n'emunda lizikira; obone n'amesho gawe bulala orhashabuka olwinji lw'e Yorodani obwene. ²⁸ Ahereza Yoshuwa amarhegeko, n'oku muhira omurhima gw'oburhwali n'ogw'emisi, bulala yewe yinja waj'embere z'olubaga n'oku bahisa okushokola echihugo nji wabona. ²⁹ Hoshaho rhwabera omu lubanda, oku lunda lw'e'Beti-Peori.