¹ Musa ajibabwira aba Israeli eyi myazi yoshi. ² Aba bwira, mperhe myaka egana na makumyabiri, ntaka chihuluka changwa okujamo, na Nahano ambwiraga, orhashabuka olu lwinji lw'e Yorodani. ³ Nahano, Lulema wawe, ye wambuka embere zawe,azisa abarhayemerere embere zawe,nawe wabarhambula; na Yoshuwa ashabuka embere zawe, nk'oku Nahano aderhaga. ⁴ Na Nahano abajira nka kula ajiraga Sihoni na Ogu, abami ba Aba Amori, n'echihugo chabo bala abihyaga. ⁵ Naye Nahano ahira omu fune zenyu,nenyu mwabajira kungana n'erhegeko mbahereze. ⁶ Muchihereze emisi muna gwarhe obushiru ! Murhayobohaga na kandi murhashishwaga embere zabo; bulala Nahano, Nyamuzinda wawe, nj'alambagira yenine haguma nawe,arhakana kuleka,n'oku kulekerera. ⁷ Musa ahamagala Yoshuwa amubwira omu mesho ge Israeli boshi, abe munyamisi n'omurhima g'obushiru, bulala waja haguma naba bantu omu chihugo Nahano achigashiraga beshe mpwa abahereza;nawe wabayimya. ⁸ Naye Nahano,yewe ye wa kurhanga,aba haguma nawe,arhaka kuleka,arhakana kulekerera; orhayobohaga murhanashishwaga. ⁹ Musa ayandika eri rhegeko, ahereza abakozi, bana ba Lawi, barholaga esanduku y'echihango cha Nahano, n'abakozi boshi be Izraeli. ¹⁰ Musa, abakalihira, aderha, obuzinda bwa ngasi mwaka gwa mushanvu,omu kashanji k'omwaka gw'olusiku lukulu. ¹¹ Aba Izraeli boshi bagerere aho yibabonekana embere za Nahano, Lulema wawe,ahala agalalondola, osome eri rhegeko embere z'aba Israeli boshi omu marhwiri gabo. ¹² Balunda abantu, abalume n'abakazi n'abana, n'abahisi bawe oli omu lunvi lwawe bahabwe oku yunva n'okuyiga, oku yoboha Nahano, Lulema wawe, oku lolereza n'oku kola nko kweyi myazi yoshi ya mweri erhegeko. ¹³ N'abana babo nji barhamumenya njibamuyunva, njibayiga oku yubaha Nahano, Lulema wenyu, amango goshi nji mwalama omu chihugo,nji mwarhola chibe chenyu, enyuma z'okushabuka e Yorodani. ¹⁴ Nahano abwira Masa : Lolaga, ebisanzi byamagera wafamo. Hamagala Yoshuwa, mube omu hema ly'okubuganana, yingala babwira emirimo. Musa na Yoshuwa bagenda,bashiganana omu hema ly'okubuganana. ¹⁵ Nahano abonekana omu hema omu nkingi ye bichu;n'eyo nkingi y'ebichu ya yumanga enyanya z'olunvi lwe hema. ¹⁶ Nahano amubwira Musa; lolaga,walyama ba baisho; naba bantu bahuluka,baikulikira oku buhushi ebizimu bye bihisi bye chihugo bagenderera kuba omucho, nabo bandeka nyono n'okuvuna echihango chani, najiraga nabo. ¹⁷ Y'oburhe bwani bwa kolera enyanya zabo olola lusiku, nani naleka nababisha eshusho lyani, nabo balibwa, kandi bajilibwa n'ebintu bibi binene n'okurhindibuka n'okulumwa bwenene; kuhika baderha olo lusiku, nka rhali bulala Nahano arhali omu charagati chani b'obunola agamabi gangerere ? ¹⁸ Nani, nji nabisha loshi eshusho yani, n'olu lusiku, enyanya z'amabi moshi abaga ajirire; bulala nj'ashubiriza kuhindamukira eyo mizimu. ¹⁹ Na ntyo, muchiyandikire olu lwimpo. Oluyigirize abana be Israeli;ohire omu bunu bwabo, yibagalibera bahamiriza enyanya z'abana be Israeli. ²⁰ Bulala njina bahira omu chihugo na chigashiraga b'eshe, chibumbire marha n'obuchi; nabo elibamala kulya n'okuyugurha,n'okubakuza; yibagali hindamukira abandi balyangombe, oku babakolere, n'oku mbonerera nyono, n'okuvuna erhegeko lyani. ²¹ Kandi byaba, eri bamagwarhwa n'amabi ganene n'oburhindibuke n'amalumwa manene, waderhera olu lwimpo embere zabo nka bahamirizi, bulala orhayibagirwa omu bunu bwa bana babo; kugera zene ntazi bahir'omu chihugo nabaherezaga; ²² Kurheng'ago mango, Musa ayandik'olu lwimpo, lon'olola lusiku, ayigiriz'abana be Israeli. ²³ Nahano abwira Yoshuwa, mwene Nuni. Amubwira: Obe n'emisi n'omurhima gukulu, bunola wahek'abana be Israeli omu chihugo nachigashaga; nani nagenda n'okuba haguma nawe. ²⁴ Amango Musa abere amala yandika emyazi y'eri rhegeko, ²⁵ Musa abwira abana ba Lawi baliherhe baheka esanduku ly'echihango cha Nahano: ²⁶ Murhole echi chitabu ch'erhegeko, muna chihire ahaburhambi bw'esanduku y'echihango cha Nahano, Lulema wenyu, njinabaho nka muhamiriza enyanya zawe. ²⁷ Bulal'amenyer'omurhima gwawe gw'entambala n'obuzibu bwawe; nkaba muli bantu b'entambala enyanya za Nahano n'obo nyono nchiri n'omuka omu charagati chenyu, nka gurhe mwaba enyuma z'okufa kwani. ²⁸ Mubuganan'embere zani abashaja boshi b'amashanja goshi n'abashamuka benyu; yinji na derha eyi myazi embere zabo, na njinabajira bahamirizi enyanya zabo empingu n'egulu. ²⁹ Bulala amenyere kw'enyuma z'okufa kwani nji mwachishandula na nji mwahindamukira mwanarhenga omu njira mwayigirizwe; n'amabi nji gagerera okubagwarhwa, amango mwajira ebiri bibi omu mesho ga Nahano, kugera oku kashanji k'okuhira oburhe bwage oku mirimo y'efune zenyu. ³⁰ Musa aderha emyazi yolu lwimpo,embere y'embuganano yoshi ye Izraeli.