¹ Okayunva omulenge gwa Nahano, Nyamuzinda wawe, omu kulola n'okuhir'omubijiro amarhegeko na kuha zene, Nahano, Nyamuzinda wawe, nj'akuh'obukulu enyanya w'embaga zoshi z'oku gulu. ² Talag'emigsho yoshi njiyakuyandalako,nji yaba yawe,amango nji wayunvir'omulenge gwa Nahano, Nyamuzinda wawe : ³ Nji wagishwa omu chishagala chikulu,nji ona gishwe n'omu mashwa. ⁴ Omu burhwa w'enda yawe,elehe ly'omu budaka bwawe,ebyana by'obuso bwawe,ebyana by'amarhungo mawe manene n'amarhungo mawe madorho,ebyo bintu byoshi nji byagishwa. ⁵ Akarhanda kawe,n'enguli yawe y'eshano nji byagishwa. ⁶ Nji wagishwa omu kuhika kwawe n'omu kugenda kwawe. ⁷ Nahano nj'akuh'emisi ohim'abanzi bawe b'eyimange kukulwisa, nji bakuyinjir'omunjira nguma aliko njibayak'omu njira mushanvu. ⁸ Nahano nj'abwir'emigisho ebe haguma nawe, omu nguli zawe n'omu mirimo yawe yoshi, y'ekuhis'omu chihugo Nahano, Nyamuzinda wawe akuha. ⁹ Nahano nj'akujira lubaga luchesibwa emwage,obe lubaga luchesibwa,nk'okwa kulahizaga,amango wakenga amarhegeko ma Nahano, Nyamuzinda wawe, n'oku lambagir'omu njira zage. ¹⁰ Embaga zoshi zelole oku hamagerwe omu zino lya Nahano, na nji bakuyubaha. ¹¹ Nahano nj'akuha bintu binene, n'okukuha abana banene, ebyana by'amarhungo mawe, n'emburho z'obudaka bwawe, omu chihugo Nahano alahizizaga ba yisho okukuhacho. ¹² Nahano y'ekuchingulire,obugale bwage,empingu'li arhumira echihugo chawe,envula omu chigamiro chayo n'okugisha akasi koshi k'efune zawe; We hoze embaga zinene, aliko orhakachihoza. ¹³ Nahano nj'akujir'erhwe s'arhali muchira, nji waba enyanya na nta lusiku njiwaba ahashi amango nji wanyunviriz'amarhegeko ma Nahano, Nyamuzinda wawe, namabaha zene, amango wamakenga n'oku mahir'omubijiro, ¹⁴ n'okurhahindamukir'ekulyo changw'ekulembe wa marhegeko moshi na makuha zene, n'oku kukulir'abandi banyamuzinda n'oku bakolera. ¹⁵ Aliko akaba orhayunvirh'omulenge gwa Nahano, Nyamuzinda wawe, akab'orhakengere n'okuhir'omubijiro amarhegeko moshi, n'amabwiriza moshi namakuha zene, talaga emivumo yoshi yayinj'enyanya zawe n'okukufarha. ¹⁶ Nji wavumwa omu chishagala chikulu n'okuvumwa omumashwa. ¹⁷ Akarhanda kawe n'enguli yawe y'eshano nji byavumwa. ¹⁸ Abana b'omunda yawe,emburho y'omu budaka bwawe,ebirhungano byawe binene,n'ebirhungano byawe bidorho,ebyo bintu byoshi nji byavumwa. ¹⁹ Nji wavumwa omukuhika kwawe n'omukurhenga kwawe. ²⁰ Nahano njakurhumira omuvumo, omurhula gugeke n'oku kemerwa omu ngasi kasi nji wajira, kugeza amango m'okulimbuka, kugez'amango wahera juba, kubushi w'okububi bw'ebijiro byarhumga wandeka. ²¹ Nahano njakuhirako ebinyoho kuger'amango ya kuhira omu chihugo chaja kuba chawe. ²² Nahano nji akushurha n'endwala y'echitundu,eshushira,obushugizi,echuka ch'okuhisa,kuyumya emyaka,endwala y'obudiku n'okushali, nji byakuhiga kuhika amango m'okuhera. ²³ Empingu eri enyanya w'erhwe lyawe nji yaba y'omulinga n'obudaka buli eshishi wawe nji bwaba bw'echuma. ²⁴ Nahano nj'arhuma nka nvula y'echihugo chawe omuchuchu n'eshano; nji byakuchimirako, kurheng'empingu kugera amango webe waburhindibuzwa. ²⁵ Nahano nja leka oshurhwe n'abanzi bawe,nji wahuluka kuja kulwa nabo omu njira nguma,aliko nji wabugana embere zabo omu njira mushanvu na kandi nji waba chintu ch'okuyubahisa oku mami moshi m'egulu. ²⁶ Echifu chawe nji chaba biryo by'enyunyi zoshi z'empingu n'ebinyalubala z'egulu, harhakaba n'omuntu wokuzibuz'omurhula. ²⁷ Nahano nji akushurha n'ebimerera by'e Misiri, n'okukunuka ehende, n'amahere n'ebikujenge orhakana galakubifuma. ²⁸ Nahano nja kushurha n'esire, n'obuhumi n'obugalugalu bw'omurhima. ²⁹ Nji wahumahuma ezuba likulu kul'empumi enahumahuma omu mwizimya,orhakagala omu rhwasi rhwawe,n'enji walibuzwa esiku zoshi,n'oku nyegwa na harhakab'omuntu weyinje kukurhabala. ³⁰ Nji washab'omukazi,owundi mulume analala naye;nji wayumbak'enju orhakayiyikalamo,nji wahing'eshwa ly'emizabibu aliko orhakalya oku malehe mayo. ³¹ Empanzi yawe nji yayirhwa wabona, orhakalyako, efarasi yawe nji yagwa embere zawe nji zahabwa abanzi bawe, harhakaba n'omuntu muguma w'okukurhabala. ³² Bagala bawe,na bali bawe nji bahanwa oku lundi lubaga n'amesho mawe nji mabona n'okuhenguza omu kuchifijabo olusiku lugumaguma n'okuboko kwawe nji kwaba buzira misi. ³³ Olubaga nji waborhenji,ni lwaly'amalehe m'obudaka bwawe na kandi nji walenganywa,n'okuhondwa esiku zoshi. ³⁴ Nji wasireha omu kubon'ebya mesho mawe nji mabona. ³⁵ Nahano yekushurhe amadwi mawe n'ebihinga byawe n'eseke lidarhi orhakafuma,ye kushurhe kurhenger'omu ndabarhiro kuger'okuvuha ly'erhwe lyawe. ³⁶ Nahano njakuheka,woyo n'omwami nji waba wahirirwe enyanya zawe,omu chihugo orhenji,abe woyo,abe bayisho. N'eyomunda,nji wakolera abandi banyamuzinda b'omurhi na b'ebale. ³⁷ Na kandi nji waba chintu cho kurhangaza, chintu ch'omugani na ch'okakeno. ³⁸ Nji warhwer'emburho zinene omushwa lyawe aliko nji washalula zigeke bula enzige nji zazirya. ³⁹ Nji walya emizabibu n'okuyiyufira;orhakananywa oku divayi,orhakanashalula choshi choshi,bula omuka nji gwazirya. ⁴⁰ Nji wagwarha emizetuni omu chihugo chawe choshi, aliko orhaka chishig'amavurha,bula ezeituni nji za hungumuka. ⁴¹ Nji waburha abarhabana n'abanyere; aliko barhakaba bawe, bulala nji baj'omu buja. ⁴² Ebihuka nji bya chirholer'emirhi yawe yoshi n'amalehe m'obudaka bwawe. ⁴³ Omulibisi nji waba omucharagati kawe nj'azamuka esiku zoshi bwenene enyanya wawe, nawe nji wachima esiku zoshi eshishi bwenene. ⁴⁴ Nj'akuhoza,si woy'orhakamuhoza; nj'aberhwe,nawe nji waba muchira. ⁴⁵ Eyi mivumo mibi yoshi nji yakuyinjira enyanya yawe,nji ya kukulikira n'okukufarha kuger'amango walimbulwa,bula nji waba orhayunviraga omulenge gwa Nahano, Nyamuzinda wawe, bulala nji waba orhakengaga amrhegeko n'amabwiriza mage amakuha. ⁴⁶ Nji maba esiku n'amango emwawe n'abana bawe nka bimenyiso n'ebirhangaza. ⁴⁷ Bulala nji waba orhakoleraga Nahano, Nyamuzinda wawe, n'omwishingo n'omurhima mwinja, omu kulugirwa n'ebintu byoshi. ⁴⁸ Nji wakolera abanzi bawe abo Nahano njakulerhera enyanya wawe omu shali,enyorha,omu butambara,n'omu kubula ngasi chintu. Nahano nj'ahir'omuzigo gw'echuma omugozi lyawe,kuger'amango aba amakulimbula. ⁴⁹ Nahano nja lerh'olubaga enyanya wawe, kurhenga hale hale oku musikesike gw'egulu, nka kula chibarhula anabalala, olubaga orhenji olulimi lwalo. ⁵⁰ Olubaga luherhe amalanga g'obukali na kandi burhakajir'obukenge b'omushaja, neri obonjo bw'omwana. ⁵¹ Nalo nji lwalya aba burhwa b'obuso bwawe n'amalehe m'obudaka bwawe,kuger'amango walimbulwa;lurhaka kulekera abe engano,abe mavu,abe mavurha,abe echana ch'enkavu yawe n'ebibuzi byawe,kuger'amango nji lwaba lwama kuheza. ⁵² Nji wayikala omu nyunvi zawe zoshi, kuhik'amango engurhu zawe zinene zarhoga, ezi ngurhu zilehukire zinakomere, wabag'onachizera omu chihugo chawe,choshi,nji lwa kurhera n'oku kugorha omu mbuga zawe,omu chihugo Nahano, Nyamuzinda wawe, akuha. ⁵³ Omu malibuko n'emilago omwanzi nja kuhiramo,nji walya abana bawe;abarhabana n'abanyere,aba Nahano, Nyamuzinda wawe, njaba akuhere. ⁵⁴ Omulume wali mwinja hagarhi kenyu,nj'agwarh'elisho libi oku mwene wabo n'oku mukage,n'oku bana bage bayorhere; ⁵⁵ Arhakaha chiro n'omuguma wabo oku minyofu ya bana bage ajirire biryo byage,bula ntacho ayorhene ahagarhi k'omulago n'amalibuko omwanzi wawe nja kuhiramo omu mbuga zawe. ⁵⁶ Omukazi wali mwinja bwenene ahacharagati chenyu, analikomere obwirhonzi, orhakahirire okugulu kwage ahashi, kugerer'obwinja n'obwirhonzi,nj'agwarha elisho libi okw'eba,oku mugala n'oku mwali; ⁵⁷ Arhakabaha n'akatyu oku chizinda chizidohere charhogaga omu magulu mage, n'oku bana nja burha, bulala, omukubulirwa byoshi,nja bajira biryo byage omu bwibisho,ahacharagati ch'oburhindibuke n'emilago omwanzi nja kuhiramo. ⁵⁸ Nj'okab'orhakengere n'okuhir'omu bijiro, ebinwa bw'eri rhegeko ly'achichi liyandikire mwechi chitabu, akaba orhayu bahire eri zino likengwa linayubahisa lya Nahano, Nyamuzinda wawe, ⁵⁹ Nahano nj'akushurha omu njira zirhanganyizwe w'oyo n'abana bawe n'ebyola binene na by'okulegama, n'endwala zikalihire zigende fuma. ⁶⁰ Nj'alerh'enyanya zawe,endwala zoshi z'e Misiri,z'abaga zina kuyubahisa, nazo nji zakukulikira. ⁶¹ Na kandi, Nahano, nj'alerha enyanya zawe, kurheng'amango walimbuka,ngasi mpiriri z'endwala, n'ebyago birhayandikirw'omu chitabu ch'eri rhegeko. ⁶² Nji mwayorha bantu bageke,mu mwali banene nka nyenyezi z'empingu,akaba nji waba orhayunvirhe omulenge gwa Nahano, Nyamuzinda wawe! ⁶³ Nk'oku Nahano asimag'oku bakoler'amenja;n'oku jira banene,konako nja simiswa oku bamala n'oku balimbula,nji mwa shugulwa n'okukulw'omu chihugo mwaja kurhola. ⁶⁴ Nahano nja kushandaguza omu mbaga zoshi,kurhenger'entonderero y'egulu n'emusikesike, n'eyola nji wakoler'abandi ba lulema,abe woyo, abe ba yisho, b'omurhi nab'ebale. ⁶⁵ Mwezo mbaga, orhakabon'omurhula, orhabon'ahantu hokuhumus'endabarhiro y'amagulu mawe. Aliko Nahano nja kuh'omurhima gw'oku dirhimana amesh'omu kuluma n'omurhima gwaluma. ⁶⁶ Akalamo kawe nji kaba nkorhalamire,wedirhimane obudufu n'ezuba, orhakayemer'okolamire. ⁶⁷ Kugerer'obubi nji bwayunjul'omurhima gwawe n'eby'amesho mawe nji mabona wechifije esezi : Egolo liyinje duba, n'egolo wechifije esezi liyinje duba. ⁶⁸ Na Nahano yekugalul'e Misiri omu marho, na kandi nji wagera mweyi njira na kubwiraga oku orhakachiyibona! Eyo munda, nji mwa chiguza oku banzi benyu nka bajakazi, harhakanaba habe n'omuntu muguma w'oku bagula.