¹ Musa n'abashaja b'e Israeli baha olubaga lino rhegeko: Mukeng'amarhegeko na kuha zene. ² Hano mumali kushabuka e Yorodani n'okuj'omu chihugo, Nahano, Nyamuzinda wawe, akuha, wanayumanza amabale manenene, wanamashing'engokola z'omweru. ³ Njo yandike kwamo mabale,ebinwa byoshi byeli rhegeko,han'omala kushabuka Yorodani omu kuj'omu chihugo Nahano, Nyamuzinda wawe akuha, chihugo cheshend'amarha n'obuchi,nko kwa kubwiraga Nahano, Lulema wa ba Isho. ⁴ Hano mumalishabuka Yorodani, mwanayimanza oku ntondo y'Ebal amo mabale mbabwirire zene oku mumayimanze, onamashig'engokola z'omweru. ⁵ Ahola nj'oyumbakira Nahano olurhamba lw'amabale namo mabale nine marhahumwagako n'echuma. ⁶ Oyumbake olurhamba lwa Nahano, Nyamuzinda wawe, n'amabale marhachongirwe.kolo lurhamba, ohe Nahano, Nyamuzinda entulo y'okuyoswa; ⁷ Nj'ohane entulo z'okusimisa, nj'onalire ahola n'okushinga embere za Nahano, Nyamuzinda wawe. ⁸ Nj'oyandike kwamo mabale,ebinwa byoshi byalino rhegeko,n'okubiseza bwinja,bwinja. ⁹ Musa na badahwa, bo Balawi, babwira Israeli yoshi, n'oku derha : Israeli,ochilange onayunve ! Zene, wamahindamuka, lubaga lwa Nahano, Nyamuzinda wawe. ¹⁰ Okenge omulenge gwa Nahano, Nyamuzinda wawe, onahire omu bijiro amarhegeko mage n'oburhegesi bwage na kuha zene. ¹¹ Olo lusiku,lonolo, Musa ah'olubag'eri rhegeko : ¹² Hano mumalishabuka Yorodani, Simeoni, Lawi, Yuda, Isakari, Yusufu na Benjameni, bayimang'oku ntondo ye Garizimu, enyanya y'okugisha abantu; ¹³ Na Rubeni, Gadi, Azeri, Zabuloni, Dani na Nafutali, bayimang'oku ntondo y'Ebal enyanya y'okuderha emivumo. ¹⁴ N'aba Lawi berhole echinwa n'oku derha n'omulenge munene kubwira Israeli yoshi : ¹⁵ Avumwe,omuntu wakwiza eshusho y'oku beja changwa eshusho y'oku bashushanyize, obubi bwa Nahano, emirimo y'efune z'omubeji, n'okubika ahantu habishirwe ! N'abantu boshi bashubize n'oku derha : Bibe ntyo ! ¹⁶ Avumwe,omuntu wasuzagur'eshe na nina. N'abantu boshi b'eshubize : Bibe ntyo ! ¹⁷ Avumwe,omuntu washegez'olubibi l'omuturanyi wage. N'abantu boshi b'eshubize : Bibe ntyo . ¹⁸ Avumwe omuntu wahabul'empumi omu njira.N'abantu boshi beshubize : Bibe ntyo. ¹⁹ Avumwe,omuntu wa bihy'obulenganjira b'omuntu w'elwahanda. N'abantu boshi beshubize : Bibe ntyo. ²⁰ Avumwe,omuntu walala na muk'eshe,bula ashukwir'enyambiko yeshe. N'abantu boshi baderhe : Bibe ntyo. ²¹ Avumwe,omuntu walala n'enyama yoshi yoshi. N'abantu boshibeshubize : Bibe ntyo . ²² Avumwe,omuntu yeshi walala na mwali wabo,mwali w'eshe changwa mwali wa nina. Nabantu boshi beshubize : Bibe ntyo . ²³ Avumwe,omuntu walala na mulamukazi wage ! N'abantu boshi beshubize : Bibe ntyo. ²⁴ Avumwe omuntu washurh'omuturanyi wage omu bwibisho. N'abantu boshi beshubize : Bibe ntyo. ²⁵ Avumwe omuntu wayankirira empano y'okushesha eshagama y'orhaherhe chaha. N'abantu boshi beshubize : Bibe ntyo. ²⁶ Avumwe,omuntu yeshi orharhunganyize,ebinwa byeyi torati byana marhegeko,n'orhabihirire omubijiro. N'abantu beshubize : Bibe ntyo.