¹ Amango nji waba wamaj'omu chihugo Nahano, Nyamuzinda wawe, akuha nk'akashambala, amango wa chigwarha,n'oku chiyikalamo, ² nji warhol'omushaku murhanzi gw'amalehe moshi weshalule omu budaka omu chihugo Nahano, Nyamuzinda wawe, akuha, nji wamahir'omukarhanda, n'okuja ahantu Nahano, Nyamuzinda wawe achishogere, mpu y'oyikaz'ezino lyage. ³ Nj'ochiyerekan'emw'omudahwa,oli omu kasi n'oku mu bwira : Nyemerere zene emunda Nahano, Nyamuzinda wawe, oku nagerere omu chihugo Nahano alagizizaga ba darha okw'arhuhacho. ⁴ Omudahwa ye rholere akarhanda kurheng'omufune zawe,n'oku karhabika embere y'olurhamba lwa Nahano, Nyamuzinda wawe. ⁵ Nji warhola kandi echinwa n'oku derha embere za Nahano, Nyamuzinda wawe: Darha aliri Muamori w'engenzingenzi;achimir'e Misiri n'abantu bageke,alam'eyola;eyo lwahindamuka lubaga lunene, luherh'obushobozi n'abantu banene. ⁶ Abanya Misiri barhulibuza n'okurhulenganya,n'oku rhukolesa emirimo y'obuja budarhi. ⁷ Rhwaband'endulu emunda Nahano ali Lulema wa ba darha. Nahano ayunva omulenge gwerhu, anabona n'obulenzi rhwakolerwag, amalibuko merhu, n'emilago yerhu. ⁸ Nahano arhukul'e Misiri, kugerera efune y'emisi n'okuboko kulambwirwe,haguma n'ebirhangaza by'okuyubahisa,haguma n'ebijiro,n'ebisomerene. ⁹ Arhulerha hano hantu n'okurhuha chino chihugo,chihugo chiri chadwa amarha n'obuchi. ¹⁰ Lero lolaga, nalerha omushalulo murhanzi gw'amalehe m'obudaka,wampaga, w'oyo Nahano ! Wana marhabik'embere za Nahano, Nyamuzinda wawe, n'okufukama embere za Nahano, Nyamuzinda wawe. ¹¹ Buzinda wanachishinga haguma n'omunya Lawi nahaguma n'omulibisi waba ali ahacharagati chawe, ku bintu byoshi Nahano, Nyamuzinda wawe, akuhere, w'oyo n'enju yawe. ¹² Hano nj'oba wamamala kuhana chiguma ch'ekumi ch'omushalulo gwawe goshi, omwaka gwa kasharhu, mwaka gwa chiguma ch'ekumi, nj'ochihereze omu Lawi, omulibisi, efubi n'omushumbakazi; nabo nji balye, banayugurhe ahamwawe. ¹³ Nj'oderhe embere za Nahano, Nyamuzinda wawe : Nakulire omu mwani,ebintu bichesibwa, kukulikiza amarhegeko mawe moshi wambwiraga;ntavunaga neri ntayibiriraga naliguma ly'amarhegeko gawe. ¹⁴ Ntacho na lire kwebi bintu amango m'omushibo gwani,ntacho na bishire mpu nchikolese ebirhakwanene na ntacho n'echiguma n'ahere abafu; na kengere omulenge gwa Nahano, Nyamuzinda wani, nanakolere kukulikir'amarhegeko moshi wampere. ¹⁵ Olole kurheng'omu chikalo chawe chimana,kurheng'empingu,obon'ogish'olubaga lwawe lwe Israeli, n'echihugo warhuhere,nko kuwabilaganyaga ba darha, echi chihugo chashendamo amarha n'obuchi. ¹⁶ Zene, Nahano, Nyamuzinda wawe, akuhemer'okuhir'omubijiro amarhegeko aba yigirize n'oburhegesi bwage. Nj'omakenge, nj'ona mahire omu bijiro n'omurhima gwawe n'akalamo kawe koshi. ¹⁷ Zene, wamalaganya Nahano okwaba Lulema wawe, n'oku walambagir'omunjira zage, n'oku wakenga amarhegeko aba yigirize n'oburhegesi bwage n'okuwayunva omulenge gwage. ¹⁸ Zene,Nyamuzinda amakulaganya oku nji waba lubaga lwage, nk'oku akubwiraga, n'oku nji wakenga amarhegeko mage moshi. ¹⁹ Oku buzinda akuha, enyanya ly'embaga zoshi alemaga, obukulu omwirenge, omu buwaliha, n'omu chubahiro,nanty'obe lubaga luchesibwa lwa Nahano, Nyamuzinda wawe, nko kwa kubwiraga.