¹ Okabona empanzi changwa echibuzi ya mwene wenyu ya herere, orha yi zimbaga, galula yo emwa mwene wenyu. ² Akaba mwene wenyu arhalamire hofi nawe; arhana mumenyere; Rhola woyo chila chibuzi omu mwawe china yorhe omumwawe kugera amango mwene wenyu achihuna, na honaho omugalulire cho. ³ Nji wajira ntyo oku ngamiya yage, oku mushangi gwage, wejire ntyo ku ngasi kantu akaheza n'akaba wakabwene orhaka kaheza chiro ku kayiba. ⁴ Okabona epunda changwa enkavu ya mwene wenyu ya rhembere omu njia, orhayizimbaga, wa mugwasa oku yirhalula muyiheke. ⁵ Omukazi arhahira akayambala omushangi g'omulume, n'omulume arhahira akayambala omwambalo g'omukazi; bulala owejire ntyo ey'abagayisa Nahano, Nyamuzinda wawe. ⁶ Ey'okashimana omu njira yawe ologo lw'enyunyi oku murhi, changwa omu njira lulimo amaji changwa abana na nina abashukire eri maji eri byana; orharholag'abana na nina. ⁷ Oleke nina agende orhole ebyana y'oba n'omurhula n'esiku z'akalamo kawe zanaluga. ⁸ Oka yumbaka enju yawe mpyahya, jira olusika burhambirhambi, yi orhahira eshagama okunju yawe, amango omuntu achikubire ho. ⁹ Orhahiga okarhwera mburho ebiri omushwa lyawe ly'emboko, nji waka chiganya nka wahingaga mburho nguma. ¹⁰ Orhahiraga okahira n'empanzi n'engamiya bishwekerwe haguma; ¹¹ Orhahiraga okayambala omwambalo guhangirwe n'eyuzi zirha shushene. ¹² Nji waheba emikunjo oku mirhambi ene y'omushangi ochishukire. ¹³ Akaba omulume muguma, arholere omukazi ana mushegerera, bigeraho ayunva arhamusimire; ¹⁴ Aka muburanya oku bintu byeshonyi, mpu: Narholaga oyu mukazi, nji mushegerera na shimana arhagwerhe bikira. ¹⁵ Honaho eshe na nina wanya munyere, banarhola ebimanyiso by'ebikira byola munyere, bana bihekera abahanuzi oku lunvi lw'echishagala. ¹⁶ Eshe w'omunyere anabwira abakulu b'ehano; na here oyu mulume mwali wani nka mukage, amurhola nk'arhamusimire; ¹⁷ Amujirire ebinu by'eshonyi; mpu: arhashimanaga omunyere wani agwerhe ebikira. N'obo, lola echimenyiso ch'ebikira ch'omunyere wani. Arhinda omushangi gola munyere embere z'abakulu b'ehano. ¹⁸ Abakulu b'ehano, barhola nyamulume mwecho chihugo ba muhana. ¹⁹ Na bulala ahezeze omunyere we Israeli erenge omu kuderha eby'eshonyi, bamucha echiru cha bihumbi egana by'efuranga. Aziha eshe w'omunyere, n'omunyere ayorhe mukage kuhika esiku z'aakalamo kabo koshi buzira kumulibirhako. ²⁰ Aliko okubishiinganene, akaba omunyere arhagwerhe ebikira; ²¹ Belerhe oyo munyere ahamwabo, abantu b'echo chihugo b'emushurh'amabale anafe, bulala ajirire obuhushi omunju y'eshe. Nji wakula obubi ahakagarhi kawe. ²² Bakashimana omulume ahusha n'omukazi oshabirwe n'omulume; bombi okubali babiri banafa; omulume wahushaga n'omukazi, n'omukazi konako. Nji wakula obubi aha charagati ka Israeli. ²³ Akab'omunyere agwerh'ebikira, aganizizwe, n'omulume ashimane omu chishagala n'okuhusha naye. ²⁴ Mwana balerha boshi babiri embere y'olunvi lw'echishagala; Mubayirhe n'amabale, omunyere bulala arhali bandire akalulu omu chishagala n'omulume oku asuzagwize muk'owabo; Nji wakula obubi aha charagati kawe. ²⁵ Aliko akaba omushwa moyo mulume shimanire oyo mukaganizizwe, amufarhe oku misi ana muhusheko, omulume wahushire naye, yenyine yibechire olushinja l'okufa. ²⁶ Ntako wajira omunyere orhagwerhe chaha chakarhuma afa, bulala bishushene n'ok'omuntu ayinja anashabirira oku wabo n'oku mushinga akere anafa. ²⁷ Oyo mwananyere omulume ashimanire omushwa, abandire akalulu arhanabona owamurhabala. ²⁸ Omulume akala ashimanana n'omwananyere ogwerh'ebikira orhazi ganizwa, amugwarhe oku misi amuhusheko, bababone; ²⁹ Oyo mulume wa hushire naye anaha eshe w'omunyere Shekeli makumi marhano g'efuranga, na bulala ahezez'ebyo munyere erenge, yemurhole abe mukage buzira kumulibirhako akalamo kabo koshi. ³⁰ Ntaye orhegekerwe kurhola muk'eshe nka mukage, arhakana shukula obulingirhi bw'eshe.