¹ Amango Nahano, Nyamuzinda wawe, aba amashengula lulala lubaga Nahano, Nyamuzinda wawe aku hereze echihugo; amango webe waba higire okanalama mwecho chishagala n'omunju zabo; ² Nji wakula bihugo bisharhu ahagarhi k'echihugo Nahano, Nyamuzinda wawe, akuhereze walamamo. ³ We yerekane mo echihanda nji wagaba mwo bichira bisharhu bye bishagala, echihugo Nahano, Nyamuzinda wawe, akuhereza nka kashambala; Binabe ntyo mpuyi ngasi munizi ya chihiga mw'ebyo bishagala. ⁴ Oku muhigo gurholerwe ku ngasi munizi w'echihige eyo mpu yalanga akalamo kage, amango abere ayirhire mwene wabo arhabishire arhana chijiraga kuba mushombanyi wage kurhenga amango goshi. ⁵ Lwiganyo, omuntu ajira emirhi omu lubala n'owabo, embasha eri omufune, achi nanule omuch'omurhi, embasha charhukegwe owabo omurhe, n'okufa. Obola akalibirhira omu chishagala chiguma checho chishagala omu kulanga akalamo kage. ⁶ Owachiholera, chi washesher'eshagama, arhakulikiraga omunizi, anachigwerh'oburhe, ahaba akamukulikira omu njira elehere, n'okumushurha kuhik'okufa; n'obo arhali kwanene kufa, bulala kurhenga mira arhaliri mushombanyi wage. ⁷ Cho chirhumire nkuhere elira rhegeko: Welekane bishagala bisharhu. ⁸ Amango Nahano, Nyamuzinda wawe aba ama lambul'embibi zawe, nk'oku ali abiderhere emwaba yisho; eyi ahali akuhere echihugo choshi ali alaganyize ba yisho oku akuhereza. ⁹ Bibe ahubwe oku wakenga ona kulikire ago marhegeko goshi n'akurhengekere zene; y'osima Nahano, Nyamuzinda wawe, ona lambangire omu njira zage; washibi yongera bishagala bisharhu ku bilala bindi. ¹⁰ Mpu y'eshagama erhagwerhe zabyo, erha sheshekeraga aha charagati g'echihugo Nahano, Nyamuzinda wawe, akuhereze nka kashambala, yo rhakana hanirwa obunizi. ¹¹ Aliko, omuntu aka libirhira omu chiguma ch'ebyo bishagala byenyu, omalire kujir'owabo omu luvebo, k'olwango enyanya zage, achimala murhunganya n'oku mushurha kuhik'okufa. ¹² Abakulu b'ehano b'echo chishagala, be murhume kumufarha n'oku muhana omu maboko g'abachiholera obunizi. ¹³ Orhagendaga wamulola n'elisho ly'olukogo, nji waheza omu Israeli, eshagama erhagwerhe zabyo, wenabe munyaragi. ¹⁴ Orhagendaga washegeza enyuma akarhi kw'owenyu k'olubibi bashokulu benyu bashingaga, omu kashambala webone omu chihugo Nahano, Nyamuzinda wawe, akuhereza. ¹⁵ Mudimu muguma arha yenere enyanya za mulume muguma, omuku yemeza obubi bwage changwa echaha; choshi nk'oku chinali: Omushinganyanya buderherwe n'abantu babiri eri basharhu b'obu yemerwa. ¹⁶ Amango omudimu w'obubeshi ana yumuka kubeshera omuntu oku anigire. ¹⁷ Abola bantu babiri beburane embere za Nahano, n'embere z'abadahwa bakulu n'abachib'emanja bali omu mirimo. ¹⁸ Abachib'emanja, bejire obulolerezi bukwirire. Omudimu, ali mudimu w'obubeshi, ali mudimu w'okubinali mwene wabo, ¹⁹ Na ntyo mwemukolere nk'oku aligwerhe omurhima gw'okukolera, mwene wabo. Ntyo ku nji wakula obubi buli omu charagati kawe. ²⁰ Abandi beyunve, nji bayubaha oku kola amabi gali nkagola, ahakagarhi kawe. ²¹ Orhakaba n'elisho ly'obonjo; akalamo oku kalamo, elisho oku lisho, oku linyo oku linyo, okuboko oku kuboko, oku gulu okugulu.