¹ Omubirhungano byawe bizibuzibu changwa bigekegeke, orhahira okabaagira Nahano Nyamuzinda wawe echirema changwa echirikw'eshembo; kugayisa bigayisa Nahano, Nyamuzinda wawe. ² Omuchishagala chiguma omu bishagala Nahano, Nyamuzinda wawe, aguhereza, omulue changwa omukazi wajira eby'okugayisa Nahano Nyamuzinda wawe omu kuvuna endagano yage, ³ nk'oyo muntu ajirikolera abandibandi banyamuzinda akanayinama emalangambere gabo n'emalangambere g'ezuba, g'omwezi changwa emalangambere z'ogundi murhwe gw'emalanga; oku ntarhegekere, ⁴ eri bakamukomera emalangambere gawe, okaamuyunviriza n'oku mudosereza bwinja bwinja, okashimana okukubindi ago mabi gakalirwe omu Israeli. ⁵ Ago mango wanahulusa nyamulume changwa nyamukazi wajiraga ago maligo,aje embuga ly'olugo bamukabulire amabale arhengem'omuka. ⁶ Omu kuchirwa olubanja bantu babiri bakayemeeza ago maligo,oyo mulume changwa oyo mukazi anachirwa olufu; omuntu arhakayirhwa oku buyemezi bwa muntu muguma. ⁷ Ly'obubi burhenga omu lugo, abayemezaga banarhanga oyo muntu kw'amaboko n'abandi boshi banamuzindako. ⁸ Nka hali olubanja lukuzongere; lw'akiyirhana, lw'obuhaka changu lw'okushembangana, lubanja lulebe omu lugo lwawe, wanabangula onyegerere hala hantu Nahano Nyamuzinda wawe achishogere; ⁹ Ojilonza abadahwa b'omu buko bwa Lawi, bazuzi bachi b'emanja bali bakola ago mango baguhugulire gurhe bachire olubanja. ¹⁰ Bihunire okukulikira ogo mwazi bakumenyisaga ahola hantu Nahano achishogere. Orhanafundaga kukola nk'okubanakuyerekaga. ¹¹ Kona kuguma okole nk'okubanakuyerekezaga na nk'oku njibakuchira olubanja buzira kugera eburhambi bw'omwazi bakubwira. ¹² Nkahabere omuntu wamarhwiri mazibu, arhayunva mudahwa ali okulera Nahano Nyamuzinda wawe arhanayunva n'omuzuzi, oyola oshinganene olufu na kula Israeli kw'echihemu. ¹³ Engabo yoshi emenye ntyo eyubahe inaleke okurhayunva. ¹⁴ Amango waba wahikire mu chila chihugo Nahano Nyamuzinda wawe nja guha oba wachirholere wanayumbakiremo, aho wanashambala mpu: Nayimika mwami wa ntegeka nk'oku agandi mashanja gabalungwe gajira. ¹⁵ Omwami wayimika, akurhambule abe eyi Nahano Nahano Nyamuzinda achishogere, abe muguma omu bene benyu. Orhankayimika owelwahanda mpu yekurhambulage arhanali mwene wenyu. ¹⁶ Aliko, ntamango oyo mwami njyarhungage efurasi zinene changwa agalule olubaga e Misiri mpu ly'aluza empinga lya abalwira oku furasi, kula kuba Nahano akubwirire oku murhagachigalua mweyo njira. ¹⁷ Nj'arhahalikaga abakazi nji arhanayalizaga efuranga zage n'ehoro zage kubi nji byakamuheza. ¹⁸ Hano nji aba amayikala oku ntebe y'obwami, nji byahuna ayandike eri rhegeko omu chitabu akazi soma yenine; rhegeko lyarhenga omu chitabu ch'abadahwa baba Lawi. ¹⁹ Esiku zoshi z'akalamo kage, akaziba n'echi chitabu aha anali n'oku chilolamo ngasi lusiku. K'okwarhuma ayubaha Nahano Nyamuzinda wage n'okumenya bikirira eyo myazi y'olo lusiku loshi ana menye kukulikira ago marhegeko goshi. ²⁰ Ebyo byoshi linji arhabonereraga bene babo na linji arhanakabuliraga ago marhegeko mpw'agagera eburhambi; ekulyo changwa ekulembe. Linj'alama siku zinene oku ntebe y'obwami, yewe b'abana bage omu Israeli.