¹ Wakazikenga omwezi gwa Abibu n'okugujiramo olusiku lukulu lwa Pasaka, omu kuhereza Nahano, Nyamuzinda wawe erenge. Bula gwaliri mwezi gwa Abibu amango Nahano, Nyamuzinda wawe akukulaga e Misiri budufu. ² Omu bintu byawe bizibuzibu n'ebigekegeke, wakazi bagira Pasaka wa Nahano, wamubagira Nahano, Nyamuzinda wawe hala hantu ochishogere mpu ye ndalo y'ezino lyage. ³ Eyo mbagwa orhakayilira mugati gukalire. Wayilya siku mushanvu zoshi n'omugati gurhakalire, mugati gwa ntya ntya, bulala oku kahato warhengaga omu chihugo ch'e Misiri. Ntyo kubyakaziba li oyibuka omu kalamo kawe koshi olusiku warhengaga e Misiri. ⁴ Enkala erhabonekanaga omu mwawe n'omu chihugo olimo. Namwezo siku mushanvu, murhaleka chiro n'ehinyama hityu ku eyo mbagwa mwabagira Lulema egolo ly'olusiku lwambere, na ntahyo hy'okubika egolo mpu higere esezi. ⁵ Orhanalinga mpu njimwabagira Pasaka omu lugo luguma omuzi Nyamubaho Nyamuzinda wawe aguha. ⁶ S'aliko halala Nahano, Nyamuzinda wawe alondwere mpu habe ndalo y'ezino lyage hawabagira Pasaka, egolo ezuba lyamazika, g'amango warhengaga e 'Misiri. ⁷ Wanayivuyira hala hantu Nyamubaho Nyamuzinda wawe achishogere onayilireho, na eri bucha esezi, wanagaluka aha mwawe. ⁸ Wamala siku ndarhu waly'emigati erhali mu nkala, mwanajira entimanano nkulu y'okukuza Nahano, Nyamuzinda wawe: Mwago mango,orhahira okajira mulimo goshi goshi. ⁹ Wakaziganja maboso mushanvu. Olusiku barhondera gurhemera emyaka oku daho na kere, wanarhondera okuganja maboso mushanvu. ¹⁰ Na ntyo wanajirira Nyamuzinda wawe olusiku lukulu lw'amaboso. Onahane entulo n'obulonza bwawe nk'oku Nyamubaho Nyamuzinda akugishire. ¹¹ Ochisise emalangambere ga Nahano Nyamuzinda wawe, hala hantu achishogere mpu y'endalo y'ezino lyage; hw'onakazagi chisimisiza na mugala wawe na mwali wawe; omwambali wawe n'omwambalikazi wawe; omu Lawi olamire omu lugo lwawe; haguma n'omuhisi n'efubi n'omukana nk'oku banalamire haguma nawe. ¹² Okazi yibuka oku waliri muja e'Misiri: Okenge onakulikire agala marhegeko. ¹³ Eri omali heba omu nguli yawe, eby'omu bulambo bwawe n'eby'omu mukenzi gwawe, wanajira edinye z'e' Taberanakeli mizizi mushanvu. ¹⁴ Ago mango wanashagaluka haguma na mugala wawe na mwali wawe n'omwambali n'omwambalikazi wawe, n'omu Lawi n'omuhisi, efubi n'omukana okubanali omu mwawe boshi. ¹⁵ Wajira siku mushanvu oli wajirira Nahano, Nyamuzinda wawe, olukulu omu halala hantu achishogere Nahano, bula Nahano, Nyamuzinda wawe, akugisha oyololoke omu mirimo yawe yoshi n'omu byoshi by'omu fune zawe li olama omu busime. ¹⁶ Ngasi buuko mulume olamire omu mwawe njachiyerekana gasharhu emalangambere ga Nahano Nyamuzinda wawe, hala hantu Nyamuzinda achishogaga. N'oku lusiku lukulu lw'emigati ya buzira nkala olukulu lw'amaboso n'olwa Endalo, ntakuyinja fune nyumu emalangambere za Nyamuzinda. ¹⁷ Ngasi muguma akazihana nka oku Nahano ana mugishire, Nyamuzinda wawe, anamuhaga. ¹⁸ Ngasi lugo Nahano Nyamuzinda wawe oku hereza, ohiremo abazuzi n'abasomi nk'okw'emilala yawe enali; bakazi chiira emanja okubinahunire. ¹⁹ Orhahira okalenganya muntu orhanahira okajira akalondole omu bantu: Oyula ye lebe, nji orhahindamulaga olubanja. Okuluhindamula kwanayagiisa orhakayagire okubunguke bw'owakayagire. ²⁰ Wakazi kulikiranya obushinganyanya li olama n'okushobola echihugo Nahano Nyamuzinda wawe aguha. ²¹ Orhahira okarhwera erago ahaburhambi bw'oluherero wayumbakire Nahano Nyamuzinda wawe. ²² Orhahira okaharamya eshushanyo, kugayisa egayisa Nahano Nyamuzinda wawe.