¹ Mbuse eho, mbai idhengakali iyenia maluhe modhukoania ongo likolo. Moli mo liwoso mungo mookali mbai, nda moli mo kelelo mokaosaka la mbai ate, ''Tela alandjo, okoinia sambo ndjinge ikouma mbuse e masio mango mageleli.'' ² Mbala kikima ihelanali la elimo, dhenga, ngbelengo eesi e okumu e likolo, koto moto mwesi ayabati la ngbelengo eho e okumu. ³ Moto ongo oyabatelali adjaali nda libukeli e yasipe koto nda libukeli e motio etanake, koto monama mwesi edjaali olingi ngbelengo eho. Edjaakali nda emelode. ⁴ Ngbelengo e okumu tuku iwale la inei elingali ngbelengo e okumu eho, ieneli mbange tuku iwale wayabati. Wakpalali wisindje wibubake, wakpalali mangboka ma wolo la mito mawu. ⁵ Mikalikali la miili la wakake edjaakali opumbi la ngbelengo eho e okumu, koto matambe sambo e misa edjaakali ololi liwoso la ngbelengo eho e okumu, matambe maho mainyei milimo sambo e Mwengei. ⁶ Liwoso e ngbelengo e okumu eho edjei la ewale eengani la malia mango maanangi libukeli. Awodja koto la kelekele e ngbelengo e okumu eho wikelamu winei e mokalo winge witumi la maiso liwoso koto la mbuse. ⁷ Ekelamu e liwoso e mokalo edjei nda simba, ekelamu ewale edjaali nda mana o ngombe opele, ekelamu esato edjakali nda moto o moki, ekelamu onei adjakali nda ndjio enge ekohumbwaka. ⁸ Wikelamu wiho inei, widjei la mapapu motoba motoba, witumi la maiso wenge kpaa koto la ndondo. Koto witihomaka, likolo la wuse ndji oasi, ''Mosatu, mosatu, mosatu Likumu Mwengei e okulu kpaa ongo odjaali odjei koto ogeleli.'' ⁹ Engele kpaa wikelamu e mokalo wikohekeleke otwa la mogano la pambo atie Ongo oyabati la ngbelengo e okumu, ongo odjei la mokalo libela la libela, ¹⁰ djinge mbange tuku iwale la inei wakoyaimbaka liwoso la Ongo oyabati la ngbelengo e okumu, wakolumbaka mangboka mawu liwoso la ngbelengo e okumu, wakoasaka, ¹¹ ''Owe oengi, Likumu lasu koto Mwengei osu, owe mosatu, tota otwa, mogano la okulu, laate okelali wihoo kpaa alidji la mwano mo owe wihoo kpaa wikelani koto widjei.''