¹ Mbuse eho iyenia la ewo e lilome e ongo oyabati la ngbelengo e okumu aiki Buku esi edjei la madhingo ndondo koto sa, winangani la wilembo sambo. ² Imoenia koto ahumbwa mwesi motetelake akolumbolaka la moli motetelake, ''Ndai owongi odhukoli buku la otokoli wilembo waho?'' ³ Moto te mokikima ongo likolo, te ahaka la mbume te sese e mbume, aengali adhuholi buku inga te odhengi. ⁴ Mbai idjaakali oleli ngbii la ebili ate moto te moikima ationgoli odhuholi buku inga te odhengi eho. ⁵ Mwesi o mbange aaselia mbai, ''Dhee ilelo. Dhenga! Simba e etondo e Yuda, mondjili mo Dawidi, inde olongi odhukoli buku eho koto obuki wilembo waho sambo.'' ⁶ Iyenia awodja e ngbelengo e okumu koto wikelamu inei wa mokalo koto awodja e mbange, mana o meme ayamali nda ahani la mbeka. Adjaali la ndjeka sambo, la maiso sambo, djinge idjei milimo sambo minge mitomani la mbume kpaa. ⁷ Akadjia, atotia buku la ewo e lilome e ongo oyabati la ngbelengo e okumu. ⁸ Ango etotia inde buku, wikelamu inei e mokalo koto mbange tuku iwale la inei wayaimbali liwoso e mana o meme. Mwesi la mwesi ewu aikali mote la kopo e wolo etumi la malasi, djinge idjei mayakongi ma wasatu. ⁹ Walembali lembo epoli: ''Owongi la ototi buku la otokoli wilembo waho sambo. Laate oolanali koto la makila ma owe osombelali Mwengei wato e maliye kpaa koto la miki kpaa koto la witondo kpaa. ¹⁰ Owaumesia iwo makumu koto wanganga-Mwengei la kole e Mwengei, koto wakokondja mbume.'' ¹¹ Idengakali koto iyokia moli mwesi e ebiba e waahumbwa wango wadjaki la lisuka suka e ngbelengo e okumu koto wikelamu inei e mokalo koto la mbange, motango mowu modjaali miliade la milaide, koto la koto. ¹² Wadjaki oasi la moli mopamake, ''Mana o meme ongo oolanali, awongi ototi okulu, ogumake, kandela, otetelake, otwa la pambo.'' ¹³ Wikelamu winge widjei ongo likolo, koto la mbume, koto sese e mbume, ndondo e ewale, koto wihoo kpaa winge widjei ndondo eho, ekoasaka ate, ''La ongo oyabati la ngbelengo e okumu koto la Mana o meme lipamboli koto mogano koo otwa koto otetelake edje libela la libela.'' ¹⁴ Wikalamu waho inei e mokalo easali ate, ''amen! Mbange wayaimbali, wayakongali.