¹ Yesu alingelia la molela akpandia alidi siwili eligbutu, ase aumia ongo la moki monde mene. ² Wamodjeliaa moto ongo olangali la epe akwesi dee ango weneli Yesu wondimi wou, inde aia la moto ongo okwesi dee:« Mana ombai, ate tetesa motema makasi! ilimbesi masumu ma owe. ³ Ndjongo wapundesi wapui wadi wadjakali omungoi la mitema mawu" oholo moto akomotangakolaka Mwengéi. ⁴ Yesu aewalima mungwene mawu, ase asia: alikambo lande edjéi ino la mamungwana mabe eheng ndenge la mitema manu? ⁵ Nda ebali ino okpomakpomi: ilimbesiga masumu ma owe awasi: amala ase pota osombi? ⁶ Ase ibali waweni ate mbai mana o moto idjéi la wokulu ahala la mokili la olimbesi masumu" inde asia la moto ongo oliti wenge amala, tota epe eowe ase keke la moki mo owe. ⁷ Moto oho amalia, ase akia la moki monde. ⁸ Ango weneli wato wasungu ungo loi wotali owangi ngbii, ase wa mwemeleli Mwengéi, alikambo ate awahiga wokumu ehenge ndenge atie wato. ⁹ Yesu angwali ongo ase ango adjakali oleki, amoenia moto mwesi nkombo ende Matia, adjakali wabati la bilo uputesi mamelo, Yesu aasea la inde:" tutia mbai!" Matia amalia ase amotuteiya. ¹⁰ Ango odjakali Yesu olaki la monguta monde, wato ebele wandombe wa mamelo la wato wabe wabatia la mesa la Yesu mongindi la watutiani wande. ¹¹ Wafalisayo waenia ndjongo wasia la watutiani wande alikambo lande ekolakaka mwalimo monu la wandombe wa oputesimamelo ase la wato wobe? ¹² Yesu aokia ndjongo: asia: wato wango wadjéi wenge wolamu watomolukaka monganga te, ndi wato wango wadjée la ekoni nde wakomolukaka monganga. ¹³ Kekeni okayapundesi djinge sambo yasi ekpata e Mwengéi ibali wouma ase ibaliti makao ma nama tumbake te la gesele, idjiti owaweli wato walamu te ase wato wabe. ¹⁴ Ndjongo watutiani wa Yoani mopatesi wakia atie Yesu, ase wamohuelia: Alikambo lande ekokilaka iso wafalisayo wilaka mbala ngbii? asewatutiani wa owe watokilaka te alikambo lande? ¹⁵ Ase Yesu awawongoselia omungoini ate wato wango wawaweli iwo la lipati la liwa la waengi odjéi la magba engele edjéi memene ongo owaweli? memene waengiti odjéi la magba te! ase wuse wungo wogeleli ango ekolongwa molome alipati ase wakokila olaki. ¹⁶ Moto tweti atosonoko esindje e gala la limbusu la engo eholi, inga te ndjongo esindje eholi ekosalakana enge e gala lipokosaka laho likodja lisungu. ¹⁷ Watosuaka Vino poli ndondo e saki e loposo wo gala te inga wakela ndjongo saki e loposo ekosalakana, vino ekosuakana ase saki e loposo ekobitana mpamba. Ase wakoswaka vino poli ndondo e loposo wungo woholi ndjongo eho kpàa ekodja wolamu. ¹⁸ Ango wasakali Yesu ndjoi djaho, likumu la wayuda mwesi akodja, amaya mauli liwoso lande ase asia Mana o mbai omoli aguia ndisikahala ase djaka omobatele ewo likolo lande alikambo ate akale. ¹⁹ Yesu alongoya amotuteya, ase watutiani wande wakia lainde mongindi. ²⁰ Moli mwesi, ongo odjakali la oekoni eodoki makila mbuse e mosio; wilanga liomu la wiale ndjongo inde andongbali ahuela Yesu mbuse e mokongo, ase ahelia etindje ende. ²¹ Alikambo ate inde asia la motema inga ihela sa esidje ende ikokala. ²² Yesu a dendia mbuse amoenia asiate: Mana o mbai dja la motema makasi! wondimi wo owe wokalesi owe ndi la engele eho moli oho akali. ²³ Yesu aumia la monguta mo Likumu laho, ango oweneli inde wato wabomi wamalinga alikambo la okiiakamohundi mana oho, ase wato ebele wato wadjakali okpomi etale. ²⁴ Inde asia umani saa alikambo ate mana omoli aguiti te , ase akolalaka wilo wa mosekia ngbii. ²⁵ Ango aumali wato saa, Yesu alingelia la monguta amohelia mana omoli oho ewo ase mana omoli oho aamalia. ²⁶ Mboli eho esombia wiati pkàa la mokili mwesi ngoo. ²⁷ Yesu alongoya ongo, ase engele enge edjakali inde weti ebete eesi, wato wagui maiso wale wapotali omotutei la opami tookela iso magba mana o Davidi! ²⁸ Ango eumali Yesu la monguta, wato wagui maiso waumia ahue la inde ase inde awahuelia: Ondimini ate yengi oduholini maiso manu? wa mowongoselia: Ndjongo mwalimo. ²⁹ Ndjongo Yesu awahelia la maiso, asia: Loi wokelame nda edjéi wondimi wonu? ³⁰ ASe maiso mawu madukwania. Yesu awatekesia makasi inde awaselia okani wolamu, ewongi moto tweti atie wete. ³¹ Ase wakia wasia mboli e Yesu Wiati kpàa ndondo e miki maho. ³² Ango odjakali wato waho okiiwakadjia la moto mwesi otokpomaka te atie Yesu alikambo ate inde adjakali la molimo mobe. ³³ Ango oumbali Yesu la molimo moho, moto oho apotia o kpomi: Wato waenia ndjongo wato ngbii wahuelia wasia ewenekiyo loi nda wohowu ahala la Isalaele. ³⁴ Ase wa Falisai wasia adjéi Likumu la wisisi wibe, nde emohi inde wokumu wo woumbi la wisisi wibe. ³⁵ Yesu alekali wibete kpàa ndondo e gbata la miki kpàa inde adjakali opundesi la monguta mowakongi mowu woasi mboli ndamu e wokumu ase adjakali okalesi wato kpàa wawikoni la wato wawodidi. ³⁶ Motema monde mookali magba alikambo la wato ngbii wango wawenekeli inde, alikambo ate wato waho wadjakali olembi ase wadjakali la motema molitake nda nkondolo djinge idjangi modengi. ³⁷ Ndjongo inde asia la watutiani wande pukapuka idjéi ngbii ase wato wawotomu wati ngbii te alikambo la osui pukapuka. ³⁸ Ndjongo akongoni la Likumu la elanga awatome wato wawotomu ngbii alikambo la osui.