¹ Yesu aadjimbali likolo la mokoli, wato ngbii wamotutiali. ² Ndjongo moto mwesi odjéi la ekoni e mbala andongbali ahue la inde, a mali mauli liwoso lande, ase asia: Mwalimo inga obali kalesa mbai. ³ Yesu alongoseli ewo amobatelia asia: ibali okale! ndi engele eho moto oho akalia. ⁴ Mbuse eho Yesu asia lainde oka wolamu, otimwaselake moto tweti te ase keke oyainie djéi atie wanganga Mwengéi nda ndjongo ekali owe. ⁵ Ango elingelali inde la Kapalanaume, Kapiteni moesi o Roma andongbia ahue la inde, amwongia ate amokalese. ⁶ Asia: Mwalimo, moto o mbai o wotomu akolangaka la monguta, wenge wimoliti ndau, ekomwanaka makasi. ⁷ Yesu amwaselia: ikokeke omokalesi. ⁸ ASe Kapiteni asia Mwalimo, idjéi moto mpamba, ewongiti olingele la monguta mo mbai. Ase asa loi woikima moto o mbai owotomu akokala. ⁹ Mbai koto edjéi la mahumu liwoso la mbai, la idjéila wamasadje mbuse e mbai inga yasa ate keke akoke inga yasa la moesi ate wongwa akowongwa inga yasa la moto o mbai owotomu ate kelandjo akokela. ¹⁰ Ango eokali Yesu ndjongo, inde ahuelali ngbii ase asia la wato wango wamotutiakali inde: Iwaselini memene; yeneki wondimi te weti te ahala la Isalayele. ¹¹ Iwaselini wato ngbii, wakolongwa atie ekolongwaka moi, ase la atie ekolangalaka moho wakoabatala mesa ndondo e wokumu wo Mwengéi ongo likolo ebete eikima la Abalahama la Isaka la Yakobo. ¹² Ase wato wango wakelaki ate wakondje wokumu, wakowalumba iwo la molili, ongo wakolela la otuanesi maino. ¹³ Ndjongo Yesu amwaselia Kapiteni, wongwa la monguta mwo owe, loi lokokelama ndi ndjongo nda endimiga owe ase moto owotomu wo Kapiteni oho akalia ndi la engele eho. ¹⁴ Yesu akia la monguta mo petele, ongo amogbotia nango moli o moli o Petele la epe wenge wande widjali la miso makasi. ¹⁵ Yesu amobatelia ewo ekoni emodeya, akalia, inde apotia omokeleli inde. ¹⁶ Kolokolo eumia wamodjelia Yesu la wato ngbii wango wadjéi la wisisi wibe Yesu aumbia la waho la wasi wonde, ase inde awakalesia wato ngbii wa wikoni. ¹⁷ Inde akelali ndjongo, la wengesi loi wungo wasali mwaseli Isaya: inde atotali wodidi wosu, ase akpalia wikoni wosu. ¹⁸ Yesu awenia wato ngbii womolengi ndjongo akelia mwano mo okpandi siwili e ligbutu. ¹⁹ Mwalimo mwesi mo pui aumia ahue la inde ase asia la inde:Mwalimo ikotutiawiati kpàa winge wikoke owe. ²⁰ Yesu amwaselia ate: mbwa dja motulu idjéi la mawela ma mbume ase mbulu idjéi la minguta, mana omoto ati la ebete elangalake te, la ohomi. ²¹ MOto odi ongo odjakali motutiani monde, asia la Yesu mwalimo, dee mbai ikamokunda wawa. ²² Yesu a mwaselia ate: tutia mbai, dee wato waguake wakundane. ²³ Yesu alingelia la molela ase watutiani wonde walingelia lainde mongindi. ²⁴ Galagala ehoho esungu ehohali likolo la malia ndjongo malia mapotali olingeli la molela, ase Yesu adjakali la wilo. ²⁵ Watutiani wandongbia ahue lainde wamosusolia la wilo, ase awaselia ate Likumu tokalesa iso! toguiya. ²⁶ Yesu awaselia ate: alikambo lande ekowangaka ino ndjongo? wondimi wonu wodjéi wokeke nda ndenge? ndindjongo inde amalia apamelia eho atie e malia maligbutu ase djiesi kpàa ititimia logoo ²⁷ Wato kpàa wahuelali ngbii ase wapotia wasi: oholo moto adjéi nda ndenge? alikambo ate ehoho la malia ma ligbutu mamotemeya inde? ²⁸ Ango emali Yesu siwili eligbutu, la mokimo wabagadala, wato wale waumali lakabuli, wadjali ogbotononila inde. Wato wadjakali la wisisi wibe, wadjakali wobe ngbii ndjongo moto tweti atiengakali oleki la enge mboka. ²⁹ Wapotali opami: Mana o Mwengéi obali nde atie su? odjiala alikambo la otoni iso eguele la enge engele eoniga Mwengei. ³⁰ Ma wokeke egogo engulu esungu idjakali olaki. ³¹ Wisis wibe wamwongoli Yesu ndjo: inga obali oumbi la iso: totoma iso ndondo e egogo e ngulu. ³² Yesu awaselia ate: kekeni ase waumia atie wango wato wale waho, ase walingelia ndondo e wangulu galagala egogo esi kpàa watilia obangu tée la mokoli alikambo la olengeli ndondo e ligbutu ase walindia ongo. ³³ Wabanéi wangulu watilia wakia ongo la moki ongo wasumbia mboli eho la loi lungo womi atie e wato wale wa wisisi wibe. ³⁴ Ndjongo wato kpàa a wamoki wakia ogbotoni la Yesu Ango omweni iwo wamwongia ate alongwe la moki moho.