¹ Ase ango oseselali Yesu oasi sambo ndjande, awaaselia watutiani wande ate: ² Woewini ate etikali masio maale Pasika ekelane, ase wakomokawa Mana omoto la loyi ate wamwakie la kulusu. ³ Ndjoongo wiloko wa wanganga Mwengei, la watiesakoli e pui wakumu la wiloko wato wagbotonia aatie nganga Mwengei mosungu ongo omoweli iwo ate Kaifa. ⁴ Ase wakelia londo la ndenge ate wamohele Yesu la lokenge obe, ase wamoole. ⁵ Kasi wasiate: etidjee engele e lipati, la loyi ate wato watikele ewedje. ⁶ Ango edjakali Yesu la Betania, la monguta e Simona moto oekoni e mbala. ⁷ Moli mwesi ayandongbia ahue onde, aiki mokeba mo malasi modjéi la lumba wolamu,mungo modjéi la motio mosungu, ase ango odjakali inde olaki, amosuelia malasi la moto. ⁸ Watutiani, waenia ndjongo, ewabitelia, ase wasia ate: nda ndenge obitesi ema nda ehenge ndjongo? ⁹ Ewongoki ate watambe mango malasi la motio mosungu, wawahe watundake. ¹⁰ Ango ookia Yesu ndjongo, awaseselia ate:ndandenge ekomodendiaka ino oholo moli?Akeli loi wesi wolamu atie mbai. ¹¹ Ino odjéini la watundake masio kpàa, kasi otodjaakineni la mbai masio kpàa te. ¹² Nda esweli inde mbai malasi la wenge wa mbai, edjei la olengeli oombami o mbai. ¹³ Iwaaselini la memene, wiati kpàa wikoasana mboli ndamu, la moki mwesi kpàa, wakwasa la omungoi ndenge ekeli oholo moli. ¹⁴ Ndjiango mwesi owatutiani wande liomu la wale, omoweli iwo ate Yuda Mosikaliota, akia atie wiloko e wanganga Mwengei. ¹⁵ Ase asiate: okohani mbai nda ema laate iyokaweleni la inde? Ase wamohekelia wambele tuku isato. ¹⁶ Ndji enge engele, alukia ndenge ndaamu la omokawi Yesu. ¹⁷ Wuse wopoo e wokoke edjangi enuele watutiani wakiaa atie Yesu, wamwaselia ate: Nda eati ebali owe ate tokawongele Pasika? ¹⁸ Awawongoselia ate: Kekeni la gbata la ebete eesi, ase owaseleni ate: Likumu aasi ate: Engele e mbai ewumia ahue, ikokela Pasika la watutiani wa mbai atie owe. ¹⁹ Watutiani wakelia ndindjongo nda ewatomali Likumu. Ase wawongelelia Pasika. ²⁰ Eumia pokwa, aabatia la mesa inde la wango liomu la wale. ²¹ Ango odjakali iwo olaki, asia ate: iwaselini memene, mwesi oonu akokawa mbai. ²² Waokia magba makasi, ase mwesi la mwesi apotia omwaseli: Edjéi mbai Likumu? ²³ Awawongoselia ate: ongo moto obongi la mbai ewo la pepe ebete eikima, inde nde okawa mbai. ²⁴ Mana o moto akokeke, ndenge edhingami eho la loyi lande, kasi magba la moto ongo okomotambaka mana o moto! Ekokaki odjei olamu inga moto oho atiwotamake. ²⁵ Yuda, ongo omokawali a longosia loi asiate: Edjéi mbai Likumu? Yesu amowongoselia ate: Ndjongo nda owasi owe. ²⁶ Ango odjakali iwo olaki,Yesu atotia okoke; ase mbuse, eende eoyakongi abukia, ase awahekelia watutiani asiate: totani, olakeni, ehenge edjéi wenge wa mbai. ²⁷ Mbuse atotia etotu, ase mbuse ewakongi, awahekelia asiate: kengani ino kpàa; ²⁸ Ehenge edjéi makila ma mbai makila ma wouma ma oholi, mango makoswakana la loyi la wato ngbi, la olimbesi masumu. ²⁹ Iwaselini, itokenga kine engema elongoi la mote movino, tee wuse wungo okokenga mbai enge poli la ino mongindji, la okumu o wawa. ³⁰ Mbuse e olembi lembo e Davidji, wakia la mokoli mo oliva. ³¹ Ase ongo Yesu awaaselia ate: okobingani ekikimi ino kpa la li likolo, la loyi la mbai, laate edhingami ate: ikomobinga sindjili e pata, ase mpata djaho kpàa ikowandjana. ³² Kasi ango mbuse ekosusua mbai, ikokee liwoso lanu la Galilaya. ³³ Petelo aotia liloba, aasia ate: inga té wato kpàa wakosakela ekikimi a loyi la owe,mbai itisakela ekimi te okeke. ³⁴ Yesu amwaselia ate: la memene ewaseli mbai, la li likolo ndjo liwoso ate koko ebekwe okowungana mbai mbala isato. ³⁵ Petelo amoongoselia ate inga tate edjaki ate togue la owe mongindji mbai itowungana. Ase watutiani kpàa waasia ndji ndjongo. ³⁶ Mbuse eho, Yesu akia la iwo la ebete esi e weli iwo ate Getesemani, ase asia la watutiani ate: abatani ahala, ango ekokeke mbai lihele oyakongi. ³⁷ Amototia la inde Petelo la wana wa Zebedeyo wale, apotia ooki magba la oyamungoi makasi. ³⁸ Awaselia alidji ate:Molimo mo mbai modjei la magba tée la logo. Abatani ahala djaani maiso ngbai la mbai mongindji. ³⁹ Ase ayandongbia moke liwoso, akuya elongi la mbume ayakongia ndjo: Wawa, inga eho ekodja olamu, ehele etotu eleke lihiele la mbai! mbala kpàa, etidje wungo wobali mbai,kasi edje nda ebali owe. ⁴⁰ Ase, akia ango odjéi watutiani, awagbotia walali, ase asia la Petelo ate: ino okokitini otoni la mbai té engele esi? ⁴¹ Susuani, ase wakongeni la loyi ate otikweni la mamekani, elimo edjéi la mogalia kasi moini modjéi pete. ⁴² Awatikia alidji ase ayakongia ndjo: wawa o mbai, inga eengaki ekelame ate eho etileke inga etikenge, mokano mo owe mokelame. ⁴³ Awongoyia alidji akawagbotia walali ilo, ango maiso mawu malitali. ⁴⁴ Awatikia, ase akia alidji, ayakongia mbala esato, awongwanelia ndji ndjongo. ⁴⁵ Mbuse eho akia atie watutiani wande ase awaaselia ate: Woni odjéini la wilo, alidji okohomakani la ehele engele? dhendani, engele eumia ahue, ate Mana omoto wamokawe la mawo ma wato wa masumu. ⁴⁶ Susuani, tokee dhenda ongo okawi mbai aumia ahue. ⁴⁷ Ango edjiakiyo Yesu owaasi, dhenda, Yuda mwesi ndondo e watutiani liomo la iwale, aumia, adjiya la watongbi waiki mabeha la mite, walongoyi atie makumu e wanganga Mwengei la wiloko e wato. ⁴⁸ Kaikonde moto ongo omotambali awahali elembo, aasali: moto ongo ikomolinga ekopi edjei inde mohelani. ⁴⁹ Lambala kikima Yuda ayandogbia atie Yesu aasia: mbote mwalimo! amolinga ekopi. ⁵⁰ Yesu amowongoselia: manima, enge edji owe okeli, kela eho. Ase wango wato wayandongbia wamobatia Yesu mawo, wamohelia. ⁵¹ Mwesi la wango wadjakali la Yesu mongindji aumesia sapia ende, amokotia moto o wotomu o nganga-Mwengéi mosungu, ase amotenia litoi. ⁵² Yesu omoaselia : wongosa sapia e owe la mokpokobo la loyi ate wango kpàa wakokelela sapia, wakogua ndji la sapia. ⁵³ Omungoli ate itikokake oongi ligamasi atie wawa, akoki otomeli mbai ndji sikala oleki liwoke e wahumbia liomu la iyale ? ⁵⁴ Ndandenge ekoengemene madhingo,ate eho ekokaki okelami ndji ndjongo? ⁵⁵ Mbuse eho Yesu awaaselia liwoke la wato: odjini la wiwuni la mité la oheli mbai nda moto o iwa? Masio kpàa idjakali masio kpa oyabati la ino, otiesakoli la tepelo, otihelalini mbai. ⁵⁶ Kasi djihidji kpàa iumia ndjo la loyi la woengesi madhingo ma waaseli. Watutiani kpa wamodheiya, watila. ⁵⁷ Wato wango wamohelali Yesu wakeli la inde atie nganga Mwengéi mosungu, Kaifa, ongo wapundesi wa pui la wiloko wato wagbotonoli. ⁵⁸ Petele adjali omotuteyi Yesu mbuse ma lihiele, tee la monguta mo nganga-Mwengéi mosungu, alingeli andondo e lopango ase ayabatia la watuke mongindji la ondhendji inga loi woho woko suka nda ndenge? ⁵⁹ Wiloko wato wa wanganga Mwengéi la wiloko wato kpàa wakelali londo mosungu la oluki loyi e mohengelake Yesu laate wamoolese. ⁶⁰ Kasi watieneli te likambo likikima, te ndenge wato wa moleho wadjali ngbi. Mbuse weeti wale wadjali. ⁶¹ Ase waasia ate: oholo moto aasali ate: ikobuka monguta mo Mwengéi ase ikoma la mbuse e masio masato. ⁶² Nganga Mwengéi mosungu aamalia ase asia la Yesu: Owongositi loi te lokikima? Woni wa wato wakokambaka? ⁶³ Kasi Yesu aabatia logoo. Ndjongo nganga Mwengéi mosungu asia la inde ate: la nkombo e Mwengéi o mokalo iwongi otowongosele iso la memene inga odjéi Masia mana o Mwengéi? ⁶⁴ Yesu amowongoselia: Owe oasi ga. kasi yasi la ino okoeneni ndji keke mana o moto ayabati la lilome e Mwengei e okulu kpaa, igeleli la mapata ma likolo. ⁶⁵ Nganga Mwengéi mosungu asalakolia wisindje wande wa wenge ase asia ate: Amotangi Mwengei! nde ekolukakine iso wa demo? Ookigani nda emotangi inde Mwengei. ⁶⁶ Omungoini nde? Wamowongolia ate: Akoki la logo. ⁶⁷ Mbuse wamolumbelia soi la mbanda mpe wamobingia ibhotu, weeti wamobambolia la oasi: ⁶⁸ La oasi: Kilisito twasela. Ndai aobingi? ⁶⁹ Petele ayabatali kelekele ndondo e lopango, Moto e owotomu mwesi o moli o nganga Mwengi mosungu aumia ahue lainde ase amwaselia ate: owe koto adjaki la Yesu mongindji moto o Galilea. ⁷⁰ Kasi Petele awungania la oasi: iyewiti enge ebali owe oasi. ⁷¹ Mbuse eho ango edjali inde oki liwoso la moluhe mo lopango, Moto o wotomu mwesi o moli odji amoenia awaselia wato wango wa djakali ango: oholo moto adjaki la Yesu mongindji moto o Nazaleta. ⁷² Ase Petele awungania alidji la olapi: Imoyewiti ohongo moto. ⁷³ Mbuse e engele ekeke, wato wango wadjakali ango wayagugia ahue ase wasia la Petele; memene odjéi mwesi owu, easeli e owe ekoeneseke. ⁷⁴ Kasi Petele apotia owabumakoli la olapi ate: Imoyewiti ohongo moto! La mbala kikima koko ebhekoiya. ⁷⁵ Ase petele amungolia loi wungo woasali Yesu la inde ate: liwoso koko e ebekwe okowungana mbai mbala isato. Apumbali saa, atobheiya la ilolo la magba.