¹ Eho lenge, okumu o likolo ekodja nda waseka liomo wango watotali matambe djawu pe wapumbali ogbotoni la molome o liwala. ² Watano wadjaali wikete, pe watano wadjaali la okenge. ³ Wikete watotali matambe mau, kasi watitotali maita. ⁴ Kaiko ase wango wa lokenge watotali miinda mau la maita ndondo e milangi ⁵ Nda molome oliwala adjaali owumwei, waokali ilo, walangalali. ⁶ La ndondo e likolo moli modhumbiamali: dhenda molome o liwala, kekeni ogbotone la inde. ⁷ Wali wango kpaa, wayamalia pe wawongelali matambe mawu. ⁸ Wikete waasaali la wango wa lokenge ate: hekeleni iso ndambo e maita eenu, laate masu mapotia olimani. ⁹ Wongo wa lokenge wawongolali ndjo: te ndgjongo, maita matikoka okelelani iso la ino. Kekeni atie wango wakotambaka maita pe sambani djanu. ¹⁰ Ango ekeeli iwo osombi, molome o liwala aumia. wango wahuakali walingelia la inde monguta mo liwala, modhuhe edhikanali. ¹¹ La mbuse, weeti waseka wadjia, waasia: likumu, likumu todhukola! ¹² Inde awangolali ate: iyoaselini meemene iyoyewitini. ¹³ Angatalakani a tina ate woyewiti lisio la engele. ¹⁴ Edjei nda moto mwesi apotali okii okendo la moki mo wadjidji, awelali mituke mandee pe awahekeleli iho wande. ¹⁵ Ndjongo ahekeleli mwesi wambele itano oeti iwale, ongo oeti mwesi ahekeleli moto la moto ondeli okulu wonde, mbuse akeli okendo la moki mo wadjidji. ¹⁶ Lambala kikima, ongo ototali wambele itano akeli okeli la eho molunga, pe eho ewotali eeti itano. ¹⁷ Ndenge kikima pe la ongo ototali iwale, eeti iwale. ¹⁸ Ase ongo ototali ndji esi akeli,pe atongali mbume pe ahisali ambele eho e wimbende e likumu lande. ¹⁹ Mbuse e masio malayi likumu e watuke adjali pe awawongoli wamosubele mboli e wambele djande. ²⁰ Ongo ototali wambele itano adjaali pe akpalali wambele eti itano aasali ate: likumu, ohekeli mbayi wambele itano; dhenga, ewotia wambele eti itano. ²¹ Likumu lande amoaselali ate: edjei olamu, motuke molamu pe la omeemene e sambo keke ikoobata obanyei wihoo ngbii. lingela la mwemu e likumu la owe. ²² La mbuse ongo ototali wambele iwale adjaali pe amoaselia ate: likumu, ohekeleli mbai wambele iwale, dhenda, iyokpobeli wambele etii iwale. ²³ Likumu lande amoaselia ate: edjei olamu, motuke molamu pe la omeemene; odjali olamu la sambo keke, ikoobata obanyei wiho ngbii lingela la mwemu e likumu la owe. ²⁴ La gboo ongo ototali ambele esi adjaali pe aasali ate: likumu iyewaki ate owe okodjaka moto o sambo tetelake, okobukaka, ebete etiyone owe, okoboliaka ebete etihuholali owe. ²⁵ Ndjongo iwangali pe ikeeli oyisi ambele e owe la mbume, dhenda ambele owe lele. ²⁶ Likumu lande amowongweselali ate: motuke mobe pe ekete, oyewali ate ikobukaka ebete ewoniti mbai, la ikoboliaka ebete etihuholali mbai. ²⁷ Oho lenge eengali obate wambele wa mbai ewimbende la baki ase la ewongo e mbai nda itoti wambele wa mbai la asumbelia. ²⁸ Mopwesani djinge ambele, mohani ongo odjei la wambele liomu. ²⁹ Laate wakomoha ongo odjei la eho ngbi, kasi ongo oti la eho, wakomopwesa te enge edjaki inde la eho. ³⁰ La enge edhendji mu mtuke mo pamba, molumbani saa: ongo ekodja ilelo la otui maino. ³¹ Ango mana o moto akodja la kembo ende pe wahumbwa wasatu mongindji la lainde, ndjongo akoyabata la ngbelengo ende e okumu la kembo. ³² Miki kpa mikoyabata liwoso lande. Akokabola wato wadji la weeti, nda sindjili e kondolo akokabolaka kondolo la meme. ³³ Ase akobata kondolo la oho ende e lilome ase wa meme la ewo ende e liali. ³⁴ Ndjongo likumu akwasa la wango wadjei la ewo e lilome: djakani, ino wango wapambwaami la wawa o mbai, totani mbano e okumu enge wawongelali ino tee la lipoteli e moki. ³⁵ Laate iyokali ndjala pe ohekelelini mbai ma ema lakake; idjali la ehoha, ohekelelini mbai malia makengake. Idjali modjidji pe oyambalini mbai olamu. ³⁶ Idjali lingbengbele pe okpalisalini mbai, idjali la boloko pe odjalini odhendji mbai. ³⁷ Ndjongo wato walamu wakomowongolela inde ndjo, likumu nda engele toeneli, odjali la ndjala tohekeleli ilaka, inga la ehoha, tohekeleli malia makengaka? ³⁸ Nda engele toeneli modjidji pe toyambali olamu pe odjaali lingbengbele pe tokpalesali? ³⁹ Nda engele toeneli la ekoni te la boloko todjaali oodhendji? ⁴⁰ Ase likumu awawongoselali ate meemene iyowaselini: masio kpaa enge okelali eho la mwesi la wato wango waeti wakeke ndondo la wa manima wa mbai, okelelalini mbai. ⁴¹ Ndjongo akwasa pe la wawo wa djei la eho nde eliali ate: longwani ala ino wango walakelanala obe, kekeni la misa enge etilimanaka enge ewongonali la etota la waahumbwa wande. ⁴² Laate iyokali ndjala, ase otihalini mbai ilaka pe idjali la ehoha, otihalini mbai malia makengake. ⁴³ Idjali modjidji, otiyambalini mbai olumu; pe idjaali lingbengbele otikpalisalini mbai, idjali lekoni pe la boloko, otidjali odhendji mbai. ⁴⁴ Ndjongo iwo pe wakomowongosela: likumu nda engele to oeneli la ndjala pe la posa e malia te modjidji pe lingbengbele te la ekoni pe la boloko pe totioyokelelali owe? ⁴⁵ Ase inde akowawongolela la oasi ate: Iyowaselini meemene pendja ate: engele kpaa enge otikelali la mwesi a wato wango waheti keke ndondo e wamanima wa mbai, otikelelalini mbai eho. ⁴⁶ Ase wakokela logo e libele, ase wato walamu, wakoke la mokalo mo libela.