¹ Ango okia Yesu, apumbia la Tepelo watutiani wande wayandongbia la ahue la omoinei nda emaani eho. ² Kasi Yesu awaaselia ate:woenini nda odjéi eho? iyowaselini la memene,etotikala ahala libukeli liesi likolo la leeti libukeli, kpaa ekokwa sese. ³ Yesu ayabatali likolo la mokoli mo oliva, ase watutiani wakia iwo amene okamohueli, waasali ate:Toasela iso,nda engele ekokelana ndjinge sambo, nda elembo ekokelana la wodji wowe, la gboo e moki? ⁴ Yesu awawongoselia: angatalakani moto atiokosakeni. ⁵ La loyi ate wasuungu wakodja la nkombo e mbai wakwasa ate.Mbai idjéi kilisito ase wakowakosakola wato ngbi. ⁶ Okookani mboli ewita la wita wikosana. Adhendakani, huakani otiwangakeni, la loyi ate ewongi djinge sambo ekelame, kasi gboo e moki eumakiyo. ⁷ Alikambo witondo wikosana la weeti witondo, wokumu la wokumu wokosana, ndjala ekodja, mbume ekoduduma wibete kpa. ⁸ Enge kpàa edjéi lipotele la odjidji. ⁹ Ango wakokawani ino la odjidji, ase wakotonani miki kpàa, la loyi e nkombo e mbai. ¹⁰ Ango nde wato ngbi koto wakobhinga ekikimi, ase wakowa ino, wato wakotonana iwo la iwo. ¹¹ Waaseli wa moleho wakodjàa, ase wakowakosakola wato ngbi. ¹² Ase,sambo dja obuki pui ikouma ngbi, libalano la wato ngbi likosila. ¹³ Kasi ongo moto okodjaa la egalala tee gboo akokala. ¹⁴ Ehele mboli ndamu e wokumu ekotiesakolana la mbume djiesi kpaa, alikambo la ohi demu la wibete kpàa winge widjéi wato,mbuse eho gboo ekodja. ¹⁵ Nde ndjongo, ango ekwene ino ema ebe eamali la ebete e satu, nda eyasali mwaseli Daniele ate ongo otangi ahuake. ¹⁶ Ase,wango wakodjaa la Yudea wakotila la mokoli. ¹⁷ Ongo okotela likolo la motendo atoadjimba la ototi wiho winge widjéi la monguta monde. ¹⁸ Ase ongo oki la wilanga atika wongwa mbuse ototi wiho winge witikali la mbuse. ¹⁹ Magba la wali wango wadjéi la memi la wango wakonu ngesaka wana la masiyo maho! ²⁰ Akongokoni engele kpàa alikambo ate matili manu matidjee engele e pio makasi, te wuse wo yenga. ²¹ Aloyi ate, enge engele ekodjaa wodjidji woesi wasungu, wungo wokelanakiyo tee lipotele la moki,tee ndji kekehele, ase etokelana kine alidji. ²² Ase inga masio maho matiumake ahue, nda moto toeti atokala,kasi la loyi la wato wango waononi, wuse woho wokodjaa ahue. ²³ Inga moto awaaselani ate: Kilisito adjéi ahala, ta ate adjei ango, otimondjimakeni. ²⁴ Alikambo ate:wa kilisito wa moleho wakodjaa,la waaseli wamoleho;ase wakoumesa masimbo ndenge la ndenge ,ase wakokela wiahuelahueli,alikambo la awakwesi te wato wango waononi,te inga wokoki wodjéi. ²⁵ Weneni iyowaselini liwoso. ²⁶ Inga wa woaselani ate: Dhendani,adjéi la lisobe; otike ekeni, dhenda, adjéi la wila ngele, otindimakeni. ²⁷ Nda ndenge ekopumaka wuse la esiti wokobataka tee la wesite, nde ndjoongo ekodjaa odji wo Mana omoto. ²⁸ Ebete enge edjei molonda, koka ikoboliana ango. ²⁹ Ndjiango mbuse e wodjidji e masiyo waho, moi mokolimana koto, ndebo etoumesa obhati woho, minoto mikolongwa likolo mikwe la mbume, ase wokulu wo likolo wokoduduma. ³⁰ Ango elembo e Mana omoto ekwenene ongo likolo, ase mawota kpàa ma miki mikwabhingabinga la oleli, ase wakomwene Mana omoto ageleli la mapata malikolo la okulu koto la mogano ngbii. ³¹ Wahumbwa wande wakodjaa, la ndundu ikobinga, ase wakowakokia waononi wande la wihoko winei, olongoi la gboo esi e likolo tee la gboo eho edji. ³² OKani maamapundesi e mote mo Figi moenesi ango oumia witee petepete, la opumbesi kasi, woewini ate engele e ehela eumia ahue. ³³ Ndji ndjongo, engele ekoene ino sambo djinge kpàa, ewani wolamu ate wuse owongwake wo mbai wodjéi ahue. ³⁴ Lameemene iyasi la ino ate liwota lihili litoeta kpa, liwoso ate djihinge sambo kpàa iume. ³⁵ Likolo la mbume wikoleka, ase maloba ma mbai itoeta te wokeke. ³⁶ La loyi lidhendji lisiyo la engele,moto tueti ayewiti, edje te waahumbwa te mana, ndji wawa inde amene moto oyewi. ³⁷ Loi wungo wokelanali la engele e Noa, ekodja ndji ndjongo engele ekodja mana o moto. ³⁸ Ndjongo ndondo e masio liwoso ate malia matume la moki mwesi kpàa, wato wadjakali olaki la okengi, wa djakali oiki wali, te oikesi wana wau, tee ndji wuse wolingelali Noe la wato. ³⁹ Watimungwakali loi te weti te, tee engele etumali malia eengia, ase ewaolali iwo kpàa, ekodja ndji ndjongo engele ekowongwa mana o moto. ⁴⁰ Wato wale wakodjaa la mwesi akomototana, mwesi akotikala. ⁴¹ Wali wale wakohuluka wokeke ebete eikima: mwesi akototana, mwesi akotikala. ⁴² Ndindjongo hukani, la loyi ate wewitini nda wuse okodja Likumu la nu. ⁴³ Ewani oho wolamu: inga memene monguta aewaki nda engele moto o iwa akodja la likolo, nda ayabatali angbilia, nda atidheli moto o iwa alingele la monguta monde. ⁴⁴ La ndjongo, ino koto, abanyiani wolamu, alikambo mbai mana o moto ikodja engele enge emungoiti ino. ⁴⁵ Ndjongo nda motuke molamu pe aangatali ongo likumu la nde amobati sindjili e wato wa monguta monde la owahi wilaka la engele enge ebalami? ⁴⁶ Mwemu modjéi la moto o wotomu ongo inga Likumu lande akawongwa atie nde, amogbootia ayahekeleli la wotomu wonde. ⁴⁷ Iyowaselini memene: Akobobata likumu e wiho wande kpa. ⁴⁸ Ase inga adja motuke mobe, ongo akoyasela inde amene: LIkumu la mbai awumoi la owongoi, ⁴⁹ Akopota owabingi wato wango wakokelaka wotomu la inde mongindji, ingi alaka la okokengi mongindi la wato wa molangwa. ⁵⁰ Likumu laho akawongwa wuse wumgo inde atiyewa, la engele enge eyewiti inde. ⁵¹ Likumu akomoha etumbu e tetelake, akomokawela liputi e wato wa ogeno: ongo ekodja oleli la otwi maino.