¹ Yesu awawongweselali iwo aleeti la masekpe pe aasali ate: ² Okumu e likolo edjei nda likumu mwesi ongo akelelali mana onde o molome yenga e liwala. ³ Ase atomia mituke mande wake oweli wato wango wawelanali la yenga e liwala, ase wato waho watonali odji. ⁴ Aleeti atomali mituke meeti pe awaaselia ate: asela wato wango wawelami ate: dhenda! iwongeli ilaka la mbai e midji, wangombe wa mbai e milome la mbahu dja mbai e maita eolami, ilaka kpaa edjei djakani la yenga e liwala. ⁵ Iwo waeneli ehoo pamba pe wakeeli, mwesi la elanga ende, odji la tomo djande. ⁶ Wango weeti wawahelia mituke mande, wawa sambwesia obe pe wawaolia iwoo kpa. ⁷ Ango e okia likumu ndjongo, amemelali; atomia wato, waolia wango watokpa, watumbia gbata ewu. ⁸ Ndjongo aasali la mituke mande ate: yenga e liwala elengelami olamu, ase wato wango wawelamali wawongiti la ehoo. ⁹ Eho lenge kekeni la wibhomanelo dja mboka, moto kpaa ongo okomogbotoni mowelani la yenga e liwala. ¹⁰ Ndjongo wango mituke wapumbali la wa mboka pe wawelali watokpaa wango wawagbotoli, wato wabe la wango walamu: pe monguta mo yenga e liwala etumali la wato wango wawelanali. ¹¹ Ango likumu alingelali odhendji wato wango wawelamali, aeneli moto mwesi ongo atikpalali esindje e yenga e liwala. ¹² Amwaselia ate: bola, nda ndenge olingeli alandjoo odjangi okpali e sindje e yenga e liwala? Ongo moto anangali monoko. ¹³ Ndjongo likumu aasali la mituke mande ate:monangani makolo la mawo, djakani la inde, molumbani la molili e saa ongo ekodja oleli la otwi maino. ¹⁴ Laate wato ngbii wawelani ase keke nde waonani. ¹⁵ Ndjongo wafalizeyo wakeli okakeli likita iwo kpaa laate wamohele la maloba mande. ¹⁶ Eho lenge wamotomelali watutiani wau, la wato wa Elode, waasali: motiasakoli, toyewi ate owe okoasaka memene pe okotiesakolaka mboka e Mwengei la meemene pe oyiwangaka moto te, laate otidhendaka ilongi djaa wato. ¹⁷ Ndjongo yewesa iso omungoli nde? ewongi oputi Kaisala limelo enge moto kpaa akoputaka inga ekokiti oputi. ¹⁸ Ase nda Yesu ayewali mamungo mbee mawu, aasia ate: woni okwalelakani mbai lisala? ¹⁹ Iniani mbai ambele enge moto kpaa akofutaka limelo. wamodjelelia ambele esi. ²⁰ Ase awaaselia ate: elilingi ehele pe madhingo maama ma ndai. ²¹ Waasali ate: e kaisala ase awaaselali ate: ndjongo, hekeleni kaisala wihoo wa kaisala, ase Mwengei wihoo wango wa Mwengei. ²² Ango eokali iwo ndjongo, wakamwali, pe wamodheli inde wakia. ²³ A lisio lahoo wasadukai wato wango wakoasaka ate libasi liti te, wadjali ebete edjei inde pe wamohuelia: ²⁴ Motiesakoli Moize aasali ate: inga moto agwa, awotiti wana, maanango opele akoki amototi moli onde a liwala la owoteli maanango wana. ²⁵ Sikalandjo edjaali la pele sambo ndondo esu, pe ongo o liwoso ayikaali p,e agwaali, ase nda eti wotali inde wana, amodheleli manango opele moli onde. ²⁶ Ekelemali ndjongo la ongo wale pe la ongo osato tee la iwo kpaa sambo . ²⁷ La gboo e iwo kpaa moli ongo agwaali. ²⁸ Ndjongo la obasi e logo, akodjaa moli ondai a ndondo iwoo sambo? laate iwo kpaa wamototali nda moli. ²⁹ Yesu awongolelali ate: odjeeni la owungi, laate oyewitini madhingo pe okulu e Mwengei; ³⁰ Pamba te la lisekwa pele wataika pe wali watilingele mawala ase wakodjaa iwo kpa nda wahumbwa. wa likolo. ³¹ La likambo lidheendji obasi e logo, otitangeni enge Mwengei aaselali ino ate: ³² Idjei Mwengei o Abalayama pe Mwengei o Yisaka pe Mwengei o Yakobo? Ati Mwengei o wagwi, kasi e wato wa mokalo. ³³ Ango ebiba e wato waokali ndjongo wakamwali la etiesakoli ende. ³⁴ Ango wafalisaya wayokali ate: ahelesali wasadukai monoko, wayaboliali limbutu mwesi. ³⁵ Ase mwesi ewu ongo oyewali mibele olamu olamu, ahuelia a tina omomeki inde ate: ³⁶ Motiesakoli, nda mobele eeti osungu ndondo e mibele? ³⁷ Amwaselelali inde ate: osengeli obali Mwengei Mongali e owe la motema mo owe mobimba pe la molimo mo owe mobimba pe la mamungo ma owe kpaa. ³⁸ Ango nde mobele enge eti osungu pe e liwoso. ³⁹ Ewale enge ehengemeni la ehoo; eho lele : eongi obale miinowe nda owe amene. ⁴⁰ Mibele kpaa pe matiesakoli, ehelani la mibele mwale. ⁴¹ Kaikoase ango wafalisayi wayaboliali ebete e kikima, Yesu awahuelali: ⁴² Omungoini nde la tina e kilisito? adjei mana o ndai? iwo wamowongoselia ate: Mana o Davidi. ⁴³ Inde awaaselali iwo ate: ndjongo nda ndenge Davidi la mboka e molimo santu akomowelaka inde likumu pe aasia: ⁴⁴ Mwengei asia la Likumu o mbai ate abata la eho e mbai e lilome tee ikobata watonani wowe sesee e makolo ma owe? ⁴⁵ Ndjongo inga Davidi amowelia inde Likumu, nda ndenge inde akoki odjei mana onde? ⁴⁶ Moto te mwesi atikokali omoowongweseli loyi pe moto te mwesi atimekali opoti ungo use omohueli poopo.